Read Punu Jean 16 Bible Online

Jean 16 - Punu bible

Jean 16

¹Nyidulubusi yiri dugotsiemusa yitu.

²Jogu bodubinga o Mandagu maYibenguna; o gusu pa mutu oduboka otasa yiri esali yisalu yiNsambi.

³Jogu bovaga nana mu mbari bagenjabi na bagejabi Tata ami wandi.

⁴Nyidutsinguli mambu memama yiri o gusu durangimina yiri nyimadulubusa. Ava dibandu nyisamaledutsingula mambu memama mu mbari nyibetsi nenu.

⁵Uweʼ nyiwendi ombu omansindiga na ne mutu agekwivuli agunyi guiwendi?

⁶Duilabi munyongu mu mbari nyimadutsingula mambu meni.

⁷Tumba nyidutsinguli ngensa rie: Diviolila ubueji yiri nyiwendi mu mbari pa ngowenda Muwamusi agoruga tumba pa nyiwendi nyumusindiga ombu genu.

⁸Ava oruyila olasa bisi bulongu mbela na ndunga na obatabulila bunsonsi buNsambi.

⁹Obavega mbela mu mbari bagepayili yitu;

¹⁰ndunga andi jilabini mu mbari nyiwendi ombu Tata na bagomuendaba;

¹¹bunsonsi builabini mu mbari kaga bulongu buebubu amabetsu.

¹²Nyina mambu mapuela umuedutsingula tumba vana dedi te na Muwamusi oruga.

¹³Jandi la Yinyunyi Yingensa na odulonsa ngensa jiotsu. Agovosa amandi tumba ovosa motsu ama amagulu na odutubulila amoba o gusu.

¹⁴Jandi ondodisanga mu mbari oposila ava odutsingulila amami.

¹⁵Motsu amavu na Tata mavu nami la dibandu nsivosila rie: Yinyunyi obonga amami nodutubulila monyi.

¹⁶Mua pesu temu dugomuendaba mbana mua pesu temu dumuendaba.

¹⁷Badukitsi bandi bamosi bamawivasana rie: Divindugulu yi, evosi rie: Mua pesu temu dugomuendaba mbana mua pesu temu dumuendaba? Na evosi rie: Mu mbari nyiwendi ombu Tata.

¹⁸Kabogu divindugulu yi, Dugomuendaba? Jetu tugegulu ama evosi.

¹⁹Jesus amajaba yiri utumuna betumuni paga kabogu amavosa rie: Merianu: Mua pesu temu dugomuendaba mbana mua pesu temu dumuendaba. Mu dionyi duiwivusini bivu?

²⁰Nyidutsinguli rie: Dingensa dulila na dutsukama tumba bisi bulongu bosangila; jenu dulaba munyongu tumba munyongu enu ukaluga nsangu.

²¹Ava mugetu eguluiu misongu elabi maguga mu mbari diweru diandi dimatola tumba pa amabura agemuerangimina maguga meni, yika nsangu elabi mu mbari muana amaburu.

²²Kabogu jenu wenu duilabi munyongu namunyi tumba o gusu nyumuedulaba na nsangu enu jiuba tindi nsangu.

²³Mu yilumbu yieni dugokwivula ne diambu dimosi. Nyidutsinguli rie: Dingensa ama duwivula Tata oduvayila monyi mu diina diami.

²⁴Te na namunyi dusakawivula yima mu diina diami. Wivulanu, dudila yiri nsangu enu jiuba jidugu.

²⁵Nyimaledulonsa na banongu. Tumba diweru dimatola yiri ngomuebuaga banongu, nyudulonsa yika ulonsa mambu maTata.

²⁶Mu yilumbu yieni duwivula Tata ama duirondi mu diina diami, menu ngomueduwivulila;

²⁷jaʼ beni Tata edurondi mu mbari dumatonda na duna yitu yiri nyimaruyila ombu Nsambi.

²⁸Nyimapalila ombu Tata, uruga gunu; namunyi yika ugabuga nyigabuyi ombu Tata.

²⁹Badukitsi bamamutsingula rie: Namunyi guivosi ama tuigulu mu mbari gugemuebuaga banongu.

³⁰Kabogu tuijabi yiri guijabi mambu motsu. Dibandu yi mutu omueguwivulila bivu? Tuisingi yiri gumapalila ombu Nsambi.

³¹Jesus amabawivula rie: Kabogu dumapayila yitu?

³²Namapapa dupansiga yiari na yiari, menu nyusiala pinsa. Ne nana ngaa pinsa mu mbari Tata aji nami.

³³Nyimadutsingula mambu meni yiri ava dufubinina mirima nami duba sui. Dulaba maguga tumba wangalananu mu mbari nyimabelisa bisi bulongu kala.