Read Punu Jean 17 Bible Online

Jean 17 - Punu bible

Jean 17

¹Jesus anomana uvosa nana amanangula misu o julu novosa rie: Tata, diweru dimatola! Matisa Muana agu yiri Muana agu ogudodisa.

²Laba, gumamuvega musuga uotsu yiri ovega monyu umutubu ombu botsu aba gumamuvega.

³Monyu umutubu la gugu rie: Ujaba yiri ndeju guvu Nsambi mosi buandi jingensa nojaba yiri jandi agu gumasindiga la Jesus Christ.

⁴Nyimabega diruma diagu; nyimamana yisalu ayi gumapega.

⁵Pa guirondi Tata, dodisa Muana agu na muemuvega bundumba abumaleba bujenu nandi mbe bulongu busakasundu.

⁶Nyimajabisa diina diagu ombu batu aba gumapega. Jogu bamaba abagu na ndeju gumabapega. Bamakelisa mambu magu

⁷kabogu bamajaba yiri motsu amavu nami meruyili ombu gagu.

⁸Nyimabalonsa malongi ama gumandonsa na bamamagulu. Bamajaba yiri ngensa nyimaruyila ombu gagu na bamavaga yitu yiri ndeju gumansindiga.

⁹Nyisambili mu diambu diogu. Ngowivula mu diambu dibisi bulongu tumba mu diambu dibatu aba gumapega mu mbari baji abagu.

¹⁰Mu mbari botsu abavu nami, abagu na botsu abavu nagu, abami wandi mu diambu diogu nyimadodusu.

¹¹Nyimagusuga; jogu bosiala. Namapapa uruga nyiruyi ombu gagu. O Tata ami, mu diina diagu dimangolu kelisa jogu aba gumapega yiri jogu boba murima mosi nana jetu nagu.

¹²Ava nyibetsili nogu, nsibakelisanga mu diina diagu. Nsikelisanga aba gumapega ne umosi agaatsiemuga, yika muana dubungu yiri Bisonu biudugusu.

¹³Namunyi uruga nyiruyi ombu gagu; ava nyikivu nogu uvosa nyivosi yiri bolaba nsangu ami, nsangu ajivu jidugu.

¹⁴Nyinobalonsa Mambu magu, bisi bulongu bamabavina mu mbari bagaa murima mosi netu.

¹⁵Ngeguwivuli ubagusula mu bulongu buebubu tumba nyiguwivuli ubakelisa yiri mutu mubi agobabivisa.

¹⁶Jetu nogu tugaa na dinonga na bisi bulongu.

¹⁷Mu diambu dingensa agu, bavayi abagu; Mbembu agu jivu ngensa.

¹⁸Nana ndeju gumansindiyila o bulongu, menu wami nyibasindiyi.

¹⁹Mu diambu diogu nyimakevega ombu gagu yiri jogu wogu bokevega ombu gagu.

²⁰Ngesambili yiri gurangimina yika jogu buandi tumba na jogu abopayila yitu o gusu wandi.

²¹Nyisambili yiri botsu boba na murima mosi nana jetu nagu tuvu umosi, yiri jogu wogu boba umosi mu jetu mbana batu bovaga yitu yiri ndeju gumansindiga.

²²Nyimabavega bundumba abu gumapega yiri boba umosi nana jetu nagu tuvu umosi.

²³Menu mu ndeju na ndeju mu menu yiri jogu wogu bosinga uba umosi na yiri bisi bulongu bojaba yiri ndeju gumansindiga na gumabaronda nana gumatondila.

²⁴Tata nyirondi yiri ava menu nyivu jogu aba gumapega boba vana wandi. Tata balasi bundumba buami abu gumapega mu mbari ndeju gumatonda ne bulongu bukasundu.

²⁵O Tata ami, bisi bulongu basamagujaba tumba menu nyimagujaba na jogu baba bamajaba yiri ndeju gumansindiga.

²⁶Menu nyimabajabisa diina diagu na nyubuesa ubajabisa dionyi yiri durondu duagu duba nogu na menu nyuba nogu wandi.