Read Punu Jean 20 Bible Online

Jean 20 - Punu bible

Jean 20

¹Muna kedi yilumbu yitsona pisama mbe jikivu mu tsi Marie muisi Magdala amagabuga o ngila, amalaba yiri dimanyi dimagusulu va ngila.

²Amawenda mbangu ombu Simon Pierre nombu mudukitsi ususu agu Jesus amarondanga. Amabatsingula rie: Bamagusula mfumbi o ngila na tugejabi agunyi batsijisunsa.

³Pierre na mudukitsi ususu banopala o ndagu bamagabuga o ngila.

⁴Jogu botsu babeji bamawenda mambangu va mosi tumba mudukitsi ususu amawenda mbangu uviolila Pierre na amamureyila o ngila.

⁵Anobandama amalaba matsanda amamaba va tsi tumba asamakota.

⁶Mbana Simon Pierre anotola amasundila ukota o ngila. Amalaba yika matsanda na matsanda amamaba va tsi.

⁷Tsanda ajimapietu mu muru Jesus jisamaba va mosi na matsanda masusu.

⁸Mudukitsi ususu agumareyila o ngila amakota na amalaba dingensa mfumbi jigatsi.

⁹(Te na temu eni mbe basakatsiyisa Bisonu abimasonugu rie: Jesus orambuga o dufu.)

¹⁰Mbana badukitsi botsu bamayenagabuga.

¹¹Marie amatsana va mugula ngila na amalilanga. Ava amalililanga amabandama ugengila o ngila.

¹²Amalaba biansa bibeji abimaduara biduaru bivema bitsana va mbura ajimaba mfumbi; yimosi o yiari ayimaba muru na yisusu o yiari ayimaba makulu.

¹³Biansa bimamuwivula rie: Mugetu dibandu yi guililili? Jandi amabigabusila rie: Mu mbari batsigusula Fumu ami na ngejabi ava batsimusunsila.

¹⁴Ava amavosilanga nana amageluga na amalaba Jesus tumba asamamujaba.

¹⁵Jesus amamuwivula rie: Mugetu dibandu yi guililili? Anyi guirombi? Jandi amamufuiyisa na muvaritsi nungi la dibandu amavosa rie: Pa ndeʼ gutsimugusula, ndonsi ava gutsimusunsila, nyirondi umukelisa.

¹⁶Jesus amamunengila rie: Marie! Jandi amageluga na amamunengila mu Hebreu rie: Rabbouni! (Divindugulu rie: Mulonsi!)

¹⁷Jesus amavosa nandi rie: Guyandama mu mbari nyisakamata ombu Tata. Tumba wenda ombu baana bataji bami nobatsingula rie: Nyiwendi ombu Tata ami nombu Tata enu, ombu Nsambi ami nombu Nsambi enu.

¹⁸Kabogu Marie muisi Magdala amawenda ombu badukitsi na amavosa rie: Nyimalaba Fumu mbana amabatsingula motsu amamalabana.

¹⁹Mukolu tsona badukitsi bamaba va mosi o ndagu jibindama mu mbari bamalaba baJuif goma. Jesus amasundila ukota na amavosa rie: Sunsanu mirima.

²⁰Ava amavosila badukitsi bamalabila Fumu, bamalaba nsangu jineni.

²¹Jesus amamuebatsingula rie: Sunsanu mirima. Nana Taji amansindiyila, menu wami nyidusindiyi.

²²Anomana uvosa mambu meni amabagabila miula; amabatsingula rie: Dilanu Yinyunyi yiNsambi.

²³Batu aba dutanda botandu na aba dugotanda bagotandu.

²⁴Mudukitsi umosi Thomas (ajinengulungu divasa) asamaba ava Jesus amalabinina nogu.

²⁵Kabogu bamamutsingula rie: Tutsilaba Fumu. Tumba Thomas amawaka rie: Pa nyimalaba mivedi mibatsongu mu makaka mandi nomibemba na mulembu ami nokotisa dikaka diami ava dubansi duandi mbana nyusinga yiri dumamulaba.

²⁶T sona mosi jimavioga na badukitsi baJesus bamamueba o ndagu na Thomas amaba nogu. Ndagu jimaba jibindama tumba Jesus amasundila ukota na amavosa rie: Sunsanu mirima!

²⁷Mbana amanengila Thomas rie: Ruga yibembisa mulembu agu va mivedi miami! Gengila makaka mami! Kotisa dikaka va dubansi duami. Guyamuetumuna pagu, payili yitu.

²⁸Thomas amamugabusila rie: Fumu ami na Nsambi ami!

²⁹Jesus amamuwivula rie: Gumapayila yitu mu mbari gumandaba? Ka muna ubueji gu ombu jogu abepayili yitu ne basakandaba!

³⁰Jesus amamuelasa badukitsi bandi bimaga bisusu abisamasonu mu dibuku diedidi.

³¹Mambu memama mamasonu udulasa yiri Jesus aji Christ na aji Muana Nsambi; pa duimuvayili yitu dudila monyu.