Read Punu Jean 6 Bible Online

Jean 6 - Punu bible

Jean 6

¹Amana manovioga Jesus amawenda o disimu dimosi diyiliba yiGalilee (vo Tiberiade).

²Yinombu yineni yimaduka Jesus mu mbari bamalabanga bimaga ava amabelusilanga bibedu.

³Jesus amamata o julu mukongu na amayetsana guna na badukitsi bandi.

⁴Kabogu Paque, feta jibaJuif jimaba bebeli.

⁵Jesus anobuaga misu amalaba yinombu yineni ayimamurasuna. Mbana amawivula Philippe rie: Agunyi tusumbila biguji yiri batu bebaba boji.

⁶(Amavosa dionyi umuweliga mu mbari amajaba adi ovaga.)

⁷Philippe amamugabusila rie: Ne na kama beji tsimbongu tsilora jivema tugodila mapa mawelimina yiri mutu mutu odila mua pesu.

⁸Ususu va gari badukitsi bandi, Andre muana nguji Simon Pierre amamutsingula rie:

⁹Avava va mufudu aguvu na mapa maranu na banyama babeji bamamba, tumba ayina yi ombu puela batu bebaba?

¹⁰Jesus amaruma rie: Batsanisianu. (Va mbura eni vamaba puela bisinga.) Jogu bamaba tosini yiranu tsibabaala.

¹¹Jesus amabonga mapa na amagabusa Nsambi diboti mbana amagabila jogu abamaba batsana; munongu mosi amabavega banyama bamamba te na bamagukuru.

¹²Banogukuru Jesus amatsingula badukitsi bandi rie: Bolanu bibuku abitsisialulu yiri vagotsiemuga ne yibuku.

¹³Kabogu botsu banomana uji bamabola digumi na ponsi beji tsibibuku abimasialulu mu mapa meni maranu.

¹⁴Batu beni banolaba yimaga ayi Jesus amavaga bamavosa rie: Ngensa agugu avu Mubiyitsi agu tumagulu yiri oruga.

¹⁵Jesus anojaba yiri bamaba na matasa umubiatsa kaga amarina wandi pinsa o julu mukongu.

¹⁶Ava tsisiga badukitsi baJesus bamawenda o mugula yiliba.

¹⁷Bamanangama o bota na bamasabuga o disimu dimosi diCapernaum. Pisama mbe jimakesundila na Jesus mbe asakabaduka.

¹⁸Vamagumba mungudi uneni na mibiji mimaviolila.

¹⁹Banoduga kilumetera yiranu vo yisiamunu bamalabila Jesus ukueka ekueki ombu gogu, diwendi rie: ulinga elingi va julu mamba. Botsu bamalaba goma.

²⁰Tumba Jesus amavosa rie: Agu menu, duyalaba goma!

²¹Kabogu bamarond aumunangiga o bota, vana vana bota jimasundila utsiekama va mbura aji bamawendanga.

²²Ava kedi batu bamasiala o disimu dimosi diyiliba; bamajaba yiri bamaba yika bota mosi. Bamajaba wandi yiri Jesus asamanangama o bota na badukitsi bandi, diwendi rie: bamasogama wogu pinsa.

²³Bota tsisusu tsiTiberiade tsimatola bebeli na mbura aji bamalila mapa ama Fumu amabagabila.

²⁴Batu banolaba Jesus na badukitsi bandi basatsi, jogu beni bamanangama o bota tsieni na bamagabuga o Capernaum uyerombaJesus.

²⁵Bamarasuna Jesus o disimu dimosi diyiliba, bamamuwivula rie: Mulonsi temu yi gutsiruyila gunu?

²⁶Jesus amabagabusila rie: Dingensa duitombi mu mbari dumaji mapa na dumagukuru tsiri mu mbari dumalaba bimaga biami.

²⁷Duyasala yika udila biguji abiboli tumba salanu wandi udila abiveyi monyu umutubu. Muana Mutu oduvega bionyi mu mbari amadila musuga ombu Tata.

²⁸Bamamuwivula rie: Yi tuvaga udugusu yisalu yiNsambi?

²⁹Jesus amabagabusila rie: Yisalu yiNsambi yivu uvayila agu jandi amasindiga yitu.

³⁰Bamamuwivula rie: Kabogu yimaga yisusu yi gutulasa yiri tuguvayila yitu? Yi guvaga?

³¹Bataji betu bamaji manna o kumu nana dimasonugulu rie: Jandi amabavega mapa majulu.

³²Jesus amabatsingula rie: Dingensa tsiri Moise agumaduvega mapa majulu tumba la Taji ami oyiduveyi tindi mapa majulu.

³³Mapa amamavegu na Nsambi la jandi oyisunduyili o julu na oyiveyi monyu ombu botsu.

³⁴Bamamuwivula rie: Mulonsi, tuveyi mapa meni.

³⁵Jesus amabatsingula rie: Menu la mapa mamonyu. Jandi oyiruyi ombu gami agogulu nsala, via! Jandi oyipayili yitu agogulu puila, via!

³⁶Tumba adi nyilabi nenu ne dumandaba dugepayili yitu.

³⁷Botsu aba Taji epeyi bokota nami na jandi oyiruyi ombu gami ngomusila va gusu kana.

³⁸Mu mbari nyisamasunduga uyivaga duganu duami tumba duganu dujandi omansindiga.

³⁹Kabogu duganu dujandi omansindiga la dudu rie: Nyiyatsiemusa ne umosi mu botsu aba amapega tumba erondi yiri nyubarambusa botsu mu yilumbu yinsimunina.

⁴⁰Nyiina, duganu duTaji ami la dudu rie: Uotsu oyilabi Muana nomuvayila yitu adili monyu umutubu yiri ava yilumbu yinsimunina nyumurambusa.

⁴¹BaJuif bamatsundanga mu mbari amavosa rie: Menu la mapa amamasunduyila o julu.

⁴²Bamavosanga rie: Jandi tsia Jesus muana Joseph, jandi agu tuijabi nguji na taji andi? Kabogu mu mbari yi evosili rie: Menu nyimasunduyila o julu?

⁴³Jesus amabagabusila rie: Dundanu utsunda.

⁴⁴Mutu agorungula uruga ombu gami pa Taji omansindiga agemusindiyi na nyumurambusa mu yilumbu yinsimunina.

⁴⁵Babiyitsi bamasona mambu memama rie: Botsu bolonsu na Nsambi na uotsu omagulu Taji na omagulu malongi mandi eruyi ombu gami.

⁴⁶Digewendi yiri mutu amalaba Taji, yika jandi agumaruyila ombu Nsambi, aguna amalaba Taji.

⁴⁷Kabogu jabanu rie: Dingensa jandi oyipayili yitu odila monyu umutubu.

⁴⁸Menu la mapa mamonyu.

⁴⁹Bataji benu bamaji manna o kumu tumba bamafu.

⁵⁰Amama la mapa amesunduyili o julu, oyimaji agofu, via.

⁵¹Menu la mapa mamonyu amamasunduyila o julu. Pa mutu eji mapa meni jandi odila monyu umutubu na mapa ama nyumuvega la musonyi ami agu nyuvega ombu botsu yiri bodila monyu.

⁵²Va julu vana baJuif bamatumuna paga na bamawivula rie: Tsie otuveyila musonyi andi uji?

⁵³Jesus amabatsingula rie: Dingensa pa jenu dugoji musonyi uMuana Mutu na pa dugonu malungu mandi dugaa na monyu.

⁵⁴Jandi oyiji musonyi ami na oyinu malungu mami odila monyu umutubu; nyumurambusa mu yilumbu yinsimunina.

⁵⁵Mu mbari musonyi ami uvu yiguji yingensa, malungu mami mavu yinuigu yingensa.

⁵⁶Jandi oyiji musonyi ami na oyinu malungu mami efubini murima nami na menu nyifubini murima nandi.

⁵⁷Taji aguvu monyu amansindiga la dibandu nyimadilila monyu ombu gandi na jandi oyiji musonyi ami odila monyu ombu gami.

⁵⁸Amama la mapa amamasunduyila o julu. Magebagunu na ama bataji benu abamafu kala bamaji. Jandi oyiji mapa memama odila monyu umutubu.

⁵⁹Jesus amavosa mambu memama o Ndagu Yibenguna ava amalonsila o Capernaum.

⁶⁰Badukitsi bandi bapuela banogulu mambu meni bamawivula rie: Anyi orungula ukelisa mambu meni mavura?

⁶¹Jesus anojaba matasa mabadukitsi bandi ava bamatsundilanga monyi amabawivula rie: Monyi medupindisi mirima?

⁶²Pa dulaba Muana Mutu umata emati o ijiburaaji amaleba yika tsie duvosila?

⁶³La Yinyunyi yiNsambi oyiveyi monyu; musonyi ugaa na tsongu. Mambu ama nyimadutsingula mavu maYinyunyi na mamonyu.

⁶⁴Tumba va gari enu vavu bamosi abagaa na yitu. (Vana kala Jesus amajabanga abagomuvayila yitu na amajabanga jandi agumuwakisa.)

⁶⁵La dibandu nyimadutsingulila rie: Mutu agorungula uruga ombu gami pa Nsambi agemusingisi.

⁶⁶Ubanda mu temu eni badukitsi bandi bapuela bamakegusula na basamamuelinganga nandi.

⁶⁷Kabogu Jesus amawivula digumi na babeji rie: Jenu wenu duirondi ugusuga?

⁶⁸Simon Pierre amamuwivula rie: Ombu nyi tuwenda? Ndeʼ guna mambu mamonyu umutubu.

⁶⁹Tumavaga yitu na tumajaba yiri ndeju la Christ agumaruyila ombu Nsambi.

⁷⁰Jesus amabawivula rie: Nyisamasola digumi na babeji? Ne nana umosi va gari enu ana yinyunyi yibi!

⁷¹Amavosa mu diambu diJudas muana dibaala uSimon Iscariote. Mu mbari diuleba amaba umosi va gari digumi na babeji Judas amamuwakisa ombu batu abamamuvina.