Read Punu Jean 8 Bible Online

Jean 8 - Punu bible

Jean 8

¹Jesus amagabuga o julu mukongu umiOlive.

²Tumba kedi jineni amavindama na amamuekota o Ndagu Nsambi. Puela batu bamamueruga ombu gandi kabogu anotsana amabalonsa.

³Mbana basonitsi na baJuif abamaba baPharisie bamabega mugetu agumatsukugu ava evayili bumbembu. Bamamupalisa va gari batu na

⁴bamatsingula Jesus rie: Mugetu egugu atsitsukugu ava evayili bumbembu.

⁵Mu mugaga uMoise amatuvega musuga yiri munongu mugetu egugu aboku na mamanyi. Kabogu ndeʼ yi guivosi?

⁶Bamavosa nana umuweliga yiri bomufuengilila. Tumba Jesus amabandama, amasona va tsi na mulembu andi.

⁷Ava bamamuwivulila na yindandi jandi amasimbuga na amabatsingula rie: Jandi agusakavaga disumu atindi dimanyi ditega.

⁸Amamuebandama na amasona va tsi.

⁹Ava bamagululu dionyi bamagusuga umoʼ umosi ubanda na bivunda te na bangebi. Jesus amasiala pinsa na mugetu.

¹⁰Anomuesimbuga amalaba mugetu wandi pinsa. Amamuwivula rie: Mugetu abegufundisi baka? Mutu agaaguvega mbela?

¹¹Amagabusila rie: Nyiina, Mulonsi! Jesus amamutsingula rie: Menu wami ngeguveyi mbela. Wendanga guyamuevaga masumu.]

¹²Jesus amamuevosa nogu rie: Menu la yijalala yibulongu. Jandi oyinduki odila yijalala yimonyu na agolaba pisama.

¹³Mbana baJuif abamaba baPharisie bamawaka rie: Ndeʼ guikesingisila bumbeji; bumbeji buagu bugaa na tsongu.

¹⁴Jesus amabagabusila rie: Ne nana nyikesingisila bumbeji, buvu bungensa mu mbari nyijabi agu nyimarugasana na agu nyiwendi tumba jenu dugejabi agu nyiruyi vo agu nyiwendi.

¹⁵Duitabuli bunsonsi nana bansonsi benu betabulili; menu ngetabulili mutu bunsonsi.

¹⁶Ne pa nyutabula bunsonsi, bunsonsi buami buvu buboti mu mbari ngaa pinsa. Taji ami omansindiga aji nami.

¹⁷Dimasonugu mu migaga mienu yiri bumbeji bubatu babeji buvu na tsongu;

¹⁸nyikesingisila bumbeji na Taji omansindiga ensingisili bumbeji.

¹⁹Kabogu bamamuwivula rie: Taji agu aka? Jesus amabagabusila rie: Jenu dugenjabi yika tsie dujabila Taji ami? Mbe duinjabi mbe dujaba Taji ami wandi.

²⁰Jesus amavosa mambu meni ava amalonsila o Ndagu Nsambi va mbura ajimaba yisuegulu yipagu. Mutu asamamugaanga mu mbari diweru diandi mbe disakatola.

²¹Jesus amamuebatsingula rie: Nyiwendi na dutomba na dufu mu masumu menu; dugorungula uruga agu nyiwendi.

²²BaJuif bamawivusana mu dionyi rie: Jandi okeboka mu mbari evosi rie: Dugorungula uruga agu nyiwendi?

²³Amabatsingula rie: Duji bisi tsi; menu nyiji muisi julu. Duji aba bulongu buebubu; menu ngaa agu bulongu buebubu.

²⁴La dibandu nsidutsingulila yiri dufu mu masumu menu. Diwendi rie: dufu mu masumu menu pa dugepayili yitu yiri menu nyivu.

²⁵Bamamuwivula rie: Ndeju la qyi? Jesus amabagabusila rie: Adina nyimadutsingula kala.

²⁶Nyina mambu mapuela udutabulila bunsonsi tumba omansindiga avu ngensa na ama nyimagulu nandi nyimadendulili batu.

²⁷Basamajaba yiri evosi mu diambu diTaji.

²⁸Kabogu Jesus amabatsingula rie: Yiotsu ayi dulabila yiri Muana Mutu avu muneni mbana dujaba agu menu nyivu na dujaba yiri ngekevayila ne diambu dimosi tumba nyivayi yika adi Taji amandonsa.

²⁹Omansindiga aji nami; asamansila pinsa mu mbari nyivayingi amemulasi ubueji temu tsiotsu.

³⁰Ava Jesus amavosila nana bapuela bamamuvayila yitu.

³¹Jesus amavosa na baJuif abamamuvayila yitu rie: Pa duikelisi mambu mami duji badukitsi bami bangensa;

³²dujaba ngensa na mu jionyi dujegusulu.

³³Bamamugabusila rie: Jetu tuji bategula baAbraham na tusamaleba baviga; tsie guivosili rie: Jenu dujegusu?

³⁴Jesus amabavindiyila rie: Dingensa nyidutsinguli yiri uotsu oyivayi masumu aji muviga umasumu.

³⁵Muviga agaa muviga ufumu andi mutubu tumba muana onengulyngu na diina ditaji andi mutubu.

³⁶Kabogu pa Muana amadujeyisa ngensa dumajegusu.

³⁷Nyijabi yiri duji bategula baAbraham. Ne nana duirondi umboka mu mbari dugesingi mambu mami.

³⁸Nyivosi adi nyimalaba ombu Tata; jenu duivayi ama dumalonsu na taji enu.

³⁹Bamamugabusila rie: Taji etu tsiri Abraham? Jesus amabagabusila rie: Mbe duji baana baAbraham mbe dusala bisalu biAbraham.

⁴⁰Nyisamavaga disusu yika udutsingula ngensa aji nyimagulu ombu Nsambi tumba namunyi duirondi umboka.

⁴¹Abraham amavaga nana? Duisali bisalu bibataji benu. Bamamutsingula rie: Jetu tugaa baana babutsuari. Tuna taji mosi buandi, Nsambi.

⁴²Jesus amabatsingula rie: Mbe Nsambi aji Taji enu mbe dumatonda mu mbari nyimasindugu nandi.

⁴³Dibandu yi dugegululu malongi mami? Tsiri mu mbari dugorungula usinga malongi meni?

⁴⁴Duji baana badiabu na duirondi uvaga durondu duandi. Ubanda vadibandu aji yikongu. Asakavosa ngensa mu mbari ngensa jigaa nandi. Ava efurili evosi tindi mbembu andi mu mbari mufuritsi avu na avu taji bafuritsi.

⁴⁵Menu nyivosi ngensa na dugepayili yitu.

⁴⁶Anyi va gari enu ombelisa mu diambu dimasumu? Pa nyivosi ngensa dibandu yi dugepayili yitu?

⁴⁷Jandi ojivu mutu Nsambi egulu mambu maNsambi; jenu dugegulu mu mbari dugaa aba Nsambi.

⁴⁸BaJuif bamamuwivula rie: Jetu tugaa na musuga uvosa yiri guji muisi Samarie na guna yinyunyi yibi?

⁴⁹Jesus amavosa rie: Ngaa na yinyunyi yibi tumba nyiyitsi Taji ami na duibusi ukitsa.

⁵⁰Ngekerombila bundumba. Va mutu umosi aguibutombili na aguvu nsonsi.

⁵¹Nyidutsinguli rie: Dingensa pa mutu ekelisi mambu mami jandi guna agofu, via!

⁵²BaJuif bamamutsingula rie: Namunyi tuijabi yiri guna yinyunyi yibi. Abraham amafu kala na babiyitsi wandi na ndeʼ guivosi rie: Pa mutu ekelisi mambu mami agofu, via!

⁵³Taji etu Abraham amafu; guimuviolili buneni? Babiyitsi wandi bamafu. Yi yivu nagu?

⁵⁴Jesus amagabusila rie: Pa nyikedodisa bundumba buami bugaa na tsongu. Oyipeyi bundumba la Taji ami; jandi agu jenu duivosi yiri aji Nsambi enu,

⁵⁵dugemujabi tumba menu nyimujabi. Pa nyuvosa yiri ngemujabi nyubagunu nenu noba mufuritsi. Tumba nyimujabi na nyikelisi mambu mandi.

⁵⁶Taji enu Abraham amalaba nsangu ava amatasila ulaba temu ami; amajilaba na nsangu.

⁵⁷BaJuif bamamutsingula rie: Ndeʼ gusakaba na magumaranu mabilima na gumalaba Abraham?

⁵⁸Jesus amabatsingula rie: Dingensa ne Abraham akaburu menu nyimaba nana nyivu.

⁵⁹Bamabola mamanyi umutindila tumba Jesus amasuema na amapala o Ndagu Nsambi.