Read Punu Jean 9 Bible Online

Jean 9 - Punu bible

Jean 9

¹Ava Jesus amavioyilanga amalaba mutu agumaburu yidunga.

²Badukitsi bandi bamamuwivula rie: Mulonsi anyi amavaga masumu: dibaala diedidi vo taji andi na nguji andi? Dibandu yi amaburulu yidunga?

³Jesus amabagabusila rie: Budunga buandi bugeruyili mu diambu dimasumu mandi nesi mataji andi vo manguji andi. Aji yidunga yiri mangolu maNsambi molabana.

⁴Ava wisi ukivu nyanga vengu nyusala bisalu bijandi omansindiga; pisama jiruyi na mutu agorungula usala o tsi pisama.

⁵Ava nyikivu mu bulongu nyiji yijalala yibulongu.

⁶Anomana uvosa nana amafuta mateji va tsi na amavaga dirobu na mateji mandi mbana amasinga dirobu dieni mu misu mayidunga.

⁷Amamusindiga rie: Wenda yesusa misu o yileka yiSiloe (divindugulu diSiloe rie: usindiga). Yidunga amawenda guna uyesusa misu ava amagabusila amalaba yiri elabi buranga.

⁸Bambatsi bandi na jogu abamalemujaba ava amavondilanga bamawivula rie: Tsia jandi aguitsivondanga?

⁹Bamosi bamavosanga rie: Jandi! Basusu rie: Nesi, tumba ebagunu nandi. Jaʼ beni amavosa rie: La menu!

¹⁰Kabogu bamamuwivula rie: Tsie misu magu matsitiemunina?

¹¹Amabagabusila rie: Dibaala adi benengili Jesus atsivaga dirobu, atsisinga mu misu mami na atsinsindiga rie: Wenda o yileka yiSiloe, susa misu. Nsiwenda na nsimasusa na nyimalaba.

¹²Bamamuwivula rie: Dibaala dieni agunyi avu? Amabagabusila rie: Ngejabi.

¹³Bamabega agumaba yidunga ombu baJuif abamaba baPharisie.

¹⁴Kabogu mu yilumbu yitsona Jesus amavayila dirobu na amamutiemusila.

¹⁵La dibandu baPharisie bamamuewivulila dibaala nana amalabila. Amabagabusila rie: Jandi atsinsinga dirobu mu misu na nsimasusa na nyimalaba.

¹⁶BaPharisie bamosi bamavosa rie: Mutu eni ageruyili ombu Nsambi mu mbari agekelisi tsona. Basusu bamawivula rie: Tsie muvayitsi masumu orungulila uvaga munongu bimaga bieni? Vamaba dugabu va gari ogu.

¹⁷BaPharisie bamamuewivula agumabeluga rie: Ndeʼ tsie guivosili mu adi jandi atsigutiemusila misu. Jandi amabagabusila rie: Aji mubiyitsi!

¹⁸BaJuif basamavaga yitu yiri jandi amaleba yidunga na yiri amalaba te na bamanengila taji andi na nguji.

¹⁹Bamabawivula rie: Agugu muana enu agu jenu duivosi yiri amaburu yidunga? Kabogu tsie elabili namunyi?

²⁰Taji na nguji bamagabusila rie: Jetu tuijabi yiri aji muana etu na yiri amaburu yidunga

²¹tumba nana elabili namunyi vo anyi atsimutiemusa adina tugejabi. Muwivulianu, jaʼ beni ana bilima biwelimina uvosa adivu nandi.

²²Taji andi na nguji bamawagula nana mu mbari bamaduma baJuif. BaJuif bamatabula diambu kala yiri pa mutu esingi yiri Jesus aji Christ opalusu o Ndagu Nsambi.

²³La dibandu taji andi na nguji bamavosila rie: Ana bilima biwelimina, muwivulianu.

²⁴BaPharisie bamamuenengila dibaala adimaba yidunga. Bamamuruma rie: Levati! Jetu tuijabi yiri dibaala dieni aji muvayitsi masumu.

²⁵Amabagabusila rie: Pa jandi aji muvayitsi masumu menu ngedijabi; nyijabi diambu dimosi buandi: nyibetsi yidunga na namunyi nyilabi.

²⁶Bamamuwivula rie: Yi atsiguvaga? Tsie atsigutiemusila?

²⁷Amabagabusila rie: Mbe nyimadutsingula dionyi tumba dugaagulu, dibandu yi duirondili umuedigulu? Jenu wenu duirondi uba badukitsi bandi?

²⁸Bamamusienga na bamavosa rie: Ndeʼ guvu mudukitsi andi! Jetu tuvu badukitsi baMoise.

²⁹Jetu tuijabi yiri Nsambi amavosanga na Moise tumba jandi guna tugejabi ne agu eruyisini.

³⁰Dibaala dieni amabagabusila rie: Ka muna diambu di! Dingensa dugejabi agu eruyisini jandi agumatiemusa?

³¹Jetu tuijabi yiri Nsambi agegulu bavayitsi bamasumu tumba pa tuimuyitsi ne pa tuivayi duganu duandi tugulunu nandi.

³²Ubanda va dibandu tusakagulu yiri mutu amatiemusa mutu agumaburu yidunga.

³³Mbe asamaruyila ombu Nsambi mbe asamarungula udivaga.

³⁴Bamamugabusila rie: Ndeʼ gumaburulu mu masumu, dibandu yi guitulonsili? Mbana bamamupalisa o Ndagu Nsambi.

³⁵Jesus amagulu yiri jogu bamamupalisa o Ndagu Nsambi. Amamurasuna na amamuwivula rie: Ndeʼ guivayili Muana Mutu yitu?

³⁶Jandi amawivula rie: Mulonsi, jandi la nyi? Nyirondi umuvayila yitu!

³⁷Jesus amamuwagula rie: Gumamulaba, la jandi oyivosi nagu.

³⁸Jandi amavosa rie: Fumu nyina yitu. Mbana amagudama va gusu andi.

³⁹Mbana Jesus amavosa rie: Nyimaruga o bulongu buebubu uyibutabulila bunsonsi yiri bidungabilabi na jogu abelabi babi bidunga.

⁴⁰BaPharisie bamosi abamaba nandi banogulu mambu meni bamamuwivula rie: Kabogu guitasi yiri jetu wetu tuji bidunga?

⁴¹Jesus amabagabusila rie: Mbe duji bidunga mbe dugaa na mbela tumba duivosi rie: Tuilabi. La dibandu mbela enu jivu nenu te na namunyi.