Read Punu Bisalu Bibilumbi 1 Bible Online

Bisalu Bibilumbi 1 - Punu bible

Bisalu Bibilumbi 1

¹Ombu Theophile, Mu dibuku diami aditega nyimasona mambu motsu ama Jesus amavaganga na amalonsanga ubanda va dibandu

²te na yilumbu ayi amamatusulu. Muna yilumbu yieni na mangolu maYinyunyi yiNsambi amavega bisalu ombu bilumbi abi amasola.

³Jandi anofu amarambuga na amakelasa ombu gogu magumana mabilumbu. Amabalasanga bilimba bipuela na amavosanga mambu maDurumu duNsambi.

⁴Ava bamabila va mosi va tavula amabatsingula rie: Duyagusuga va Jerusalem tumba vivanganu pangini aji Taji amavangana nenu, diwendi rie: pegulu atsi nyimadulonsa.

⁵Dingensa yiri Jean amabatisanga na mamba tumba namapapa dubatusungu na Yinyunyi yiNsambi.

⁶Mbana bilumbi bimamuwivula rie: Fumu, je la mu temu ejiji gumuevayila Israel bulongu?

⁷Jesus amabagabusila rie: Tsiri diambu dienu ujaba diweru adi Tata olasila mangolu mandi.

⁸Ava Yinyunyi yiNsambi osunduyila ombu genu dudila mangolu na duba bambeji bami o Jerusalem te no Judee jiotsu te no Samarie nesi te no malongu motsu.

⁹Jesus anomana uvosa nana ava bamamugengililanga amamatusu o julu na dimungi dimamutsiemusa va misu mogu.

¹⁰Mbana diweru dieni bamagengila o julu na bamalaba Jesus umata emati; sundila babaala babeji abamaduara biduaru bivema bamalabana nogu.

¹¹Bamabawivula rie: Jenu bisi Galilee dibandu yi duisikimini ugengila o julu? Jesus eni agutsimatusulu va misu menu omueruga munongu mosi nana atsiwendila.

¹²Bilumbi bimagabuga o Jerusalem. Bamarambuyila o mukongu umiOlive, agugaa vala na Jerusalem.

¹³Banotola bamakota o yibuku yindagu ayi bamatsaninanga na kala. Abamaba o ndagu, miina mogu amama: Pierre na Jean na Jacques na Andre na Philippe na Thomas na Barthelemy na Matthieu na Jacques muana uAlphee na Simon (agumarondanga bulongu buandi puela) na Jude muana uJacques.

¹⁴Botsu bamabenguna va mosi; jogu na bagetu bamosi na Marie nguji Jesus na baana banguji bandi uyenasambilanga na yikanana.

¹⁵Mu bilumbu bieni Pierre amarelama va gari baana baTaji bandi, durangu dubatu abamabenguna dumaba bebeli na kama na magumabeji, amavosa nogu rie:

¹⁶Merianu, vengu Bisonu biudugusu abi David amalebiga mu mangolu maYinyunyi yiNsambi mu diambu diJudas omaba mulonsi nsila ombu jogu abamagaanga Jesus.

¹⁷Jandi amaleba netu na amasala yisalu yimosi netu.

¹⁸(Dibaala dieni amasumba yiasi yimusiru na futa jidibi diandi, vana mbura eni amabonduga, amapasiga va gari na bigari biandi biotsu bimapala.

¹⁹Diambu dimajabunu buranga na bisi Jerusalem botsu la dibandu mu mbembu ogu musiru eni uinengulungu Hadeldama, diwendi rie: musiru umalungu.)

²⁰Kabogu dimasonugu mu dibuku dinyimbu rie: Milaku miogu miusiala mududu na mutu ayatsana muna, via! Na rie: Mutu susu avingi va mbura andi.

²¹Kabogu tusola umosi va gari jogu abamawendanga netu

²²ubanda va temu aji Fumu Jesus amabatusulu na Jean te na yilumbu ayi jandi amamatusulu va gari etu. Tusolianu umosi agusobana netu uba mbeji jidurambugu duandi.

²³Bamalesola babeji, miina mogu: Joseph Barsabbas Justus na Matthias.

²⁴Mbana jogu bamasambila dusambu duedudu rie: Fumu, guijabi mirima mibotsu, tulonsi mutu agu ndeʼ beni gumasola va gari jogu babeji.

²⁵Mbana obonga yisalu na bulumbi buJudas abu amabusa ava mbe asakawendila o mbura andi.

²⁶Bamabuaga mbanda na mbanda jimagaanga Matthias; jandi amasobana na digumi na yilumbi yimosi.