Read Punu Bisalu Bibilumbi 10 Bible Online

Bisalu Bibilumbi 10 - Punu bible

Bisalu Bibilumbi 10

¹O Cesaree umaba dibaala diina diandi Corneille. Amaba yivunda yikama bagora mu dibuli adimanengulu dibuli diltalie.

²Amaba mutu usunda; jandi na bisi ndagu andi botsu bamayitsanga Nsambi. Amawamusanga bijaga temu tsiotsu na amasaihbilanga Nsambi.

³Yilumbu yimosi ava murekumunu amalaba yiriariamu na muna yionyi yiansa yiNsambi yimalabana nandi nomunengila rie: Corneille!

⁴Anomugengila yisuisu amagaangu na goma na amawivula rie: Aguna nyi Fumu? Yiansa yieni yimamutsingula rie: Tsambu tsiagu na maboti magu bimasingu na Nsambi na egurangimini.

⁵Sindiga batu o Joppe na nengila Simon ajinengulungu Pierre.

⁶Etsani ombu Simon ngela bibanda, ndagu andi jivu bebeli na mubu.

⁷Yiansa yinowenda, Corneille amanengila basalitsi bandi babeji na gora mosi ajimaba mutu usunda.

⁸Anomana ubatsingula motsu amabasindiga o Joppe.

⁹Kabogu muna kedi bamasogama na midi mbe jisakatola bamatola o Joppe. Muna diweru dieni Pierre amamata o julu muansa uyesambila.

¹⁰Anogaangu na nsala jineni amaronda uji. Mu temu aji bamamulambilanga biguji amalaba yiriariamu.

¹¹Amalaba julu jimadibuga na amalaba nderi tsanda jine ni, jitungu kodu tsiotsu, jimasunduga va tsi.

¹²Muna mumaba minongu miotsu mibibulu na bilandila na batsoli.

¹³Amagulu diufi adimamuruma rie: Pierre relama, biboki, gukaji!

¹⁴Tumba Pierre amavosa rie: Nesi Fumu, na kala nyisakaji ayimakandusu vo yimuinsi.

¹⁵Amamuegulu diufi adimavosa nandi rie: Ayi Nsambi amaliomisa guyayigengila nderi yivu muinsi.

¹⁶Amadigulu kumbu yirieru mbana tsanda eni jimagabuga o julu.

¹⁷Ava amayitasilanga babaala abamasindugu na Corneille bamapala.

¹⁸Banolonsu ndagu Simon bamatola guna na bamawivula yeri Simon Pierre etsani o ndagu eni.

¹⁹Pierre mbe akikelula yiriariamu yieni, Yinyunyi yiNsambi amamutsingularie: Laba batu barieru begurombi.

²⁰Relama, wenda nogu na guyatumuna paga mu mbari bamasindugu nami.

²¹Kabogu Pierre anosunduga amatsingula batu beni rie: Meʼ janduʼgu, dibandu yi dutsiruyila?

²²Bamawagula rie: Tuiruyisini ombu Corneille. Jandi aji yivunda yibagora na aji mutu usunda na elabi Nsambi goma, tsiri yika jetu atuivosi dionyi tumba na baJuif bemusingisili bumbeji. Yiansa yiNsambi yimalabana nandi na yimamutsingula rie: Nengila Simon Pierre yiri gugulu malongi mandi.

²³Kabogu Pierre amabalatsa. Ava kedi jogu botsu bamayenawenda, bisi Joppe bamosi bamafubana nsila nogu.

²⁴Ne bakatola o Cesaree, Corneille amanengila bibum biandi na bambatsi bandi bamurima na abamabavivanga.

²⁵Mbe Pierre asakakota o ndagu Corneille amabenguna nandi na amagudama va gusu andi.

²⁶Tumba Pierre amamuretsiga novosa rie: Relama, menu ngaa Nsambi.

²⁷Ava bamavosilanga bamakota na Pierre amarasuna batu bapuela bemuvivi.

²⁸Amabatsingula rie: Jenu duijabi yiri jetu baJuif tugaa na musuga uba na dinonga na abagaa baJuif, tugekoti nesi o mandagu mogu. Tumba Nsambi amandonsa rie: Vagaa mutu aguvu muinsi vo nsoruru.

²⁹La dibandu nsiruyila tsiri utumuna paga, dibandu yi dutsindengilila?

³⁰Corneille amavosa rie: Namunyi tuka bilumbu biriem, nyimasambilanga o ndagu ami mu diweru diedidi na nyimalaba mutu aduara biduaru bisiema.

³¹Amavosa nami rie: Corneille, tsambu tsiagu tsimagulunu; na Nsambi amarangimina miensili miagu.

³²Kabogu sindiga batu o Joppe uyenengila Simon ajinengulu Pierre; jandi esilimi o ndagu Simon ngela bibanda o yiari yimubu.

³³La dibandu nsisindiyila batu ombu gagu, diboti yiri gutsiruga. Kabogu jetu tuʼ jogu ba, tuirondi ugulu adi Nsambi otutsingula.

³⁴Mbana Pierre amavosa rie: Kabogu ngensa Nsambi agaa na dupasu dubatu.

³⁵Elabi ubueji na mutu uotsu oyimudumi na oyivayi amavu mawelimina.

³⁶Labanu, amavega Mambu mandi ombu baIsrael na Mambu meni mesamuni Musamu Uboti uduvotsu duJesus Christ aguvu Fumu ombu botsu.

³⁷Jenu duijabi batema aji Jean amasamuna na nana mambu mamabila ubandila o Galilee te no Judee jiotsu.

³⁸Jenu dumagulu mambu maJesus muisi Nazareth na duijabi yiri Nsambi amaba nandi la dibandu amawendilanga mbura tsiotsu uyenavaganga maboti noyenabelusanga botsu abamalasu maguga na diabu.

³⁹Jetu tuji bambeji bamambu motsu ama jandi amavaga o Judee te no Jerusalem.

⁴⁰Bamamugomina va kurusu avana amabokulu. Tumba Nsambi amamurambusa mu yilumbu ayimurieru na amamuvega musuga ukelasa ombu batu.

⁴¹Asamalabana ombu batu botsu yika ombu jetu atumasolu na Nsambi uba bambeji. Nsambi anomurambusa o dufu jetu tumaji na tumanu nandi.

⁴²Amatusindiga ulonsa batu nosingisila bumbeji bujandi agumasolu na Nsambi utabulila abavu monyu na abamafu bunsonsi.

⁴³Babiyitsi botsu bemusingisili bumbeji buebubu rie: Uotsu oyimuvayili yitu otandu na mangolu madiina diandi.

⁴⁴Mbe Pierre akivosa mambu meni Yinyunyi yiNsambi amasunduga ombu botsu abamaba vana.

⁴⁵BaJuif botsu abamarugasana o Joppe na Pierre bamakambulu ava bamagululu yiri Nsambi amavega pegulu jiYinyunyi yiandi ombu abagaa baJuif wandi.

⁴⁶Mu mbari botsu bamavosanga mambembu mangana ava bamayitsilanga Nsambi. Mbana Pierre amavosa rie:

⁴⁷Labanu jogu bamadila Yinyunyi yiNsambi nana tumamudililanu. Tsie tubagandisa ubatusu na mamba?

⁴⁸Amaruma yiri babatusu mu diina diJesus Christ. Bamamuwivula utsana nogu mua bilumbu.