Read Punu Bisalu Bibilumbi 12 Bible Online

Bisalu Bibilumbi 12 - Punu bible

Bisalu Bibilumbi 12

¹Kaga Herode amalasa bisi dibundu maguga na

²amaruma yiri Jacques aboku na dijenga, diwendi rie: Jacques eni amaba muana nguji Jean.

³Anolaba yiri baJuif bamalaba ubueji amaruma yiri ususu alasu maguga; kabogu Pierre amagaangu. (Dimaba mu temu feta jimapa magambu na dufunusu.)

⁴Kabogu Herode amamukotisa o tsugu te na feta Paque jiuvioga. Amakelusu na mabuli mana mabagora, dibuli dibuli dimaba na gora jina.

⁵Mu diambu dieni bisi dibundu bamakevega usambilanga.

⁶Mukolu mosi Herode mbe asakadila temu uvosa diambu, Pierre amaba atungu na bapanga na amawenda yilu va gari bagora babeji. Bagora basusu abamakelisanga tsugu bamaba va gusu kana.

⁷Yiansa yiFumu yimasundila ulabana na tsugu jiotsu jimaba yika yijalala veli! Yiansa yieni yimakungisa Pierre novosa rie: Rambuga, lensa norelama! Vana vana bapanga bandi bamanyanguga.

⁸Mbana yiansa yimamutsingula rie: Warisa tsanda na duara bapondu. Anomana uduara yiansa yieni yimabuela rie: Duara na yijungi. Tʼwendi!

⁹Pierre amamuduka tumba ne nana amalaba nderi ndosi edori.

¹⁰Banovioga bakelisi abatega na bamubeji, bamatola o diguyi dibudilu dimusiengi. Dunasundila udibuga na bamapala. Banosupuga o nsila yiansa yimasila Pierre.

¹¹Pierre anotsagumuga amavosa rie: Mbana nyimalaba yiri dingensa Fumu atsisindiga yiansa yiandi, mangolu maHerode na mabaJuif mamasuka.

¹²Kabogu amawenda o ndagu Marie nguji Jean Marc, o batu bapuela bamasambilanga.

¹³Amadukisa na musalitsi umugetu, diina diandi Rhode, amawagula.

¹⁴Anogulu diufi diPierre amalaba nsangu jineni. Asamaledibula diguyi tumba amawenda mbangu na amavosa rie: Pierre aji va gusu kana.

¹⁵Bamavosa rie: Ufura guifuri. Tumba jandi rie: Dingensa aji vana. Jogu rie: Tsiri jandi, yiansa yiandi.

¹⁶Tumba Pierre amadukisanga, kabogu bamadibuia diguyi. Banomulaba bamakambulu puela.

¹⁷Pierre amabavotsa na amabatsingula nana Fumu amamupalisila o tsugu. Mbana mbe asakabasila amavosa rie: Tsingulanu misamu miami ombu Jacques nombu baana bataji basusu. Mbana amabaganina na amayenawenda.

¹⁸Wisi unotebuga bagora bamakambulu puela, jogu rie: Pierre aka?

¹⁹Herode jaʼ beni amabanda umuromba, anolaba yiri amarina amaruma yiri bagora baboku. Mbana Herode amagusuga o Judee uyetsana o Cesaree.

²⁰Herode amaba na kabu jineni na bisi Tyr na bisi Sidon; kabogu bamawenda ombu gandi uyemulenda. Bamalelenda Blastus, jandi amakelisanga bima biotsu bindagu kaga. Mbana bamawivula Herode duvotsu mu mbari bamadila biguji o yiari yiandi.

²¹Yilumbu ayimavangunu Herode amaduara biduaru biandi bibukaga na amatsana va yitsiga yiandi yibufumu va gusu batu botsu uyemoga nogu.

²²Batu bamalaba ubueji na bamagamuganga rie: Adidi diufi diNsambi, tisri diufi dimutu!

²³Vana vana yiansa yiFumu yimamudimba buali buusuranga na amakutu na bayinyi na amafu mu mbari amabonga diduma diNsambi.

²⁴Mambu maNsambi mamaviolila unyava.

²⁵Barnabas na Saul banotolisa mutindu bamagabusila o Jerusalem na Jean Marc amawenda nogu.