Read Punu Bisalu Bibilumbi 13 Bible Online

Bisalu Bibilumbi 13 - Punu bible

Bisalu Bibilumbi 13

¹Mu dibundu diAntioche mumaba babiyitsi na milonsi: Barnabas na Simeon (ajinengulungu upinda) na Lucius (muisi Cyrene) na Manaen (agumabanguyila o ndagu Herode, yivunda yibulongu) na Saul.

²Ava jogu bamasambililanga Fumu nobusa uji, Yinyunyi yiNsambi amavosa nogu rie: Dundanu Barnabas na Saul yiri bosala yisalu ayi nyimabanengilila.

³Banomana temu jiubusa uji nosambila bamabasakiga miogu na bamabaganina.

⁴Barnabas na Saul banosindugu na Yinyunyi yiNsambi, bamawenda o Seleucie na aguna bamasabuga o nyingi Chypre.

⁵Banotola o Salamine bamalonsa Mambu maNsambi o Mandagu maBibenguna bibaJuif. Jean Marc amayenabawamusanga.

⁶Bamananga nyingi eni te no Paphos, aguna bamabenguna na muvanditsi, diina diandi BarJesus.

⁷Amaba mbatsi jineni na murumitsi unyingi, diina diandi Sergius Paulus omaba mutu diela. Murumitsi eni amanengila Barnabas na Saul mu mbari amaronda ugulu Mambu maNsambi.

⁸Tumba Elymas, muvanditsi (adina dimaba diina diandi mu Grec) amabalasa maguga na amagubitsa murumitsi yiri akevayila Jesus yitu.

⁹Mbana Saul, ajinengulungu Paul agumabasu na Yinyunyi yiNsambi amagengila muvanditsi yisuisu

¹⁰na amamunyangila rie: Guji muana diabu. Guji muvinitsi ubatu botsu baboti! Guna mavanda mapuela amedunsi batu! Guibivisi mambu mangensa, tindi ubivisa.

¹¹Gulaba, Fumu ogukilisa na guba yidunga, yitsingu yineni gugomuelaba. Vana vana Elymas amalaba yika pisama na pisama na amayenabembatananga.

¹²Mu dionyi murumitsi amavayila Fumu yitu mu mbari jaʼ beni amalaba adimavagu na amakambulu ugulu malongi maFumu.

¹³Paul na bambatsi bandi bamawenda o Paphos te no Perge mu Pamphylie. Jean Marc amakakana nogu, amayenagabusila o Jerusalem.

¹⁴Bamarambuyila o Perge na banotola o Antioche o Pisidie; yilumbu yitsona bamakota o Ndagu Yibenguna.

¹⁵Banomana uranga migaga miMoise na malongi mababiyitsi, bivunda biNdagu Yibenguna bamabatsingula rie: Pa duna mua diambu ulubusa batu, ka vosanu!

¹⁶Paul amarelama na anobavotsa amavosa rie: Guluanu jenu baIsrael na jenu aduidumi Nsambi!

¹⁷Nsambi jibatu baIsrael amasola bataji betu na amabavega diduma ne baki baviga babisi Egypte. Mbana amabapalisa o bulongu bueni.

¹⁸Va julu vana amabakelisa magumana mabilima o kumu.

¹⁹Amabunga yisambuali yimalongu o yiari yiCanaan mbana amabavega buogu bulongu guna.

²⁰Aguna bamatsananga te na kama jina na magumaranu mabilima. Amabavega bansonsi te na Samuel jimubiyitsi.

²¹Mbana baIsrael bamaronda urumu yika na kaga. Kabogu Nsambi amabavega Saul muana uKis mu yifumba yiBenjamin, amabarumanga te na magumana mabilima.

²²Nsambi anomubusa amabavinsila David uba kaga ogu. Nsambi amasingisila bumbeji buebubu rie: David muana Jesse aji munongu dibaala adi nyirondi na erondi udugusu kanu tsiami tsiotsu.

²³Jesus la mutegula uDavid agu Nsambi amasola uba Mugobutsi ubaIsrael nana amavanginina nogu.

²⁴Mbe Jesus asakaruga Jean amalonsanga batu baIsrael yiri bakaluli diela nobatusu.

²⁵Ava yisalu yiandi yimabila bebeli nosuka amabawivula rie: Menu la nyi? Menu tsiri jandi agu duivivi! Jabanu yiri oyiruyi epiolili mangolu na menu nyisawelimina unyangula mikudu mibapondu bandi.

²⁶Guluanu, jenu aduvu mu yifumba yiAbraham na jenu aduidumi Nsambi, la ombu genu musamu eni udugobutsu umatindu.

²⁷Mu mbari batu abamatsananga o Jerusalem nesi bivunda biogu basamajaba yiri jandi avu Jesus na basamatsiyisa malongi mababiyitsi amamarangungu tsona na tsona. Ne nana ava bamamufundisila bamadugusu amamabigu na babiyitsi.

²⁸Diuleba yiri basamalaba diambu diwelimina yiri oboku bamawivula Pilate umubokisa.

²⁹Motsu masusu manodugusu bamamugusula va kurusu na bamamutsiga.

³⁰Tumba Nsambi amamurambusa o dufu

³¹na mua bilumbu binovioga amalabana ombu jogu abamalinganga nandi ubongila o Galilee te no Jerusalem. Jogu baji bambeji ombu baIsrael te na namunyi.

³²Kabogu jetu tuidusamunini Musamu Uboti upangini aji Nsambi amavangana na bataji betu.

³³Nsambi amadugusu pangini eni ombu jetu atuvu bategula bogu ava amarambusila Jesus o dufu. Dimasonu wandi mu nyimbu tsimubeji rie: Guji muana ami, namunyi nyimagubura.

³⁴Nsambi amamurambusa o dufu yiri agobola, adina adi jandi amavosa rie: Nyugugabila miula agumavangunu na David; miula miNsambi aguvu ungehsa.

³⁵La dibandu evosili mu bibuku bisusu rie: Ndeju gugogaru yiri mutu agu obola.

³⁶Kabogu David anomana udugusu duganu duNsambi amaru, amatsigu na bataji bandi na amabola.

³⁷Tumba jandi agu Nsambi amarambusa o dufu asamabola.

³⁸Kabogu bambatsi bami, jabanu yiri misamd midutandulu dumasumu mimadusamununu nandi,

³⁹jabanu wandi yiri uotsu aguimuvayili yitu otandu masumu amasamatandu na migaga miMoise.

⁴⁰Kabogu kebananu yiri mbigulu ajimabigu na babiyitsi jigodugaanga. Bamabiga rie:

⁴¹Jenu balensitsi dukambulu tumba ne nana dufu. Nyusala yisalu mu temu enu ayi dugogaru ne pa mutu odulasa yionyi kengili.

⁴²Ava Paul na Barnabas bamapalila o yibenguna batu bamabawivula umueruga tsona ajiuruga nomuebalonsa mambu memama.

⁴³Yibenguna yinosuka baJuif na abagaa baJuif abamagobulu bamabaduka. Paul na Barnabas bamabalonsa na bamabawarisa yiri bayakonda maboti maNsambi.

⁴⁴Tsona eni bisi musiengi bapuela bamagukama ugulu mambu maFumu.

⁴⁵BaJuif banolaba yinombu bamasunda uwava na bamavina motsu ama Paul amavosanga na bamabalasa maguga nobasienganga,

⁴⁶Paul na Barnabas bamabawaka rie: Mambu maNsambi mamaledusamununu tumba dunomabusa kabogu dugomuedila monyu umutiibu; jetu yika ombu abagaa baJuif tuiwendi.

⁴⁷Mu mbari Fumu amaruma rie: Nyimagusola uba yijalala yibulongu, ugobula batu botsu.

⁴⁸Abagaa baJuif bamalaba nsangu ava bamagululu dionyi na bamadodisa Mbembu Fumu. Botsu abamasolu udila monyu umutubu bamajivayila yitu.

⁴⁹Mbembu Fumu jitnanyavanga mu bulongu buotsu.

⁵⁰Tumba baJuif bamabanda dikuana diPaul na Barnabas; bamapupisa batu baneni nesi bivunda bimusiengi na bagetu abamayitsanga Nsambi te na bamabapalisa o yiari yieni.

⁵¹Paul na Barnabas bamabagandila na bamawenda o Iconium.

⁵²Badukitsi abamaba o Antioche bamabasu na nsangu na Yinyunyi yiNsambi.