Read Punu Bisalu Bibilumbi 16 Bible Online

Bisalu Bibilumbi 16 - Punu bible

Bisalu Bibilumbi 16

¹Paul amatola o Derbe na Lystre. Mudukitsi, diina diandi Timothee amatsananga guna; nguji andi amaba muJuif agumavayila Fumu yitu tumba taji andi amaba Grec.

²Baana balaji baLystre na baIconium bamamusingisila bumbeji buboti.

³Paul amaronda yiri Timothee owenda nogu kabogu mu diambu dibaJuif abamaba va mbura eni amamureba mu mbari botsu bamajabanga yiri taji andi amaba Grec.

⁴Bamayenalonsanga te na misiengi miotsu na bamalubusa baana bataji ukelisa migaga amimatabulu na bilumbi na bivunda o Jerusalem.

⁵Yitu yibisi dibundu yimafunanga na bamabuesungu basusu yilumbu na yilumbu.

⁶Bamalinganga te no yiari yiPhrygie na Galatie; Yinyunyi yiNsambi asamagaru yiri bolonsa o yiari yiAsie.

⁷Ava bamatolila o mandilu maMysie bamaronda uwenda o yiari yiBithynie tumba Yinyunyi yiJesus asamagaru.

⁸Kabogu bamavioga kuasa na bamatola o Troas.

⁹Ava mukolu Paul amalaba yiriariamu: muisi Macedoine amalabana nandi na amavosa nandi rie: Ruga o Macedoine utuwamusa!

¹⁰Vana vana tumakunsama uwenda o Macedoine mu mbari tumalaba yiri Nsambi atsitunengila usamuna Musamu Uboti guna.

¹¹Tunogusuga o Troas, tumatunga dikuku uwenda sungingi o Samothrace na ava kedi tumatola o Neapolis.

¹²Tumarambuga vana uwenda o Philippes, musiengi utega udivula diMacedoine na musiengi agumarumu na bisi Rome. Avana tumasilama mua bilumbu.

¹³Yilumbu yitsona tumapala o musiengi na tumawenda o mugula umujamba aguna tumatasa yiri guvu mbura jidusambu jibaJuif. Tumatsana na tumavosanga na bagetu abamaba bagukama.

¹⁴Umosi, diina diandi Lydie agumaba muisi Thyatire, jandi amaba musumbisiti umatsanda maboti mabenga na amasambilanga Nsambi. Amatugulu na Fumu amamuvega murima ugulu notsiyisa ama Paul amalonsa.

¹⁵Amabatusu na bisi ndagu andi wandi. Mbana amatunengila novosa rie: Pa duilabi yiri nyivu mudukitsi uFumu, ruganu o ndagu ami noyetsana. Amatunengila na yisuebiri kabogu tumawenda.

¹⁶Yilumbu yimosi ava tumawendila o mbura aji tuisambilili tumabenguna na muana mugetu. Amaba muviga agumaba na yinyunyi yibi ayimamuveganga mangolu uresa.

¹⁷Ava amaresilanga bafumu bandi bamadilanga mbongu tsipuela. Amatudukanga jetu botsu na Paul na amagamuganga rie: Babaala bebaba baji basalitsi baNsambi aguvu uneni! Bodutsingulanga nana durungulila ugobulu!

¹⁸Amadivosanga te na bilumbu bipuela te na Paul amatoga, amageluga novosa na yinyunyi yibi rie: Mu diina diJesus Christ nyigurumi rie: Pala!

¹⁹Vana vana yinyunyi yibi yimapala. Bafumu bandi banolaba yiri mangolu mandi uresanga mamasuka na yiri bogomuedila mbongu tsieni

²⁰bamagaanga Paul na Silas na bamababega ombu bivunda. Bamavosa na bivunda rie: Babaala bebaba bekungisi musiengi etu.

²¹Belonsi bifu abigaa biwelimina na migaga mietu na jetu bisi Rome tugorungula uduka bifu biogu.

²²Yinombu yimarelama utoga; bivunda bamavula Paul na Silas bikutu na bamaruma bagora ubadimba.

²³Banomana ubadimba mikasa, bamaruma mukelisi tsugu ubabindiga tindi ubindiga.

²⁴Mukelisi tsugu anodila diruma dieni amabakotisa o tsugu o yibuku ayigari, amabatunga bivangu mu makulu.

²⁵Ava gari wisi, Paul na Silas bamasambilanga na bamawimbilanga nyimbu tsiNsambi na bisi tsugu bamabagulungu.

²⁶Vana vana vamaba disisana dineni dibutamba; mu dionyi mabandu matsugu mamapansiga. Muna diweru dieni maguyi matsugu mamadibuga na bapanga babisi tsugu botsu bamatabuga.

²⁷Mukelisi tsugu amarambuga na ava amalabila yiri maguyi mamadibuga amasomuna dijenga diandi na amaronda ukeboka, amatasa yiri bisi tsugu bamarina kala.

²⁸Tumba Paul amagamuga na diufi dineni rie: Guyakeboka, jetu botsu tuji vava.

²⁹Mbana mukelisi tsugu anovonda lambi amakota na masuasu na amakebuaga noregama va gusu Paul na Silas.

³⁰Mbana amabapalisa na amabawivula rie: Kokolu tsienu, yi nyuvaga yiri nyugobulu?

³¹Paul na Silas bamagabusila rie: Vayila Fumu Jesus yitu na ndeʼ gugobulu na bisi ndagu agu wandi.

³²Bamalonsa mambu maFumu ombu gandi nombu bisi ndagu andi wandi.

³³Vana mukolu eni mukelisi tsugu amayesusa mapura mogu; mbana bamabatusu jogu na bisi ndagu andi botsu.

³⁴Mukelisi tsugu anobabega o ndagu andi amabalambila biguji. Jogu na bisi ndagu andi bamalaba nsangu mu mbari bamavayila Nsambi yitu.

³⁵Wisi unotebuga bivunda bamasindiga bagora ombu mukelisi tsugu umutsingula rie: Palisa babaala beni.

³⁶Kabogu mukelisi tsugu amavosa na Paul rie: Bivunda batsitinda yilumbi yiri jenu na Silas dupala. Kabogu tsie palianu na wendanu na buranga.

³⁷Tumba Paul amavosa na bagora rie: Bamatudimba mikasa va gusu batu botsu, jetu atuvu bisi Rome. Basamaletutabulila bunsonsi tumba bamatukotisa o tsugu. Namunyi botupalisa o musuega? Tsatsabi!

³⁸Baruyi jogu beni uyitupalisa. Bagora bamabega mambu meni ombu bivunda abamaregama ava bamagululu yiri baji bisi Rome.

³⁹Bivunda bamawenda mambangu ubalembiyila rie: Kokolu tsienu, palanu na gusuganu vava.

⁴⁰Paul na Silas banopala o tsugu bamawenda o ndagu Lydie. Avana bamabenguna na baana bataji; bamabawarisa mbana bamabaganina.