Read Punu Bisalu Bibilumbi 19 Bible Online

Bisalu Bibilumbi 19 - Punu bible

Bisalu Bibilumbi 19

¹Ava Apollos amabila o Corinthe Paul amalingula biari bisusu mbana amatola o Ephese. Aguna amabenguna na badukitsi bamosi

²na amabawivula rie: Tsie, dumadila Yinyunyi yiNsambi ava dumavayila Fumu yitu? Bamamugabusila rie: Avu Yinyunyi yiNsambi? Jetu tusakagulu dionyi.

³Paul amabawivula rie: Kabogu batema yi dumabatusulu? Bamawagula rie: JiJean!

⁴Paul amabuesa rie: Jean amabatisa abamakalula diela na amalonsa baIsrael yiri bavayili jandi oyiruyi o nsima andi yitu, diwendi rie: Jesus.

⁵Banogulu dionyi bamabatusu mu diina diFumu Jesus.

⁶Mbana Paul amabasakiga miogu na bamabasu na Yinyunyi yiNsambi, bamavosa mambembu masusu na bamabiga.

⁷Vamaba digumi na babaala babeji.

⁸Mbana Paul amawendanga o Ndagu Yibenguna; amamana tsungi yirieru uyenalonsanga na bukidi. Amalonsanga mambu maDurumu duFumu noweliga usungiga abamamugulu.

⁹Bamosi bamagalisa mirima miogu na bamabusa umavayila yitu na bamavongula malongi mandi va gusu mugungi, la dibandu Paul na badukitsi bandi bamagusuyila va gari ogu na amalonsanga bilumbu biotsu o yikola yiTyrannus.

¹⁰Paul amayenalonsanga te na bilima bibeji la dibandu botsu abamatsananga o Asie na baJuif na abagaa baJuif bamagulungu mambu maFumu.

¹¹Nsambi amavega Paul mangolu maneni uvaga bimaga bimunongu na munongu.

¹²Matsanda vo misuari abimabembu nandi bimavegu ombu bibedu yiri bobeluga. Maali mogu na binyunyi bibi bimagusuga.

¹³BaJuif bamosi abamalinganga puela bamaweliga upalisa binyunyi bibi na diina diJesus. Mutu mutu amavosa na binyunyi bibi rie: Nyidurumi upala! Nyidivosi mu diina diJesus adi Paul esamuni!

¹⁴(Abamavosanga nana bamaba yisambuali yibaana bamuvagulitsi upagu agumaba muJuif, diina diandi Sceva.)

¹⁵Tumbayinyunyi yibi yimabawagula rie: Nyijabi Jesus na nyijabi Paul wandi tumba jenu banyi?

¹⁶Mutu agumaba na yinyunyi yibi amabafuangama na amabaviolila jogu botsu; amabalasa maguga maneni te na bamarina na mapenyi na mapura.

¹⁷Bisi Ephese botsu na baJuif na abagaa baJuif bamadigulu; botsu bamalaba goma na bamabanda uduma diina diFumu Jesus.

¹⁸Botsu abamagobulu bamawendanga uyetubula ama bamavaganga va gusu batu.

¹⁹Bavanditsi botsu bamabega mavanda mogu na bamamanyensa va gusu batu botsu. Banotala dufunu dumavanda amamanyensu dumaba magumaranu matosini mambongu tsilora jivema.

²⁰Anana Mbembu Fumu jimanyavila yiari na yiari na jimadodusu na batu.

²¹Mbana Paul amamuegabuga o Jerusalem tumba amaviola adu Macedoine na Achaie. Amavosa rie: Ava nyuwendila guna nyirondi utola te no Rome.

²²Amasindiga bawamusi bandi babeji Timothee na Eraste o Macedoine. Jaʼ beni amasiala mua temu o Asie.

²³Mu temu eni vamaba kimbu jineni mu diambu diMusamu Uboti.

²⁴Mutu, diina diandi Demetrius amasalisa lora jivema uvaga bibagunu bindagu jiArtemis; mu dionyi amadililanga mbongu tsipuela ufuta basalitsi bandi.

²⁵Amabagukiga va mosi na jogu abamaba na yisalu yimosi nogu na amavosa rie: Labatianu, mu yisalu yieyiyi tuidilili monyu.

²⁶Tuigulu nana Paul elonsilingi. Evosi yiri bansambi abamasalu na batu bagaa bansambi. Edili batu bapuela na malongi mandi, tsiri yika vava o Ephese tumba o Asie jiotsu.

²⁷Tukebinianu, namapapa bisalu bietu biubiva na ndagu nsambi jiArtemis jiusiala mududu na mangolu mandi mosuka. Je nsambi ajimayitsungu na batu botsu mu Asie na mu bulongu buotsu jiuba yika kulini?

²⁸Batu banogulu mambu meni bamanyoga kabu jineni na bamagamuga rie: Artemis jibisi Ephese avu muneni!

²⁹Kimbu jimadugunu musiengi uotsu. Bamagaanga Gaius na Aristarque, bisi Macedoine abamalinganga na Paul na bamababega o yibenguna.

³⁰Paul jaʼ beni amaronda uwenda nogu tumba badukitsi bamamugandisa.

³¹Bivunda bimosi biAsie abimaba bambatsi bandi bamamutindila yilumbi rie: Kokolu tsiagu guyawenda o yibenguna.

³²Yiotsu yina yibenguna yimaba yika kulini. Batu bamosi bamagamuga dimosi, basusu disusu mu mbari bapuela basamajaba dibandu yi bamabengunina.

³³Batu bamosi bamatasa yiri Alexandre amabanengila mu mbari baJuif bamamuretsiga va gusu ogu. Kabogu Alexandre amaweliga ubavotsa yiri orungula uvosa.

³⁴Tumba ava bamalabila yiri muJuif avu, botsu bamagamuganga na diufi dimosi rie: Artemis jibisi Ephese avu muneni! Bamagamuganga nana maweru mabeji.

³⁵Mbana musonitsi amavotsa batu. Jandi rie: Guluanu, jenu bisi Ephese. Jetu botsu tuijabi yiri musiengi Ephese uvu mukelisi undagu nsambi jiArtemis na mukehsi wandi uyibagunu yiandi ayimabonduga o julu.

³⁶Vagaa mutu ne umosi agurungula udigala, kabogu volanu nduku na duyamuevosa mambu makulini.

³⁷Dumabega babaala bebaba ne basakadaga yima o mandagu mansambi ne basakavosa dibi mu diambu dinsambi etu.

³⁸Pa Demetrius na basalitsi bandi bana nsala ubafunda vavu bilumbu biwelimina abi bivunda begululu mambu.

³⁹Tumba pa duirondi disusu vengu dunengila batsiga o yibenguna.

⁴⁰Pa tugokebana botufuengilila yiri tutsibanda kimbu. Jetu tugaa na ndunga mu adi tutsivaga namunyi.

⁴¹Anomana uvosa nana amabaganina.