Read Punu Bisalu Bibilumbi 2 Bible Online

Bisalu Bibilumbi 2 - Punu bible

Bisalu Bibilumbi 2

¹Mu yilumbu yiPentecote jogu botsu bamaba bagukama va mbura mosi.

²Vana vana nduku jimaruyila o julu nana nduku mungudi uneni; mu ndagu jiotsu aji bamatsanina jimaba yika nduku na nduku.

³Ndimi atsimabagunu na ndimi tsimuji tsimalabana ombu gogu; tsionyi tsimaba tsigukama mbana tsimakakana na tsimatsana ombu mutu mutu.

⁴Botsu bamabasu na Yinyunyi yiNsambi na bamabanda uvosa mbembu tsisusu nana Yinyunyi yieni amaveyila mutu mutu mangolu uvosa.

⁵O Jerusalem umaba baJuif abamaruyila o malongu motsu abamayitsanga Nsambi.

⁶Nduku jinogulunu yiari na yiari bapuela bamabenguna va mbura eni. Bamaba kumfu jineni mu mbari mutu mutu amagulu bevosi tindi mbembu andi.

⁷Botsu bamakambulu na bamasutu. Bamawivusananga rie: Jogu botsu abevosi nana bagaa bisi Galilee?

⁸Dibandu yi tuigulu yiri bevosi mu mbembu tsietu?

⁹Jetu bisi Parthes na bisi Medie na bisi Elam na abetsani o Mesopotamie na bisi Judee na bisi Cappadoce na bisi Pont

¹⁰na bisi Asie na bisi Phrygie na bisi Pamphylie na bisi Egypte na bisi Libye, bulongu abusungasana na Cyrene; na abamaruyila o Rome

¹¹na abasamaburu baJuif, diwendi rie: abamapalila mu dibundu disusu na bisi Crete na bisi Arabie, tsie tuibagululu bevosi mambu maNsambi mu mbembu tsietu?

¹²Botsu bamakambulu la dibandu bamawivusananga rie: Adina divindugulu yi?

¹³Tumba basusu bamadesanga na bamavosanga rie: Tsiri malangi mavu nogu?

¹⁴Pierre na digumi na umosi bamarelama mbana Pierre amagamuga rie: Merianu: Jenu baJuif na bisi Jerusalem, liganu matuji!

¹⁵Batu bebaba bagaa na malangi nana duitasili. Dugejabi yiri tuki kedi?

¹⁶Tumba ama tuilabi namunyi amana Joel mubiyitsi amalebiga rie:

¹⁷Nsambi evosi rie: Mu bilumbu biusita nyuwitilila batu botsu Yinyunyi yiami; baana benu bababaala na babagetu bobiga; bafudu benu bolabanga biriariamu, binunu bienu bodoranga mandosi.

¹⁸Nyiina, mu bilumbu bieni nyuwitilila basalitsi bami bababaala na babagetu Yinyunyi yiami na bobiga.

¹⁹Nyulasa bimaga o julu na bilimba va butamba: voba malungu na muji na nsumbili.

²⁰Wisi ukaluga pisama na tsungi jiukaluga malungu ne yilumbu yiFumu yikatola. Yilumbu yieni yiuba yineni na yiranga.

²¹Mbana uotsu agunengila diina diFumu ogobulu.

²²BaIsrael, merianu: Nyivosi mu diambu diJesus muisi Nazareth, dibaala adi Nsambi amadujabisa na bimaga na bilimba abi amavaga va gari enu.

²³Mu duganu duNsambi amawakusu ombu genu na dumasinga yiri agomunu va kurusu noboku.

²⁴Tumba Nsambi amamurambusa na amabelisa dufu, diwendi rie: dufu dusamaba na mangolu ombu gandi.

²⁵Mu mbari David amamubiyila rie: Nyimalabanga Fumu va gusu ami temu tsiotsu, ngokungusu mu mbari Fumu avu va mabaala mami.

²⁶La dibandu nyilabilingi nsangu na murima uotsu yika usangila. Ka muna murima usunda gu guvu nami, nesi na udeda udunyuru nyina ditasa

²⁷mu mbari gugogaru yiri mutu agu abi o mbura jiabafu, gugonsingisa ubola o ngila.

²⁸Gumandonsa mansila mamonyu gumambasa na nsangu mbura tsiotsu atsi nyivu.

²⁹Kabogu baana bataji, nyirondi udurangimisa yiri yivunda yietu David amafu na amatsigu na tuilabi ngila andi.

³⁰Kabogu dilabini yiri amaba mubiyitsi agumajaba yiri Nsambi amavangana pangini nandi nojilevila pesi yiri mutegula andi otsana va yitsiga yibufumu buandi.

³¹David amabiga amoba, diwendi rie: amavosa diambu didurambugu duChrist ava amabiyila rie: Agobuagu mu mbura jiabafu, musonyi andi ugobola.

³²La Jesus eni aji Nsambi amarambusa; jetu botsu tuji bambeji.

³³Amamatusu na amatsanusu va mabaala maNsambi agumamuvega Yinyunyi yiandi agumavangunu pangini na motsu ama duilabi nogulu meruyili ombu gandi.

³⁴Dingensa agumamata o julu tsiri David mu mbari jandi amavosa rie: Fumu amavosa na Fumu ami rie: Ndeʼ tsana va mabaala mami

³⁵te na vana nyusunsa bavinitsi bagu o tsi durumu duagu.

³⁶Kabogu baIsrael botsu bajabi buranga yiri jandi agu jenu dumagomina va kurusu, Nsambi amamuvaga Fumu na Christ.

³⁷Banomana ugulu diambu dieni bamaregama na goma na bamawivula Pierre na bilumbi bisusu rie: Baana bataji, tsie tuvayila?

³⁸Pierre amabatsingula rie: Kalulanu diela, batusuanu mu diina diJesus Christ yiri masumu menu modutandu. Mbana dudila pegulu jiNsambi, diwendi rie: Yinyunyi yiandi.

³⁹Pangini ejiji jivu ombu genu nombu baana benu nombu abonengulungu na Fumu Nsambi etu.

⁴⁰Mbana mu mambu masusu mapuela amabalubusanga rier Rinanu bango paga yiri dugobulu.

⁴¹Jogu abamasinga mambu mandi bamabatusu. Mu yilumbu yieni bebeli na tosini yirieru tsibatu bamafubana nogu.

⁴²Bamabengunanga temu tsiotsu ugulu malongi mabilumbi nowarisanga dinonga diogu notsananga va tavula Fumu nosambilanga.

⁴³Goma jimaba na mutu uotsu na bilimba bipuela na bimaga bimavagungu na bilumbi.

⁴⁴Botsu abamavaga yitu bamatsana va mosi na bamaba mubundini.

⁴⁵Bamasumbisanga bima biogu na botsu bamagabananga dufunu nana bamarondilanga.

⁴⁶Yilumbu na yilumbu botsu bamabengunanga va mosi o Ndagu Nsambi, bamajanganga va mosi na bamagabanga biguji biogu na nsangu na mirima misunda

⁴⁷ava bamayitsilanga Nsambi bamalabanga ubueji. Yilumbu na yilumbu Fumu amabuesanga abamagobulungu mu dibundu.