Read Punu Bisalu Bibilumbi 26 Bible Online

Bisalu Bibilumbi 26 - Punu bible

Bisalu Bibilumbi 26

¹Agrippa amatsingula Paul rie: Guna musuga, vosa amagu. Kabogu Paul amarelama na amavosa rie:

²Kaga Agrippa nyilabi ubueji umana munu ami va gusu agu mu mambu meni ama baJuif bemfuengilili.

³Guijabi bifu bibaJuif na buranga. Kokolu tsiagu, lekululuati!

⁴BaJuif botsu bamajaba nsanunu ami ubongila va bungebi buami. Bejabi yiri nyimaletsana o bulongu buami mbana avava o Jerusalem.

⁵Pa bagaa na biliba borangimina yiri nyimalekelisa migaga miotsu mimuyitsa ubaPharisie.

⁶Namunyi nyisosusu mu mbari nyina yitu mu pangini aji Nsambi amavangana na bataji betu.

⁷Tsiri pangini eni aji digumi na bifumba bibeji bamavivanga na nsangu ava bamasalila Nsambi nyangu na mukolu. Aa, kaga, mu diambu diditasa dieni nyimafuengululu na baJuif!

⁸Jenu baJuif dibandu yi dugorungulila usinga yiri Nsambi erambusi abamafu?

⁹Dingensa va dibandu nyimagana kaka yiri nyusala na mela mami motsu utsiemusa diina diJesus muisi Nazareth.

¹⁰Ajina nyimagana o Jerusalem. Nyinodila musuga ombu bivunda bibavagulitsi bapagu nyimakotisa bango yitu bapuela o tsugu. Banobavega mbela dufu, nyimajiwarisa.

¹¹Temu na temu nyimababeganga o Mandagu maBibenguna uyebakuananga yiri tanguji bogala Fumu. Nyimabavina tinda uvina la dibandu nyimalinganga yiari na yiari uyenabakuananga,

¹²Adina dimansindiga o Damas na musuga ubivunda bibavagulitsi bapagu.

¹³Aa, kaga, ava nyimabila mu nsila va diweru dimuangulu nyimalaba yijalala ayimaviolila wisi ulula ayimavedama yiari na yiari, menu na bambatsi bami.

¹⁴Jetu botsu tumaberuga va tsi na nyimagulu diufi adimakwivula mu mbembu Hebreu rie: Saul, Saul, dibandu yi guikuanini? Gukebunga nokelasa maguga munongu mosi nana taba ajimatungu. Ubuka ebuki tumba atungu kala.

¹⁵Menu nyimawivula rie: Fumu, ndeju la nyi? Fumu amawagula rie: Menu la Jesus agu guikuaningi.

¹⁶Simbuga! Nyimalabana nagu mu mbari nyimagusola uba musalitsi ami; gusamuna adi gutsilaba namunyi na adi gulaba o gusu.

¹⁷Nyimagugobula va gari baJuif na abagaa baJuif; nyigusindiyi ombu abagaa baJuif.

¹⁸Gubalasa kengili yiri bagusuyi o pisama jimasumu novioga o yijalala. Gubalonsa wandi yiri bakakini na Satan nobambana na Nsambi. Pa bopayila yitu nyubatandila masumu na bodila mbura va gari abamasolu na Nsambi.

¹⁹Kabogu kaga Agrippa, nyisamabusa adimavosu mu yiriariamu ayimatuyila o julu.

²⁰Tetega nyimalonsa bisi Damas mbana abavu o Jerusalem no Judee jiotsu nesi te nombu batu basusu. Nyimabasamunina yiri bakaluii diela nobambana na Nsambi nosala abivu biwelimina ulasa yiri bamakaluga ngensa.

²¹La dibandu baJuif bamakaangila o Ndagu Nsambi na bamaronda umboka.

²²Tumba diboti ombu Nsambi omakuaka kalala na te na namunyi nyisingisili bumbeji ombu batu botsu: ne baneni ne bageyi. Ngevosi disusu yika ama babiyitsi na Moise bamabiga rie:

²³Christ olaba maguga na oreyila urambuga o dufu na osamuna mambu madugobutsu ombu baJuif nombu batu basusu.

²⁴Anomana munu andi Festus amagamuga rie: Ka muna dilagu di! Dujabu duagu duneni dumagulagusa.

²⁵Paul amawaka rie: Kokolu Festus, ngaa dilagu. Ama nyivosi mavu mambu mangensa, ngevosi popopu.

²⁶Kaga Agrippa edijabi la dibandu nyina bukidi uvosa nandi. Vagaa diambu adi nyimavosa adivu digona ombu gandi, motsu amamavagu mamavagu va misu mabatu.

²⁷Kaga Agrippa, guivayili mambu mababiyitsi yitu, mbe? Nyiina, guimavayili yitu.

²⁸Agrippa amawagula rie: Je gupaga mutu Nsambi mu mua temu nana?

²⁹Paul amawagula rie: Ne namunyi ne yilumbu yisusu adi nyirondi yiri jenu botsu aduikulu namunyi duba nana menu, dimosi buandi dugotungu na bapanga.

³⁰Mbana kaga na yivunda yibulongu na Berenice na botsu abamaba nogu bamarelama,

³¹banopala bamatsingusana rie: Dibaala diedidi agaa na mbela yiri oboku vo okotusu o tsugu.

³²Agrippa amatsingula Festus rie: Mbe dibaala diedidi asamaronda uwenda ombu kaga mbe diwelimina yiri apalusu.