Read Punu Bisalu Bibilumbi 3 Bible Online

Bisalu Bibilumbi 3 - Punu bible

Bisalu Bibilumbi 3

¹Pierre na Jean bamawenda va mosi o Ndagu Nsambi mu diweru didusambu, diwendi rie: ava murekumunu.

²Bilumbu biotsu bamabeganga dibaala adimaburu yimbolutu na bamamusunsanga va dikotulu diNdagu Nsambi adimanengulungu Diguyi Diboti. Amavondanga ombu abamakotanga o Ndagu Nsambi.

³Ava dibaala dieni amalabila Pierre na Jean ukota bakakota amabavonda.

⁴Pierre amamugengila yisuisu va mosi na Jean na amavosa rie: Tugengili.

⁵Amabagengila yisuisu, amaviva udila yima ombu gogu.

⁶Mbana Pierre amamutsingula rie: Ngaa na mbongu vo lora tumba ayivu nami nyiguveyi: mu diina diJesus Christ muisi Nazareth, relama na wendanga.

⁷Amamugaanga gogu andi agumabaala, amamureliga. Muna diweru dieni makulu mandi na bapansi bandi bimawara. Amakota nogu o Ndagu Nsambi,

⁸amayewendanga nodumuga na amayenayitsanga Nsambi.

⁹Batu botsu bamamulaba uwenda ewendi noyitsanga Nsambi.

¹⁰Bamajaba yiri la jandi agubetsi atsana va dikotulu diNdagu Nsambi uvondanga na bamakambulu puela na bamasutu mu diambu adimalabana ombu gandi.

¹¹Batu banolaba yiri agumaleba yimbolutu agekakini na Pierre na Jean bamakambulu na bamawenda mambangu ombu gogu o piasu ajimanengulungu Piasu Salomon.

¹²Pierre anolaba dionyi amawivula yinombu rie: Jenu bisi Israel mu mbari yi duikambulu? Mu mbari yi duitugengili yisuisu nana nderi na mangolu metu tutsiwendisila dibaala diedidi?

¹³Nsambi Abraham na Nsambi Isaac na Nsambi Jacob na Nsambi bataji betu amagabila musalitsi andi Jesus bundumba. Dumamugala na dumamufunda ombu Pilate. Ne Pilate amaronda umudunda.

¹⁴Tumba jenu dumagala mutu Nsambi aguvu usungama na dumaronda yiri bolasa yingeba ombu yikongu.

¹⁵Dumaboka Fumu monyu agu Nsambi amarambusa o dufu; jetu tuji bambeji.

¹⁶Mangolu madiina diJesus dinovagulu yitu dimabelusa dibaala diedidi. Jenu duimulabi na duimujabi. Anovayila diina diJesus yitu, yitu yieni yimamubelusa nana jenu beni duimulabili.

¹⁷Baana bataji, nyijabi yiri jenu na bivunda bienu dusamajaba adi dumavayila Jesus.

¹⁸Diwendi rie: Nsambi amadugusu adimavosu na bibiyitsi bandi rie: Christ andi olaba maguga.

¹⁹Kabogu kalulanu diela na gabuganu ombu Fumu yiri masumu menu motandu.

²⁰Mbana Fumu oduvega duvotsu ava omuesindiyila agumasolu mu diambu dienu la Jesus Christ.

²¹Dingensa vengu oletsana o julu te na bima biotsu biukaluga nana Nsambi amavosila kala na babiyitsi bandi.

²²Moise amavosa rie: Fumu Nsambi opalisa mubiyitsi ususu va gari enu nana menu; dumugululu mu motsu ama jandi odutsingula

²³na uotsu agugomugululu agoba mu dutalu dubatu baNsambi.

²⁴Nyiina, babiyitsi botsu ubanda na Samuel bamalebiyila bilumbu biebibi.

²⁵Jenu duji baana bababiyitsi abobialila pangini aji Nsambi amavangana na bataji betu. Pangini eni ajimavangunu na Abraham rie: Mu mutegula agu nyugabila mikuta miotsu miula.

²⁶Nsambi anorambusa musalitsi andi Jesus, amamusindiga uyidugabulila miula novega mutu mutu diela uliyila mabi mandi nsima.