Read Punu Bisalu Bibilumbi 4 Bible Online

Bisalu Bibilumbi 4 - Punu bible

Bisalu Bibilumbi 4

¹Ava Pierre na Jean bamavosilanga na batu o Ndagu Nsambi, bavagulitsi bapagu na yivunda yiNdagu Nsambi na baJuif abamaba baSadducee bamabarasuna guna.

²Banogulu yiri bilumbi belonsi rie: Christ amarambuga o dufu bamanyoga kabu jineni.

³Bamabagaanga; mu mbari wisi mbe umakewendila bamabakotisa o tsugu te na kedi.

⁴Tumba bapuela abamagulu mambu meni bamamavayila yitu. Dutalu dubadukitsi dumafuna te na bebeli na tosini yiranu tsibatu.

⁵Ava kedi bivunda bibaJuif na bivunda bisusu na milonsi mimigaga bamabenguna o Jerusalem.

⁶Va gari ogu vamaba Anne yivunda yibavagulitsi bapagu na mukuta andi na Caiphe na Jean na Alexandre.

⁷Bamareliga Pierre na Jean va gari ogu na bamabawivula rie: Na musuga yi vo na diina dinyi dutsibelusila mutu eni?

⁸Mbana Pierre anobasu na Yinyunyi yiNsambi amavosa na barumitsi na bivunda biIsrael rie:

⁹Merianu: Namunyi tumafimdusu mu mbari tumavayila yimbolutu diboti na tuiwivulu nana jandi atsibelusulu.

¹⁰Dijabianu jenu botsu na batu botsu baIsrael badijabi wandi rie: La mu diina diJesus Christ muisi Nazareth agu jenu dumagomina va kurusu, agu Nsambi amarambusa o dufu, la mu diina diandi dibaala dieni amabeluyila na namunyi duimulabi va gusu enu.

¹¹Bisonu bisonugu rie: Jesus aji Dimanyi adimabuagu na barungitsi divu tindi adiviolila ubueji.

¹²Vagaa mutu ususu oyigobuli na vagaa diina disusu adimajabunu na batu adivu na mangolu ugobula.

¹³Ava bivunda bieni bineni bamagululu malongi maPierre na Jean, bamakambulu mu mbari bamabalabila bifufu. Kabogu bamajaba yiri bamabanganga na Jesus.

¹⁴Tumba ava bivunda bamalabila jandi agumabelusu basamamuekala diambu.

¹⁵Bamabaruma upala o yibenguna yiogu;

¹⁶mbana bamavosa joʼ beni na joʼ beni rie: Yi tuvayila batu bebaba? Bisi Jerusalem botsu bamalaba yiri yimaga yimavagu nogu na tugorungula utumuna paga.

¹⁷Tumba ubanda namunyi tubagandisianu na mapemi rie: Duyamuevosa mu diina dieni mbana diambu digoviolila uroga.

¹⁸Banobanengila bamabagandisa rie: Tugemueronda ugulu ne temu mosi yiri duivosi vo duilonsi mu diina diJesus. Duigulu?

¹⁹Pierre na Jean bamabagabusila rie: Jenu beni dutabula diambu yeri diwelimina udugululu vo ugululu Nsambi;

²⁰jetu tugorungula usuega ama tumalaba nogulu.

²¹Bivunda bieni bineni bamamuebavayila mapemi na bamabapalisa. Basamajaba nana bobakilisila mu mbari botsu bamayitsanga Nsambi mu diambu adimalabana.

²²Mutu agumabelusu na yimaga yieni amaba ne uviolila magumana mabilima.

²³Pierre na Jean banopalusu bamawenda ombu baana bataji bogu na bamabatsingula motsu ama bivunda bibavagulitsi bapagu na bivunda bisusu bamabaruma.

²⁴Ava bango yitu bamadigululu bamatatila Nsambi na diufi dimosi rie: Fumu gumavaga julu na butamba na mubu na biotsu abivu muna.

²⁵Gumavosa na Yinyunyi yiNsambi ava musalitsi agu taji etu David amavosila rie: Dibandu yi kimbu jivu va gari malongu? Dibandu yi batu bavu na matasa makulini?

²⁶Dibandu yi bakaga babutamba bavu bakunsama utoga divita? Dibandu yi jogu na barumitsi bavu na kueru na Fumu na Christ andi?

²⁷Munongu mosi Herode na Ponce Pilate na bisi malongu na batu baIsrael bamatunga fundu o musiengi egugu ubusa musalitsi agu Jesus, agu ndeʼ gumabiatsa

²⁸udugusu motsu ama gumaruma na ama gumalegana.

²⁹Fumu namunyi gulu mapemi mogu na vega bukidi buwelimina ombu basalitsi bagu ulonsa mambu magu.

³⁰Simbula gogu agu ubelusa novaga bimaga na bilimba mu diina dimusalitsi agu Jesus.

³¹Ava bamamanina usambila mbura aji bamaba bagukama jimasisana; jogu botsu bamabasu na Yinyunyi yiNsambi na bamalonsanga mambu maNsambi na bukidi.

³²Batu beni abamavaga yitu bamaba na murima mosi na diufi dimosi. Ne mutu mosi asamavosa yiri bima biandi bimaba bijandi beni tumba biotsu bimaba jmubundini va gari ogu.

³³Bilumbi bimaba na mangolu usingisilanga bumbeji budurambugu duFumu Jesus mu mbari miula mineni mimabagabulu.

³⁴Va gari ogu vasamaba yijaga, botsu abamaba na misiru vo mandagu bamabisumbisa na bamabega dufunu dubima abi bamasumbisa

³⁵na bamadusunsa va gusu bilumbi; bamagabana nana mutu mutu amabila na nsala.

³⁶Vamaba mutu diina diandi Joseph agu bilumbi bamaluga Barnabas (divindugulu rie: muana aguiwarisi batu) agumaba muana dibaala uLevi muisi Chypre.

³⁷Jandi anosumbisa musiru andi amabega mbongu notsivega ombu bilumbi.