Read Punu Romains 1 Bible Online

Romains 1 - Punu bible

Romains 1

¹Menu Paul, musalitsi uJesus Christ, nyi-manengulu na Nsambi uba yilumbi, usamuna Musamu Uboti.

²Musamu eni agu Nsambi amavangana kala na babiyitsi bandi mu Bisonu biandi.

³Musamu eni uilonsi mambu maMuana andi Fumu etu Jesus Christ; amaba mutegula ukaga David;

⁴amalabana na ma-ngolu maYinyunyi yiNsambi na amalasa yiri Muana Nsambi avu ava amarambuyila o dufu.

⁵Na maboti mandi Nsambi amansola uba yi-lumbi yiChrist nolonsa batu botsu umuvayila yitu nomudedila.

⁶Jenu bisi Rome dumasolu na Nsambi wandi uba batu baJesus Christ.

⁷Kabogu nyisonini jenu bisi Rome aba Nsambi erondi na bamanengulu uba batu ba-ndi. Maboti maNsambi na duvotsu duandi bibi nenu mu diina diTaji etu Nsambi na diFumu Jesus Christ.

⁸Tetega nyigabusili Nsambi diboti mu diina diJesus Christ mu diambu diyitu ayivu nenu. Batu botsu beyikakisi yiari na yiari.

⁹Nsambi orungula udulasa yiri adi nyivosi divu dingensa, Nsambi agu nyisalili na mu-rima uotsu ava nyilonsili Musamu Uboti uMuana andi.

¹⁰Nsambi ejabi yiri ngetoyi udurangimina na tsambu tsiami temu tsiotsu.

¹¹Nyisambili yiri pa Nsambi erondi nyudila temu uruga ombu genu. Mu mbari nyirondi uruga uyidulaba nodugabila pegulu tsiYi-nyunyi yiNsambi atsiuduwarisa.

¹²Diwendi rie: jetu nenu tuwarasananu: yitu yienu yiu-kwarisa na yitu yiami yiuduwarisa.

¹³Baana bataji nyirondi udujabisa yiri te-mu na temu nyimaronda uruga udulaba tumba nyimaba na bibinda. Nyimaronda ufunisa ba-dukitsi va gari enu nana nyimabafunisila o malongu masusu.

¹⁴Nyimasolu ulonsa botsu: baGrec na bifufu na bango diela na biduka.

¹⁵La dibandu nyina nsala jineni usamuna Musamu Uboti ombu jenu aduitsani o Rome.

¹⁶Nyina murima usunda usamuna Mu-samu Uboti mu mbari uonyi la mangolu ma-Nsambi ugobula botsu abeguvayili yitu, tetega baJuif mbana abagaa baJuif wandi.

¹⁷Musamu Uboti uilasi nana Nsambi esungiyili batu nandi. Motsu mebandi na yitu na mesiti na yitu wandi. Mu mbari Bisonu bisonugu rie: Oyisungugu na Nsambi mu mbari ana yitu odila monyu.

¹⁸Kabu Nsambi jivu va julu miuru mibatu babi abegubitsi ngensa na bifu biogu bibi.

¹⁹Nsambi ebakilisi mu mbari bamagulu kala adivu diwelimina nandi; Nsambi jaʼ beni ama-bajabisa.

²⁰Ubanda ava Nsambi amasundila bulongu pegulu tsiandi atsigelabini, diwendi rie: mangolu mandi amavu mutubu na bunsa-mbi buandi tsimalabana ava amasundila bio-tsu. La dibandu bagaa na muguma.

²¹Kabogu bana mbela mu mbari banojaba Nsambi, ba-samamuyitsa na basamamugabusila diboti. Bamatsiemusa diela diotsu te na mirima mio-gu mimapinda.

²²Bevosi yiri bana diela tumba biduka bavu;

²³bebusi Nsambi agugefu na besingi bakosi mu bibagunu bibatsoli na bi-bulu na bilandila.

²⁴Mu diambu dibuduka buogu Nsambi amabaliyila nsima na beduki matasa mogu makulini na bevayi tindi muinsi.

²⁵Bebusi ngensa jiNsambi na besingi mfurulu; beyitsi nosalila abimasundu tsiri Musunditsi aguvu awelimina uyitsu! Amen!

²⁶Mu diambu dinsala tsiogu Nsambi amaliyila batu nsima. Bagetu bogu bebusi adi-vu diwelimina na bevayingi kulini jogu beni na jogu beni.

²⁷Munongu mosi babaala bebusi bagetu na bevayi tindi kulini na babaala nogu. Babaala beni banovaga mambu mamuinsi, di-basa diogu diwelimina dimatsiemuga, diwe-ndi rie: mukilu ogu uvu uwelimina na muinsi ogu.

²⁸Mu diambu dikanda tsiogu Nsambi amabadunda yiri badukingi diela diogu nova-ga nana berondih.

²⁹Bamaviolila ubiva na mi-nongu miotsu mimabi; diwendi rie: diwavi na bukanyi na dunyungi na ngusu na bukongu na mitsundu na dimbunga na divina.

³⁰Va julu vana baji begelitsi na bavinitsi baNsambi na bana yikali na dunangu na durutsu na bebusi udedila bataji na banguji.

³¹Bagekipi mambu na bagedugusu pangini tsiogu. Baji batu bara-nga na bagelasi batu yingeba.

³²Bejabi yiri mugaga uNsambi uivosi yiri batu abetsani nana bana mbela dufu. Ne nana bemavayi na befubini mirima na basusu abemavayi.