Read Punu Romains 14 Bible Online

Romains 14 - Punu bible

Romains 14

¹Pa mutu aki adeda mudilianu tumba duyapupisa matasa mandi.

²Diwendi rie: mutu mosi ana yitu yiweiimina uji biguji biotsu tumba ususu agusakawara oji yika mi-guba.

³Jandi oyiji biotsu ayapeji jandi ogeji biotsu na ogeji biotsu ayavega mbela ombu oyiji biotsu mu mbari amasingu na Nsambi.

⁴Ndeʼ la nyi aguitabulili musalitsi ungana bu-nsonsi? Pa jandi aji awara vo pa amadeda, dionyi digegengili Fumu andi? Owara mu mbari Fumu ana mangolu umuwarisa.

⁵Diwendi rie: mutu mosi eyitsi yilumbu yimosi uviolila bilumbu biotsu tumba mutu ususu elabi yiri bilumbu biotsu bivu dedi. Mutu mutu na murima andi.

⁶Jandi oyiyitsi yilumbu edivayi uyitsa Fumu; oyiji biguji biotsu edivayi uyitsa Fumu mu mbari ega-busili Nsambi diboti mu bionyi. Jandi oyibusi uji biotsu edivayi uyitsa Fumu na jandi wandi egabusili Nsambi diboti.

⁷Kabogu ne monyu ne dufu bigegengili mutu; ojivu monyu aji monyu mu mbari duganu duChrist; oyifu, efii mu mbari duganu duChrist. La dibandu ne pa tuji monyu

⁸ne pa tufu motsu megengili Fumu, tuji abandi.

⁹Christ amafu na ama-rambuga o dufu yiri orungula uba Fumu ombu abamafu nombu abavu monyu.

¹⁰Dibandu yi guitabulili muana taji agu bunsonsi? Dibandu yi guilensili muana taji agu? Tsia Nsambi otutabulila bunsonsi?

¹¹Bisonu bisonugu rie: Fumu amaleva rie: Botsu bokutama va gusu ami, na botsu bosinga rie: Nyiji Nsambi.

¹²Kabogu mutu mutu odendulila Nsambi mandi motsu.

¹³Kabogu tuyamuetabusananu bunsonsi. Uviolila ubueji yiri tutabula rie: Tugomue-tsimbusu muana taji na tugomuemurombisa uvaga dibi.

¹⁴Nyinofubana murima na Fumu Jesus nyimajaba yiri vagaa bingitsi; tumba pa mutu ekelisi yingitsi kabogu yingitsi yivu nandi.

¹⁵Pa gutsirisa murima umuana taji agu mu mbari gumasumuna yingitsi yiandi ka-bogu gugaa na durondu. Guyasinga yiri biguji abi guji biubivisa murima umutu agu Chiist amafuila.

¹⁶Va julu vana guyasinga yiri adivu diwelimina ombu gagu diutsimbusu mutu ususu.

¹⁷Ava Durumu duFumu dujabununu tugomuekipa biguji na binuinu tumba turumu na Yinyunyi yiNsambi ayiutulasa dusungugu na duvotsu na nsangu.

¹⁸Jandi oyisalili Christ nana aji uwelimina va gusu Nsambi na batu bomusingisila bumbeji.

¹⁹Salanu abivu biwelimina na duvotsu na warasananu.

²⁰Guyabunga yisalu yiNsambi mu diambu dibiguji. Dingensa biotsu biligu; tumba pa guitsimbusu mutu mu diambu dibi-ngitsi biandi ubueji uka?

²¹Diboti ubusa uji nyama nesi unu malamu, diwendi rie: busa motsu amobivisa murima umuana taji agu.

²²Kelisa bingitsi biagu yika va gari jenu na Nsambi. Ka muna ubueji gu mutu olaba pa orungula usunsa murima yiotsu ayi etabuli dionyi!

²³Tumba pa aki na paga mu diambu dibiguji na ebiji, Nsambi omuvega mbela mu mbari agekipi yitu. Motsu amagevagu na yitu mavu masumu.