Read Punu Romains 9 Bible Online

Romains 9 - Punu bible

Romains 9

¹Adi nyivosi divu dingensa, nyimafu-bana murima na Christ, ngefuri. Diufi dimurima adimarumu na Yinyunyi yiNsambi diwarisi rie: Dingensa ngefuri.

²Ka muna ma-guga ma nyilabi! Ka muna buali bu nyigulu mu diambu dibatu bami.

³Ne pa nyulogu no-kakana na Christ mu diambu diogu, vagaa diambu!

⁴Baji bategula baIsrael, diwendi rie: abamasolu na Nsambi; amabanengila baana bandi na amabagabila bundumba; amavanga-na nogu na amabavega migaga; bana muyitsa ungensa na bamadila pangini jiNsambi.

⁵Baji bategula babivunda na Christ aji yifumba yi-mosi nogu. Diboti ombu Nsambi mutubu. Amen!

⁶Ngevosi yiri mbembu Nsambi jimabu-nsana. Mu mbari botsu aberuyisini o Israel bagaa abasolu na Nsambi.

⁷Munongu mosi bategula baAbraham botsu bagaa baana baNsambi; mu mbari Nsambi amavosa na Abraham rie: yika bategula balsaac borangulu abagu.

⁸Diwendi rie: duburu dugeveyi musu-ga unengulu baana baNsambi; bategula bandi bavu jogu abamavangununu pangini.

⁹Mu mbari Nsambi amavangana rie: Nyumuega-buga na va temu eni Sara obura muana udibaala.

¹⁰Va disusu, Rebecca amabura mavasa na taji etu Isaac.

¹¹Ne baana bakaburu na mbe basakavaga maboti vo mabi, dusolu du-Nsambi dumavagu tsiri mu diambu dibisalu biogu tumba mu diambu diduganu duandi.

¹²Nsambi amamutsingula rie: Yivunda osalila ngebi.

¹³Nana Bisonu bisonugulu rie: Nyimaronda Jacob tumba nyimavina Esau.

¹⁴Kabogu yi tuvaga? Nsambi agaa asu-ngama? Tsatsabi!

¹⁵Amavosa na Moise kala rie: Nyulasa yingeba ombu agu nyirondi ulasa yingeba.

¹⁶Kabogu adi mutu erondi nesi abi esali bigaa na diambu; motsu mebandi na yingeba yiNsambi.

¹⁷Bisonu bimasonugu rie: Nsambi amavosa na kaga Egypte rie: Nyima-gubiatsa kaga tsiri mu disusu yika ulasa ma-ngolu mami noroyisa diina diami te na bulo-ngu buotsu.

¹⁸Nsambi elasi yingeba ombu agu erondi uyilasa na pa erondi, egalisi murima umutu agu erondi ugalisa.

¹⁹Kabogu mutu orungula ukwivula rie: Pa dina divu dingensa dibandu yi Nsambi esiembili mutu? Mutu nyi orungula ugagana naduganu duNsambi?

²⁰Je dibaala, ndeʼ la nyi aguitumuni paga na Nsambi? Yisanga yidiga yiuwivula jandi omayibumba rie: Dibandu yi gumapayila nana?

²¹Mubumbitsi agovaga yi-sanga yiboti vo yibi na dibungili dieni didiga?

²²Divu munongu mosi ombu Nsambi. Amaronda ulasa kabu na mangolu mandi. Ka-bogu owarila kulini tsijogu abamamunyoyisa, abamabubungu.

²³Mbe ka jetu atumasolu na yingeba yiandi amaronda utulasa bundumba abu otugabila.

²⁴Tumba jetu tuji abasolu tsiri yika va gari baJuif buandi tumba va gari aba-gaa baJuif wandi.

²⁵Adina amapalisa mu di-buku diOsee rie: Jogu abasamaleba batu bami nyubanengila batu bami, na bisi bulongu abu nyisamalerondanga, nyubanengila abadurondu.

²⁶Na abamaletsingulu rie: Jenu dugaa batu bami, jogu bonengulu baana baNsambi aguvu monyu.

²⁷Esaie amabiga wandi mu diambu di-batu baIsrael rie: Ne pa durangu dubaIsrael dufuna nana yisieyi yika mua pesu buandi bogobulu.

²⁸Mu mbari Fumu odugusu na bisuasu motsu ama amavangana na bisi bulongu.

²⁹Esaie amadivosa na kala rie: Mbe Fumu mangolu asamatusila bategula mbe tumalaba nana bisi Sodome na Gomorrhe bamalabila.

³⁰Kabogu yi tuvosa? Adidi rie: Abagaa baJuif abasamaba basungama na Nsambi ba-masungama nandi mu diambu diyitu yiogu.

³¹Tumba batu baIsrael bamaduka migaga yiri boba basungama na Nsambi tumba ne nana bamakonda.

³²Dibandu yi? Mu mbari batu baIsrael basamalekipa ulasa Nsambi ubueji; bamaduka bisalu, basamamuekipa yitu. Diwendi rie: yitu yimaba, nderi dimanyi na bamaduku dibaku mu dionyi.

³³Ne Bisonu bimasonugu rie: La dibandu nyisunsili dimanyi va Sion, didukusu batu mabaku na dibaberusi. Tumba oyidivayili yitu agokambulu.