Read Punu 1 Corinthiens 1 Bible Online

1 Corinthiens 1 - Punu bible

1 Corinthiens 1

¹Muganda egugu uiruyili ombu Paul nombu muana taji etu Sosthene. Paul agumanengulu uba yilumbi yiJesus Christ mu duganu duNsambi.

²Tuidusonini jenu bisi dibundu diCorinthe, nombu botsu abenengulu uba batu baNsambi nombu jogu abamafubana mirima na Jesus Christ nombu botsu abesambili Fumu etu Jesus Christ ojivu Fumu ogu wandi:

³Maboti maNsambi na duvotsu duandi bibi nenu mu diina diNsambi Taji etu na diFumu etu Jesus Christ.

⁴Temu tsiotsu nyigabusilingi Nsambi diboti mu diambu dienu mu mbari maboti maNsambi mamadulasu na Jesus Christ.

⁵Dunofubana mirima na Christ pegulu tsiotsu tsimaduvegu. Dumadila dujabu na va julu vana dumadila mangolu ulonsa motsu amamaduvegu

⁶mu mbari ngensa jiChrist jivu nenu.

⁷Kabogu duyakambulu ava duivivili durugu duFumu etu Jesus Christ.

⁸Jandi oduwarisanga yiri dugodila mbela ava yilumbu yiFumu etu Jesus Christ

⁹Nsambi agotamba nodugusu pangini tsiandi, jandi omadunengila yiri dunonga na muana andi, Fumu etu Jesus Christ.

¹⁰Baana bataji nyidulubusi na musuga agumapegu na Fumu etu Jesus Christ rie: Fubananu mirima tindi ufubana.

¹¹Nyimagulu ombu bisi ndagu Cloe yiri duna mitsundu.

¹²Mutu evosi rie: Menu nyiji mutu uPaul! Ususu rie: Menu nyiji mutu uApollos! Ususu rie: Menu nyiji mutu uPierre! Ususu rie: Menu nyiji mutu uChrist!

¹³Je Christ ana miina mapuela? Paul amagomunu va kurusu mu diambu dienu? Mu diina diPaul dumabatusulu?

¹⁴Nyigabusili Nsambi diboti yiri nyisamabatisa ne umosi va gari enu, yika Crispus na Gaius.

¹⁵Mutu agovosa rie: Nyimabatusu uba mudukitsi andi.

¹⁶(Dingensa nyimabatisa mukuta uStephanas tumba va julu vana ngerangimini yiri nyimabatisa mutu ususu.)

¹⁷Christ asamansindiga ubatisa batu. Amansindiga usamuna Musamu Uboti. Nyisamagusamuna na mangolu mami mu mbari nyisamaronda udetsa mangolu madufu duChirist adu amafuila va kurusu.

¹⁸Dilongi dikurusu divu buduka ombu jogu abebungini; tumba ombu jetu atumagobulu divu mangolu maNsambi.

¹⁹Bisonu bisonugu rie: Nyutsiemusa diela dibango diela, na nyukambisa basoyitsi badiela.

²⁰Kabogu yika tsie na bafigo diela? Yika tsie na basoyitsi badiela? Yika tsie na bango mitsundu? Nsambi amalasa yiri diela diogu divu yika kulini.

²¹Nsambi na diela diandi amakambisa batu yiri bagorungula umujaba na diela diogu. Tumba Nsambi amatabula diambu yiri ogobula abevayili malongi ama tuilonsi yitu.

²²BaJuif be wivuli bimaga na abagaa baJuif berombi diela.

²³Jetu tuisamuni Christ ajimagomunu va kurusu; baJuif beditumuni paga na abagaa baJuif bedilensi.

²⁴Tumba mangolu maNsambi na diela diandi bivu na jogu abamanengulu ne baJuif ne abagaa baJuif.

²⁵Mu mbari ne buduka buNsambi buba uviolila diela dibatu, na udeda uandi uba uviolila mangolu mogu.

²⁶Baana bataji duyalibana nana dumabila ava Nsambi amadunengilila. Je va gari enu basamaba bapuela abamaba na diela nesi mangolu vo abamaba batu baneni?

²⁷Tumba rangiminanu yiri Nsambi amasola na kanda batu aba bisi butamba belabi bifufu yiri okambisa bango diela.

²⁸Diwendi rie: amasola abamalensu na abamavinu na abavu bifufu yiri orungula ubunga aba bisi butamba beyitsi.

²⁹Kabogu va gusu Nsambi mutu agaa na musuga ukematisa.

³⁰Diwendi rie: tumafubana mirima na Christ na Nsambi amasingisa Christ uba diela dietu. Christ amatusungiga na Nsambi na amatuvaga baana baNsambi na amatujeyisa.

³¹La dibandu Bisonu bisonugulu rie: oyinyemi anyemi abi Fumu amasala.