Read Punu 1 Corinthiens 10 Bible Online

1 Corinthiens 10 - Punu bible

1 Corinthiens 10

¹Kabogu baana bataji bami, ngerondi yiri dulibana adimalabana ombu bataji betu abamaduka Moise. Nsambi amabavega dimungi adimabakelisa na amabakamusila Mubu Ubenga yiri borungula uvioga.

²Botsu bamaputama mu dimungi nesi mu mubu va mosi na Moise.

³Va julu vana botsu bamagabasana biguji biYinyunyi

⁴na botsu bamanu mamba maYinyunyi mu mbari bamanu amamapalila o dimanyi adimaba nogu na dimanyi dieni dimaba Christ.

⁵Tumba bamosi bamanyoyisa Nsambi la dibandu bamafuila o kumu.

⁶Kabogu mambu meni mamalabana utulubusa yiri tugoduka matasa makulini

⁷na tugogoma bakosi nana bamosi bamavayila. Nana Bisonu bisonugulu rie: Batu bamajanganga na bamanuanganga mbana bamayinanga.

⁸Tuyavaga buvuyisa nana bamosi va gari ogu bamavayila na tuyalibana yiri buvuyisa bumabarombisa ufu, magumabeji na tosini yirieru mu yilumbu yimosi.

⁹Tuyamanga Fumu nana bamosi va gari ogu bamamumangila na tuyalibana yiri bamaboku na banyoga.

¹⁰Duyatata nana bamosi va gari ogu bamatatila na tuyalibana yiri bamabungu na yiansa yidufu.

¹¹Mambu meni mamalabana ombu gogu ulubusa basusu na mamasonugu utulubusa. Jetu tuvu va temu jiusita.

¹²Kabogu jandi oyitasi yiri aji awara akebini yiri agodeda.

¹³Vagaa dumangu ne dumosi adumalabana ombu genu adusakalabana ombu basusu tumba Nsambi ekelisi pangini andi, agogaru yiri dumangu duduviolila tumba temu jidumangu oduwarisa yiri dugodeda.

¹⁴La dibandu bambatsi bami badurondu busanu bakosi.

¹⁵Dugaa bangebi kabogu kelulanu adi nyidutsinguli.

¹⁶Tasatianu kopa; tunogabusa Nsambi diboti tuijinu na tuifubini na malungu maChrist. Mbeyianu? Munongu mosi na dipa: ava tuidibukulili ditufubini na dunyuru duChrist. Mbeyianu?

¹⁷Nana dipa adi tuibukuli bapuela divu dimosi, munongu mosi tuji dunyuru dumosi, diuleba tuji bapuela.

¹⁸Tasatianu batu baIsrael: abeji abimavagulu pagu befubini mu yisalu. Mbeyianu?

¹⁹Yina yi? Nyama na kosi tsina diambu?

²⁰Tsatsabi! Adi nyivosi adidi rie: Abi batu abageduki Nsambi bevaguli va bisunsulu biogu bivagulu ombu bayisi tsiri ombu Nsambi.

²¹Ngerondi yiri dunonga na bayisi. Dugorungula unu kopa jiFumu nomuenu kopa jibayisi; dugorungula uji va tavula Fumu nomueji va tavula bayisi.

²²Je diwelimina uwavisa Fumu? Jetu nenu tuimuviolili mangolu?

²³Bevosi rie: Tuna musuga uvaga nana tuirondili: diurungula uba tumba mamosi mayavagu. Tuna musuga uvaga nana tuirondili tumba motsu magewarisi batu basusu.

²⁴Kabogu mutu ayalesala udila ama erondi tumba awamusi ususu udila amandi.

²⁵Duna musuga uji nyama tsiotsu atsi besumbisi o dikasa; duyamueduka bingitsi.

²⁶Bisonu bisonugu rie: Biotsu bivu biFumu.

²⁷Pa agugaa na yitu odunengila o uji na duiwendi, jianu biotsu abi bodusunsila, duyamueduka bingitsi.

²⁸Tumba pa mutu odutsingula rie: Bionyi bimalevagulu ombu bakosi, duyabiji mu diambu dijandi otsidulubusa na mu diambu dibingitsi

²⁹tsiri bingitsi bienu tumba abi jandi eduki. Mbana mutu ovosa rie: Dibandu yi nyurumu na bingitsi bimutu ususu?

³⁰Pa nyigabusili Nsambi diboti mu diambu dibiguji abi nyiji, dibandu yi nyunyangululu mu dionyi?

³¹Nesi duiji nesi duinu vo nesi duivayi yima yiotsu yisusu vaganu motsu udodisa Nsambi.

³²Tsananu buranga yiri dugotsimbusu nesi abagaa baJuif nesi baJuif vo bisi dibundu diNsambi.

³³Vaganu nana nyivayili, diwendi rie: Nyikevega mu bisalu biotsu yiri botsu bobilaba biwelimina, ngemuesala udila ama nyirondi tumba nyisali uwamusa botsu yiri tanguji bamosi bogobulu.