Read Punu 1 Corinthiens 11 Bible Online

1 Corinthiens 11 - Punu bible

1 Corinthiens 11

¹Waganu nana nyivayingi mu mbari nyigukulili Christ.

²Nyidukakisi mu mbari duitangiminingi na duikelisingi malongi ama nyimadulonsa.

³Tumba nyirondi yiri jenu dujaba rie: Christ aji muru udibaala diotsu na dibaala aji muru umugetu na Nsambi aji muru uChrist.

⁴Dibaala diotsu adisambili vo ulonsa na muru ukibugu, elensi Christ.

⁵Tumba mugetu uotsu aguisambili vo ulonsa na muru jalala, elensi mulumi andi; aji nana nderi amafugu.

⁶Diwendi rie: Pa mugetu ageduari musuari avu nderi afugu na dionyi divu yisonyi, kabogu aduaringi musuari.

⁷Dibaala ayakubiga muru andi mu mbari avu yibagunu yiNsambi na alasingi bundumba buandi. Tumba mugetu aji nderi bundumba budibaala;

⁸mu mbari dibaala asamasundu na yivisi yimugetu tumba mugetu amasundu na yivisi yidibaala.

⁹Na dibaala asamasundu mu diambu dimugetu tumba mugetu amasundu mu diambu didibaala.

¹⁰La dibandu mugetu abi na muru ukubugu yiri biansa biulaba yiri aji o tsi durumu dumulumi andi.

¹¹Tumba abefubini mirima na Christ ne mugetu ne dibaala, bayaketasa yiri bekeruma.

¹²Ne pa mugetu amasundu na yivisi yidibaala, jabanu rie: Dibaala wandi eburu na mugetu, bisundu biotsu biruyili ombu Nsambi.

¹³Jenu beni ditabulianu: diwelimina yiri mugetu osambila Nsambi na muru jalala?

¹⁴Diwelimina yiri dibaala obusa ufuga?

¹⁵Kabogu adivu kembu ombu mugetu divu yisonyi ombu dibaala. Tuidivosi mu mbari vana dibandu Nsambi amavega mugetu nanga ukubiga muru andi.

¹⁶Pa mutu erondi utsunda mu uonyi ajabi adidi rie: ne jetu ne mabundu maNsambi, jetu botsu tuiduki mugaga egugu.

¹⁷Disusu rie: Ngedukakisi mu mbari ava duibengunini dugewarisini tumba duidetsisini.

¹⁸Nyigulu wandi yiri vavu dupasu va gari enu na ngeditumuni paga.

¹⁹(Vagaa diambu mu mbari duonyi dulasa abavu basigama.)

²⁰Kabogu ava duibengunini dugedivayi utsana va tavula Fumu.

²¹Tumba mutu mutu ekipi biguji biandi na bamosi bana nsala na basusu bana malangi.

²²Mutu mutu agaa na ndagu? Dibandu yi duilensili Ndagu Nsambi noji muna? Dibandu yi duilasili abagaa na biguji yisonyi? Yika tsie, diwelimina yiri nyudukakisa? Tsatsabi, ngodukakisa!

²³Nyidulonsi ama nyimawiji ombu Fumu jaʼ beni. Amama rie: Fumu Jesus ava mukolu agu amawakusulu, amabonga dipa,

²⁴na anomana ugabusa Nsambi diboti amadibukula na amavosa rie: Adudu la dunyuru duami adumavegu mu diambu dienu. Vaganganu nana utangimina.

²⁵Munongu mosi banomana uji amabonga kopa na amavosa rie: Kopa ejiji la pangini jigona jiNsambi ajimadugusu na malungu mami. Vaganganu nana utangimina.

²⁶Mu mbari temu tsiotsu atsi dulilanga dipa diedidi na dunuinanga kopa ejiji, duirangimini dufu duFumu te no omueruga.

²⁷Tumba pa mutu osunda uji dipa diFumu vo unu kopa andi tsiri ukelula minima andi ana mbela na elensi dunyuru na malungu maFumu.

²⁸Kabogu mutu mutu akekelulanesi akaji dipa nonu kopa.

²⁹Mu mbari oyiji dipa nonu kopa tsiri urangimina dunyuru duFumu ekevega mbela.

³⁰La dibandu vavu bibomfi na bibedu na bamosi bamafu.

³¹Pa jetu beni tuikevega mbela Nsambi agomuetutabulila bunsonsi.

³²Tumatabululu bunsonsi na tumakilusu na Fumu yiri o gusu tugovegu mbela va mosi na bisi bulongu.

³³Anana wandi baana bataji bami, ava duitsanini va tavula Fumu duyalesundila uji te na botsu bodugu.

³⁴Pa mutu ana nsala aji o ndagu andi yiri dugoba na mbela va gusu Nsambi. Mambu masusu nyutabula ava nyuruyila.