Read Punu 1 Corinthiens 12 Bible Online

1 Corinthiens 12 - Punu bible

1 Corinthiens 12

¹Mbana nyuwagula mu diambu dipegulu tsiYinyunyi yiNsambi. Baana bataji nyirondi yiri dujaba adivu dingensa mu diambu dipegulu tsieni.

²Jenu duijabi yiri ava dumabila abageduki Christ, dumakelusu na bakosi abagevosi na dumadunsu na bonyi.

³Jabanu rie: Pa mutu ana Yinyunyi yiNsambi agorungula uvosa rie: Jesus alogu! Na munongu mosi pa Yinyunyi yieni agaa nandi agorungula uvosa rie: Jesus aji Fumu!

⁴Pegulu tsipuela tsivu tumba Yinyunyi yiNsambi avu umosi buandi.

⁵Bisalu bipuela bivu tumba yika Fumu mosi buandi.

⁶Minongu mipuela minsalitsi mivu tumba Nsambi mosi buandi oyiveyi batu mangolu usala.

⁷Kabogu Yinyunyi yiNsambi eveyi mutu mutu pegulu ajivu jiwelimina uwamusa botsu.

⁸Yinyunyi yiNsambi wandi eveyi ombu mutu umosi posulu tsidiela tumba ombu ususu Yinyunyi eveyi posulu tsidujabu.

⁹La Yinyunyi yiNsambi oyiveyi ombu mutu ususu yitu ombu ususu eveyi mangolu ubelusa batu.

¹⁰Yinyunyi yiNsambi eveyi mutu mangolu uvaga bimaga nombu mutu ususu mbigulu nombu ususu ukelula mambu nojaba ameruyili ombu Yinyunyi yiNsambi na ameruyili ombu binyunyi bibi. Na eveyi ombu ususu mangolu uvosa mambembu masusu nombu ususu umakalula.

¹¹Tumba avu umosi buandi oyiveyi pegulu tsiotsu; etsigabili mutu mutu nana erondili.

¹²Christ avu nderi dunyuru aduvu na bilema bipuela diuleba bipuela tumba dunyuru dumosi duvu.

¹³Munongu mosi jetu botsu ne baJuif ne abagaa baJuif ne baviga na abagaa baviga tumabatusu va mosi na jionyi jimatuvaga dunyuru dumosi mu mbari Yinyunyi umosi avu. Jetu botsu tumanuisu na Yinyunyi yieni.

¹⁴Dunyuru dugaa yika yilema yimosi tumba duvu na bipuela.

¹⁵Mbe dikulu diuvosa rie: Ngaa dikaka kabogu ngaa muna, adina diudigandisa uba dikulu?

¹⁶Mbe dituji diuvosa rie: Ngaa disu, kabogu ngaa muna, adina diudigandisa uba dituji?

¹⁷Mbe dunyuru duotsu duvu yika dituji na ditujimbe durungula ugulu mbunga?

¹⁸Tumba Nsambi amasunda dunyuru na bilema biotsu nana amarondila.

¹⁹Dunyuru mbe dugoba pa duvu yika yilema yimosi.

²⁰Tumba duvu na bilema bipuela.

²¹Disu digorungula uvosa rie: Dikaka digaa na yisalu! Mum ugorungula uvosa rie: Makulu magaa na yisalu.

²²Ne pa tuilabi bilema bimosi bigaa na mangolu dunyuru dugobueji pa bigatsi.

²³Bilema abilabini nderi bideda tuibikelisi na buranga na bilema abigaa na kembu tuibikelisi wandi ne ubidibiga.

²⁴Tumba bilema abivu na kembu tuibisili nana mu mbari bivu biwelimina. Nsambi jaʼ beni amasundanyuru tsietu na bilema biotsu nana amarondila, diwendi rie: bilema bimosi bina bisalu uviolila bisusu.

²⁵Kabogu yilema yilema yivu na yisalu yiandi na yilema yilema yiwamusi yilema nandi.

²⁶Pa yilema yimosi yilabi maguga bilema biotsu bilabi maguga wandi. Pa yilema yimosi yikelusu bilema biotsu bilabi ubueji nandi.

²⁷Jenu botsu duvu dunyuru duChrist na mutu mutu aji nderi yilema.

²⁸Munongu mosi na dibundu, Nsambi amavega mutu mutu yisalu yiandi; abavu va gusu bilumbi mbana babiyitsi mbana milonsi va julu vana abavu na mangolu uvaga bimaga mbana abavu na mangolu ubelusa bibedu mbana abavu na mangolu uwamusa basusu mbana abavu na mangolu uwendisa basusu mbana abavu na mangolu uvosa mambembu masusu.

²⁹Botsu bagaa bilumbi vo babiyitsi vo milonsi, mbeyianu? Botsu bagaa na mangolu uvaga bimaga

³⁰vo ubelusa batu vo uvosa mambembu masusu vo umakalula, mbeyianu?

³¹Warisanu mirima yiri dudila pegulu atsivu tindi pegulu. Tumba nyudulasa ajivu jiviolila tsiotsu.