Read Punu 1 Corinthiens 14 Bible Online

1 Corinthiens 14 - Punu bible

1 Corinthiens 14

¹Dukanu durondu. Warisanu mirima yiri dudila pegulu tsibunyunyi, sinsa viri ajiubiga.

²Mutu oyivosi na mambembu masusu evosi yika na Nsambi; batu bagegulu mambu mandi mu mbari evosi mambu amamavegu na mangolu maYinyunyi.

³Tumba oyibiyi mambu maNsambi evosi ombu batu, ebawarisi na ebalubusi na ebavotsi mirima.

⁴Oyivosi mambembu masusu ekewarisa tumba oyibiyi mambu maNsambi ewarisi dibundu.

⁵Nyiina, nyina nsala yiri jenu botsu duvosa mambembu masusu tumba adi nyirondi viri adidi rie: Biganu mambu maNsambi. Oyivosi mambembu masusu agewamusi dibundu nana oyibiyi. Dibundu digodila mangolu pa agemakaluli.

⁶Baana bataji yika tsie ava nyuruyila ombu genu pa nyuvosa mambembu masusu, dugulu? Ngetasi. Malongi mami magaa na tsongu pa ngedusupulili motsu, diwendi rie: ne dulasu ne dujabu ne mbigulu tsimambu maNsambi.

⁷Legengilatianu dimbika vo ngomfi. Pa oyisiyi agejabi usiga abegulu bogulu kingu jiwelimina?

⁸Ne pa oyisiyi mumbanda agesiyi na buranga, bagora bojaba yiri diweru dimatola uwenda o divita?

⁹Munongu mosi duivosi mambu amagegulunu buranga, tsie bojabila ama duivosi? Bagogulu yika mapopopu?

¹⁰Mambembu mapuela mavu na kadi mbembu jigulunu.

¹¹Kabogu pa ngegulu mbembu nyiji muenyi ombu oyivosi nami na jandi aji muenyi ombu garni.

¹²Kabogu nana duna nsala jineni udila pegulu tsiYinyunyi yiNsambi warisanu mirima udila atsiuwamusa dibundu uroga.

¹³Mutu oyivosi mambembu masusu asambili yiri odila pegulu jiukalula.

¹⁴Pa nyisambili mu mambembu masusu nyisambili yika usambila tumba dujabu dugaa muna.

¹⁵Kabogu yi yivu yiwelimina? Ngosambila yika usambila buandi tumba nyusambila na dujabu wandi; ngowimbila yika uwimbila buandi tumba nyuwimbila na dujabu wandi.

¹⁶Yika tsie ndeʼ oyisambili yika usambila ugambu na dujabu, pa mutu okota o yibenguna na agegulu adi guivosi orungula ugabusila Nsambi diboti va mosi nagu?

¹⁷Digewendi rie: Gugesambili na buranga tumba adivu muna mutu ususu agowarusu.

¹⁸Nyigabusili Nsambi diboti mu mbari nyivosi mambembu masusu uviolila jenu botsu.

¹⁹Tumba o Ndagu Nsambi mbe ka menu nyusola uvosa ne mambu maranu amowarisa abegulu tsiri uvosa digumi ditosini tsimambu na mambembu masusu.

²⁰Bana bataji bami duyaba nana bangebi aborungula upupusu na puela matasa tumba royisanu dujabu. Diwelimina yiri duba nana baana mu diambu dimabi tumba mu diambu dudujabu rangiminanu yiri dumabanguga kala.

²¹Bisonu bisonugu rie: Fumu jandi rie: Nyuvosa na batu bebaba nyuvosa nogu na mambembu masusu ama benyi boposila. Tumba na nana batu bami bagokulu.

²²Kabogu pegulu jiuvosa mambembu masusu jimavegu uwamusa abasakavaga yitu tsiri uwamusa bango yitu tumba pegulu jiubiga mambu maNsambi jimavegu uwarisa bango yitu tsiri uwamusa abasakavaga yitu.

²³Kabogu pa duibenguni na botsu bevosi mambembu masusu na vokota batu abasakavaga yitu, bagovosa rie: Bamalaguga?

²⁴Tumba pa botsu bebiyi mambu maNsambi na vokota mua batu abasakavaga yitu vo mutu agusakaba mu dibundu, jaʼ beni ogulu yiri adivu nandi digaa diwelimina mbana okevega mbela

²⁵mu diambu dimambu ama egulu nesi amavu o tsi murima andi mojabunu na jandi okutama noyitsa Nsambi rie: Ngensa Nsambi aji nenu!

²⁶Kabogu yi yivu yiwelimina? Ayiyi rie: Ava duibenguniningi mutu umosi osola duimbu na mutu ususu olonsa na mutu ususu opalisa dulasu duNsambi na mutu ususu ovosa mu mambembu masusu na mutu ususu otsikalula. Motsu mavagungu uwarisa dibundu.

²⁷Pa va batu aberondi uvosa mambembu masusu, bayaviosulila; ne babeji vo barieru, mutu mutu va temu andi na mutu ususu atsikaluli.

²⁸Pa vagaa mukalusitsi bavoli sui na mutu mutu avosi na Nsambi o tsi murima andi.

²⁹Babeji vo barieru babiyi mambu maNsambi na basusu babi sui ukelula ama bevosi.

³⁰Tumba pa ususu edili dulasu ombu Nsambi oyivosi avoli yiri orungula upalisa dulasu.

³¹Divu diwelimina yiri botsu bobiga, mutu mutu na temu andi yiri batu bolonsu nowarusu.

³²Oyibiyi mambu maNsambi ajabi ukelisa pegulu.

³³Nsambi agaa Nsambi kumfu tumba aji Nsambi duvotsu. Nana divu diwelimina mu mabundu maNsambi

³⁴bagetu bavoli sui ava duibengunini; bagaa na musuga uvosa tumba bakesunsa nana migaga miNsambi mivosili.

³⁵Pa berondi utsiyisa diambu bawivuli balumi o mandagu mogu mu mbari digaa diwelimina yiri mugetu ovosa o Ndagu Nsambi.

³⁶Je Mambu maNsambi mamabandila nenu? Yika jenu adumalonsu?

³⁷Pa mutu etasi aji mubiyitsi uNsambi vo amadila pegulu tsiYinyunyi yiNsambi ajabi adi nyidusonini la diruma diFumu.

³⁸Pa mutu agedigulu duyamuemugulu.

³⁹Kabogu baana bataji warisanu mirima yiri dudila pegulu jiubiga mambu maNsambi na duyagubitsa batu uvosa mambembu masusu.

⁴⁰Vaganganu motsu na buranga tsiri na kumfu.