Read Punu 1 Corinthiens 15 Bible Online

1 Corinthiens 15 - Punu bible

1 Corinthiens 15

¹Baana bataji nyidurangimisi Musamu Uboti agu nyimadusamunina agu dumagulu na adu dumavayila yitu ayivu yiwara.

²Kabogu namunyi dumagobulu na duwara yika pa dukelisa malongi ama nyimadulonsa; pa tsiri nana dumamuvayila yitu kulini.

³Nyimaledulonsa ama nyimagulu. Diwendi rie: Christ amatufuila mu diambu dimasumu metu nana Bisonu bimasonugulu:

⁴amatsigu na amarambuga mu yilumbu yimuijeru nana Bisonu bimasonugulu

⁵mbana amaiabana ombu Pierre nombu digumi na babeji.

⁶Va julu vana amalabana ombu kama yiranu tsibadukitsi bandi abamabenguna va mosi. Bamosi va gari ogu bakivu monyu na basusu bamafu.

⁷Mbana amalabana ombu Jacques nombu bilumbi biotsu.

⁸Mbana amasita ulabana ombu garni ne nyisamanengulu nana basusu bamanengululu.

⁹Nyisawelimina na bilumbi, ngensa ngaa nyiwelimina unengulu yilumbi mu mbari nyimakiiana dibundu diNsambi.

¹⁰Nyiji nana nyivu mu diambu dimaboti maNsambi na maboti ama amandasa mamaba pa tsongu. Nyimasala uviolila bilumbi biotsu bisusu, tsiri menu ngana, nyimasala nana mu mbari Nsambi amandasa maboti mandi.

¹¹Kabogu nesi menu, nesi jogu, jetu botsu tumalonsa Musamu Uboti agu dumavayila yitu.

¹²Jetu tuilonsi rie: Christ amarambuga o dufu kabogu dibandu yi jenu bamosi duivosili rie: Vagaa durambugu duabafu?

¹³Pa dingensa, kabogu Christ asamarambuga.

¹⁴Pa Christ asamarambuga kabogu malongi metu magaa na tsongu na yitu yienu wandi yigaa na tsongu.

¹⁵Va julu vana tumafurila Nsambi mu mbari tumavosa rie: Nsambi amarambusa Christ o dufu; kabogu asamarambuga pa divu dingensa yiri vagaa durambugu duabafu.

¹⁶Mu mbari pa abafu bagerambuyi kabogu Christ asamarambuga.

¹⁷Na pa Christ asamarambuga, yitu yienu yigaa na tsongu na dukivu mu masumu.

¹⁸Munongu mosi abamafu mu Christ mbe bamatsiemuga.

¹⁹Pa yika mu monyu egugu ditasa dietu divu na tsongu kabogu tuji mu maguga uviolila batu botsu.

²⁰Adivu dingensa adidi rie: Christ amarambuga o dufu na aji nderi tuga ulasa yiri abafu borambuga wandi.

²¹Dufu dumabandila na mutu kabogu durambugu duabafu dumaruyila na mutu wandi.

²²Botsu befu mu diambu diAdam, kabogu botsu bodila monyu mu diambu diChrist

²³Tumba mutu mutu na temu andi, Christ amarela urambuga mbana jogu botsu abamafubana mirima nandi borambuga ava omueruyila.

²⁴Adin a diuba disukusulu, Christ olemana ubunga maruma motsu na musuga uotsu na mangolu motsu mbana ogabusa Durumu ombu Tata Nsambi.

²⁵Mu mbari Christ vengu oruma te na Nsambi obetsa bavinitsi botsu yiri boba o tsi durumu duandi.

²⁶Dufu aduvu muvinitsi agusita, dubungu wandi.

²⁷Bisonu bisonugu rie: Nsambi amasunsa botsu o tsi durumu duandi. Dilabini yiri Nsambi jaʼ beni agaa muna ava amasunsila botsu o tsi durumu duChrist.

²⁸Tumba ava botsu bamasunsulu o tsi Christ, Christ jaʼ beni okesunsa o tsi Nsambi agumasunsa botsu o tsi durumu duandi, diwendi rie: Nsambi oruma tindi umma.

²⁹Vavu batu abesingi ubatusu mu diambu diabafu, pa batu bagerambuyi dibandu yi bedivayili?

³⁰Na jetu dibandu yi tugerinini yidungu?

³¹Baana bataji, nyibufu bilumbu biotsu! Nyidipalisi mu mbari nyisangili mu diambu dijetu nenu atumafubana mirima mietu na Fumu etu Jesus Christ.

³²Pa nyimatoga na bibulu vava o Ephese yika mu mbari meʼ beni nyimaronda, yi nyudila mu dionyi? Kabogu pa abamafu bagerambuyi tudukianu nongu ajivosi rie: Tujianu feta mu mbari yika ufu tukafuanu.

³³Duyakedunsa, yimbatsi yibi yibivisi batu.

³⁴Dundanu kulini tsienu na duyamuevaga masumu. Yisonyi ombu genu, jenu basusu dugejabi Nsambi.

³⁵Mutu owivula rie: Tsie abafu borambuyila? Ava berambuyili nyuru tsiuba minongu yi?

³⁶Ka muna yiduka yi! Je ava guivarili bivaru, bibendi pa bigolefu?

³⁷Pa guivari putu, guitsoki disu tsiri yivaru; munongu mosi na tsangu tsisusu.

³⁸Nsambi evayi tsangu tsangu munongu.

³⁹Munongu mosi na musonyi na musonyi; batu bana munongu ogu na bibulu uogu na batsoli uogu na nyama tsimamba uogu.

⁴⁰Munongu mosi bisundu bijulu na bisundu bitsi bigaa dedi, diwendi rie: julu ana kembu tsijulu na vava tsi vavu kembu wandi.

⁴¹Ne bijalala bijulu bigaa dedi; wisi ana kembu jimosi na tsungi jisusu na bambuelili atsisusu; nesi mbuelili mbuelili kembu kembu.

⁴²Divu munongu mosi na jogu ava borambuyila o dufu. Ava mfumbi jimabuagulu jivu yika dunyuru aduiboli tumba ava mutu orambuyila o dufu dunyuru duandi duvu mugungula.

⁴³Ava mfumbi jimabuagulu jivu posi na yiunda tumba ava mutu orambuyila o dufu oba na kembu na dunyuru duwara.

⁴⁴Ava mfumbi jimabuagulu jivu yika mfumbi tumba ava mutu orambuyila o dufu oba na dunyuru dubunyunyi. Kabogu vavu minongu mibeji minyuru: atsilabi na misu na atsi bunyunyi.

⁴⁵Bisonu bisonugu rie: Dibaala aditega, Adam amasundu mutu; tumba Adam ajiusita la Yinyunyi yiNsambi ayiveyi monyu.

⁴⁶Yinyunyi yieni asamarela; mutu amarela mbana Yinyunyi amaruga.

⁴⁷Adam jitega amasundu na dufufundu; Adam ajimubeji amaruyila o julu.

⁴⁸Bisi butamba botsu bamasundu na difufundu munongu mosi nana jandi; na bisi julu bavu nana jandi agumaruyila o julu.

⁴⁹Munongu mosi nana tumabongila yibagunu yimuisi tsi, o gusu tubonga yibagunu yimuisi julu.

⁵⁰Kabogu baana bataji adi nyirondi uvosa adidi rie: Musonyi na malungu, diwendi rie: mutu agobialila Durumu duNsambi na mfumbi jigokaluga mugungula.

⁵¹Guluanu, nyidujabisi adimasuegu, adidi rie: Jetu botsu tugofu; ava mumbanda usigulu tusunda ufuikulu mu ditsabisa didisu. Bamfumbi borambuga mugungula na jetu botsu tufuikulu.

⁵²

⁵³Diwendi rie: Mfumbi jiukaluga mugungula; adumafu dukaluga adugoningula ufu.

⁵⁴Kabogu ava mfumbi jiukaluyila ne ava adufuila dukaluyila adugofu avana Bisonu biudugusu abimasonugu rie: Dufu dumabelusu na ndunga jimalabana.

⁵⁵Dufu ndunga agu jika? Dufu mangolu magu unemisa tnaka?

⁵⁶Masumu meveyi dufu mangolu unemisa na migaga miveyi masumu mangolu.

⁵⁷Diboti ombu Nsambi oyitulungisi mu diina diFumu etu Jesus Christ.

⁵⁸Baana bataji bami badurondu, banu bawara na banu na yisuebiri ava duisalili yisalu yiFumu na buranga. Jabanu rie: Ayi duisali va mosi na Fumu yiuba na tsongu.