Read Punu 2 Corinthiens 1 Bible Online

2 Corinthiens 1 - Punu bible

2 Corinthiens 1

¹Muganda egugu uiruyila ombu Paul nombu muana taji etu Timothee. Paul agumanengulu uba yilumbi yiJesus Christ mu duganu duNsambi. Tuidusonini jenu bisi dibundu diCorinthe, nombu batu baNsambi botsu abavu o Grace.

²Maboti maNsambi na duvotsu duandi bibi nenu mu diina diNsambi Taji etu na diFumu etu Jesus Christ.

³Tugabusilianu diboti ombu Nsambi ojivu Taji Fumu etu Jesus Christ, taji jiboti oyituwamusi mu motsu.

⁴Jandi etuwamusi mu maguga metu motsu yiri turungula uwamusa basusu mu mbari amatulonsa uwamusa.

⁵Kabogu tunofubana na maguga maChrist turungula uwamusu nandi wandi.

⁶Pa tuisingi ulaba maguga tuidivayi uduwamusa na udugobula; pa tumawamusu kabogu dumawamusu wandi na dumawamusu yiri duba na pugu ava dulabila maguga ama jetu botsu vengu tulaba.

⁷Tusakatsiemusa ditasa dietu ombu genu; tuijabi pa jetti nenu tulaba maguga va mosi kabogu tuwamusu va mosi wandi.

⁸Baana bataji tuirondi udurangimisa maguga ama tumalaba o Asie. Tumakambusu puela uviolila mangolu metu na tumatasa yiri yika ufu tukafu.

⁹Diwendi rie: Tumatasa yiri bamatuvega mbela dufu. Dimalabana utujabisa udeda uetu notujabisa mangolu maNsambi oyirambusi abafu.

¹⁰Ava tumalabila bidungu abi tumabufuila jandi amatuwamusa na otuwamusanga; na tuna ditasa ombu gandi yiri omuetuwamusa;

¹¹na jenu duituwamusi ava duisambilili. Kabogu tsambu tsipuela tsiugulunu na Nsambi otugabila miula na bapuela bosangila nomugabusila diboti mu dionyi.

¹²Tuisangili na mirima mietu migetuveyi mbela wandi va misu mabatu nesi ava tumabila nenu, nsanunu etu jimaba jiboti na jiwelimina: Nsambi amajibuejisa tsiri batu.

¹³Tuidusonini yika ama durungula uranga notsiyisa. Nyirondi yiri o gusu dutsiyisa motsu tsiri yika mua mambu

¹⁴yiri muna yilumbu yiFumu Jesus jenu dutusangila na jetu wetu tudusangila.

¹⁵Nyinolaba yitu yienu kumbu beji, nyimaba na nsala udulaba.

¹⁶Diwendi rie: ava nyuwendila o Macedoine na ava nyuruyila mbana durungula ukwamusa na muendu ami o Judee.

¹⁷Je pa nyirondi nana kabogu nyiji musotsi mubongu? Vo matasa mami mavu makulini yiri nyiwaguli nyiina na nesi mu diambu dimosi?

¹⁸Dingensa Nsambi ejabi yiri mambu ama tumadulonsa masamaba na kingu beji.

¹⁹Mu mbari Jesus Christ, Muana Nsambi agu jetu na Silvain na Timothee tumadusamunina agaa mutu oyivosi nyiina na nesi.

²⁰Ombu gandi vavu yika kingu mosi, ewaguli nyiina na pangini tsiotsu tsiNsambi. Mu diambu diJesus Christ jetu wetu turungula uwagula Amen uroyisa bundumba buNsambi.

²¹La Nsambi oyituwamusianu mu mambu maChrist na jaʼ beni Nsambi amatubiatsanu.

²²Jandi amatulasa yilimba yiri tuji abandi na va julu vana amatusila tuga, la Yinyunyi yiNsambi utudugusulu motsu.

²³Nsambi ejabi murima ami, aji mbeji. Nyisamaba na nsala udubuesa mufuna kabogu nyimabusa ugabuga o Corinthe.

²⁴Tsiri yisalu yietu uduruma mu mbari dumavayila yitu kala. La dibandu tuisalili va mosi nenu yiri dulaba tindi nsangu.