Read Punu 2 Corinthiens 11 Bible Online

2 Corinthiens 11 - Punu bible

2 Corinthiens 11

¹Kokolu tsienu, dugorungula uwarila mua buduka buami? Kululuanu!

²Nana Nsambi jaʼ beni ana diwavi menu wami nyiduwavi, jenu duvu nderi tsiemi aji nyimavangana uwetsa na dibaala, diwendi rie: Christ.

³Nana Eve amadunsulu na nyoga nyina keri yiri jenu dudunsu wandi na dudunda durondu dungensa duChrist.

⁴Mu mbari duigulu mutu oyiruyi udusamunina Jesus jisusu, tsiri Jesus aji tumadusamunina; na duisingi musamu ususu tsiri agu tumadusamunina.

⁵Dingensa ngaa nyiwelimina na bilumbi bienu?

⁶Tanguji ngejabi uvosa buranga tumba nyina dujabu duotsu; tumadujabisa ombu genu kala kala.

⁷Ava nyimadulonsila Musamu Uboti uNsambi nyisamaduwivula umfuta; diuleba nyimalaba yisonyi nyimadivaga uduwamusa. Kabogu nyimaduvayila dibi?

⁸Nyimakinda mabundu masusu umfuta ava nyimadusalila.

⁹Ava nyimabila nenu nyisamalasanga mutu ne umosi uvura mu mbari baana bataji o Macedoine bamatombila abi nyimaba na nsala. Ubongila na kala te na namunyi ngedulasingi maguga.

¹⁰Christ aji mbeji ami adi nyimavosa diulabana te na mabundu motsu maGrece.

¹¹Dibandu yi nyivayili nana? Diwendi rie: Ngedurondi? Nsambi ejabi yiri nyidurondi!

¹²Tumba adi nyivayi nyumuedivaganga yiri bilumbi bieni bisusu bigoba na mangolu unyema novosa rie: Tuisali yisalu yimosi.

¹³Babaala beni bavu bilumbi bimfurulu; bavu badunsitsi na befuri novaga nderi baji bilumbi biChrist.

¹⁴Tugokambulu mu dionyi ne diabu jaʼ beni orungula ukaluga nderi avu yiansa yiyijalala.

¹⁵Kabogu pa basalitsi bandi bevayi nderi baji basalitsi badusungugu tugokambulu mu dionyi. Bofutu dedi na bisalu biogu.

¹⁶Nyimuevosa rie: Mutu ayakengila nderi nyiji yiduka. Pa duikengili nderi yiduka nyivu nsingisianu ukematisa wandi.

¹⁷Diwendi rie: Adi nyivosi, nyivosi meʼ beni tsiri adi Fumu erondi, nyivosi yika mapopopu nderi nyivu yiduka.

¹⁸Basusu bekematisa mu diambu dimambu mabutamba kabogu menu wami nyukematisa.

¹⁹Jenu bango diela dugaa na diambu na biduka, mbeyianu?

²⁰Kabogu jenu dugaa na diambu na mutu pa edurumi ne pa edudiongi ne pa eduvayi baviga ne pa edulensi ne pa edudimbi mambata, mbeyianu?

²¹Ka muna yisonyi yi! Ka muna udeda gu tumadulasa! Pa mutu ususu ana bukidi ukematisa menu wami nyina bukidi udivaga (nyimuevosanana yiduka).

²²Jogu baji baHebreu? Na menu wami. Jogu baji baIsrael? Na menu wami. Jogu baji bategula baAbraham? Na menu wami.

²³Jogu baji basalitsi baChrist? Nyivosi nana mutu aguivosi biambila, ngebaviolili jogu botsu uba musalitsi uChrist? Nyimabaviolila usala; kumbu atsi nyimakotusu o tsugu tsiviolili atsiogu; mikasa ami nyimadimbu miviolili amiogu na nyimabufu uviolila jogu.

²⁴Kumbu yiranu nyimadimbu magumarieru na yifu yitsilu na baJuif.

²⁵Kumbu yirieru bisi Rome bamandimba mikasa; kumbu mosi nyimatindu mamanyi. Kumbu yirieru nyimaba mu dikumbi adimapumuga na kumbu mosinyimaviosa nyangu na mukolu o gari mamba.

²⁶Ava nyimalingilanga nyimalaba bidungu bipuela: bimanyidu na bibukongu; nyimalaba uvura na baJuif na abagaa baJuif; nyimalaba wandi bidungu bimisiengi na bikumu na bimubu na bibambatsi bamfurulu.

²⁷Nyimasalanga na mangolu temu na temu nyisamamuedilanga ne yilu; temu tsipuela nyimagulu nsala na puila; temu tsisusu nyimakambulu udila biguji na nyimaba yilayilayi na nyimalinganga penyi.

²⁸Va julu mambu meni motsu murima ami umafutsanga mu diambu dimabundu motsu.

²⁹Ava mutu odetsulu nyulaba uvura va mosi nandi. Ava evayili dibi nyilabi murima utsira va mosi nandi.

³⁰Pa nyupalisa amavu nami, diwendi rie: yika udeda uami nyipalisi.

³¹Diboti ombu Nsambi aguvu Taji Fumu Jesus, jandi aji mbeji ami na esingisili yiri ngefuri!

³²Ava nyimabila o Damas yivunda yibulongu amarumu na kaga Aretas ukanda misiengi nokaanga

³³tumba bamansundusa mu ditsa va diluta na nyimabarina.