Read Punu 2 Corinthiens 12 Bible Online

2 Corinthiens 12 - Punu bible

2 Corinthiens 12

¹Ne pa ngaa na tsongu nyukematisa! Adi nyirondi upalisa la biriariamu na ndasulu biFumu.

²Tuka digumi na bilima bina nyimajaba mutu uChrist, amabegu te no julu ajimurieru. (Ngejabi yeri ngensa dimalabana vo yika yiriariamu amalaba, yika Nsambi edijabi.)

³Nyimuevosa rie: Nyimajaba mutu agumabegu o paradis, (munongu mosi, ngejabi yeri ngensa dimalabana vo yika yiriariamu amalaba, yika Nsambi edijabi.)

⁴Ava amabila guna amagulu mambu mavura amagovosu na mutu.

⁵Kdbogu nyikematisa mu diambu dimutu eni; ngokematisa meʼ beni pa nyudivaga yika udeda uami nyipalisi.

⁶Ne pa nyukematisa ngoba yiduka mu mbari nyuvosa yika ngensa. Tumba ne nana ngokematisa mu mbari adi nyirondi adidi rie: Ngopalisa amami tumba mutu ususu jaʼ beni ondaba nyiji nyiwelimina.

⁷Nyinolaba biriariamu bieni nyimavegu buali, buali bueni bumaba nderi yilumbi yiSatan ayimasindugu undasanga maguga yiri ngobanganga na dunangu.

⁸Kumbu yirieru nyimawivula Fumu ubukusulila

⁹na jandi amakwagula rie: Maboti mami mavu mawelimina, ava gudetsulu mangolu mami molabana.

¹⁰La dibandu nyilabili yika ubueji, ne pa nyudeda ne pa bonsienga ne pa nyulaba purulu vo ne pa nyulaba munyongu; ngaa na diambu mu mbari Christ aji nami. Ava nyivu nyideda la vana nyivu na mangolu.

¹¹Nviina, nyivosi nderi yiduka ayimaruyila ombu genu. Diuleba nyiji yifufu divu diwelimina yiri dundodisa, tumba duidodisi yika bilumbi bienu.

¹²Nyimalasa yiri nyiji yilumbi ava nyimasalila va gari enu na pugu, diwendi rie: dumalaba bilimba na bimaga wandi.

¹³Nsingulianu nana dumalabila maguga uviolila mabundu masusu. Nyijabi yika dimosi buandi, nyisamaduwivula mbongu, mbeyianu? Tandianu dionyi!

¹⁴Temu ajiji ajimurieru uruga nyiruyi, ngoduwivula yima. Nyirondi udulaba, ngerondi mbongu tsienu. Digaa diwelimina yiri baana bokelisa bataji, adivu diwelimina yiri bataji bokelisa baana.

¹⁵Nyulaba ubueji uvega biami biotsu ne ukevega uduwamusa. Kabogu dibi nyivayi mu mbari nyidurondi nana?

¹⁶Dingensa nyisamaduvega mufuna, mbeyianu? Tanguji mutu ovosa rie: Nyimabasoga diela. Dingensa?

¹⁷Nyimadutindila yilumbi ayimadudionga?

¹⁸Nyimatinda Tite na muana taji ususu ombu genu. Je Tite amadudionga? Jetu nandi tugaa na posulu na bifu bimosi?

¹⁹Yika tsie? Duitasi tuivosi nana ukevega ndunga? Tsiri nana! Tuivosi motsu ama Christ esingisili nderi tuvu va gusu Nsambi. Kokolu tsienu, motsu ama tuivosi tuimavayi uduwamusa.

²⁰Nyilabi mua goma yiri ava tulabinina jetu botsu tulaba mirima mitsira. Diwendi rie: dugoba nana nyirondili na menu wami ngoba nana duirondili. Nyina goma yiri nyudurasuna na mitsundu na ngusu na divina na dugabu na dugelu na mfuengululu na dunangu na bakindu.

²¹Nyilabi goma wandi yiri ava nyuruyila Nsambi ondasa yisonyi. Diwendi rie: Nyunyoga mu mbari batu bamosi bamagabuga nsima na bamamuefuama mu nsoruru nesi mu buvuyisa.