Read Punu 2 Corinthiens 7 Bible Online

2 Corinthiens 7 - Punu bible

2 Corinthiens 7

¹Bambatsi badurondu, pangini tsietsitsi tsimavangunu netu! Kabogu tukeliomisanu, tsiri yika nyuru tsietu tumba na binyunyi wandi yiri tuba tindi balioma. Tutsanianu na goma jiNsambi.

²Turondianu na durondu dungensa. Tusamavayila mutu dibi na tusamagela mutu na tusamadionga mutu.

³Ngevosi nana uduvega mbela mu mbari nyimadulonsa kala yiri tuji va mosi; yeri tukivu monyu yeri tumafu.

⁴Nyimasunsa murima mu diambu dienu na nyidusangili temu na temu! Ne ava tumalabila maguga nyimawarila, murima ami umabasa de na nsangu.

⁵Ne ava tumatolila o Macedoine tusamadila temu uvuma. Mbura tsiotsu yika maguga na maguga; mitsundu na batu na goma o mirima.

⁶Tumba Nsambi amatutindila Tite.

⁷Tsiri yika durugu duandi buandi adumatuwarisa tumba viri mu mbari amatutsingula misamu mienu; nana duirondili undaba na nana mirima mienu mimatsirila na nana dumaposila yika biamusi na biamusi.

⁸Diuleba muganda ami umadutsirisa mirima, ngegabusi murima nsima mu uonyi. Nyinogulu yiri umadutsirisa mirima nyimalelaba uvura

⁹tumba namunyi nyilabi yika nsangu, tsiri mu mbari nyimatsirisa mirima mienu tumba mu mbari dunolaba mirima mitsira dumakalula diela. Diwendi rie: dumalaba mirima mitsira amivu miwelimina na Nsambi. Dusamasinga yiri utsira ueni udubetsa.

¹⁰Utsira agu Nsambi elabi uwelimina uikalusi mutu murima na uibeyi dugobutsu wandi, tumba utsira uotsu ususu uibeyi dufu.

¹¹Dumawarila utsira nana divu diwelimina na Nsambi kabogu labanu nana amasalila! Dumakelula motsu na dumagulu nsala jineni utulasa ndunga enu. Diuleba dumanyoga tumba dumalaba goma wandi. Va julu vana labanu nana uonyi umaduveyila nsala ubambana nami na nana yitu yienu yimawarila, la dibandu dumarondila ukilisa agumavaga dibi. Kabogu mu motsu dumatulasa yiri duna yika ndunga na ndunga.

¹²Kabogu ne nyimadusonina nana nyisamadivaga mu diambu dijandi agumavaga dibi nesi jandi agumavagu dibi. Nyimadusonina nana yiri dulasa va gusu Nsambi nana duituyitsili.

¹³Va julu uwara uenu tumalaba tindi nsangu ugulu nana dumakelisila Tite.

¹⁴Nyimadudodisa ombu gandi na dusamandasa yisonyi. Jetu tumadulasa yika ngensa na ngensa. Kabogu Tite wandi elabi ngensa etu.

¹⁵Ka muna durondu du duvu nandi ava erangimini nana dumamudedila! Agelibini wandi dumamulaba goma na dumaregama tumba ne nana dumamudila.

¹⁶Ka muna nsangu ji nyilabi mu mbari dusamandasa yisonyi!