Read Punu 2 Corinthiens 8 Bible Online

2 Corinthiens 8 - Punu bible

2 Corinthiens 8

¹Baana bataji, tuirondi udujabisa maboti maNsambi amavu na mabundu maMacedoine.

²Bamalabanga tindi maguga tumba ne nana bamavega mbongu tsietsitsi na nsangu diuleba baji bijaga.

³Nyisingisili bumbeji yiri jogu bamavega na murima umosi nana bamadilila na va julu vana bamaviosulila uvega.

⁴Bamatuwivula musuga na yindandi uwamusa aba Nsambi abavu o Judee.

⁵Ombu gogu tumalaba yimaga! Tetega bamakevega ombu Fumu mbana ombu getu mu mbari dionyi dimaba mu duganu duNsambi.

⁶Tumawivula Tite umanisila yisalu ayi amabanda noduwamusa na yisalu yietu yidurondu.

⁷Ombu genu pegulu tsimaviosululu, duna yitu na posulu tsiboti na dujabu na yisagumunu na duiturondi. Kabogu mu yisalu yieyiyi wandi viosulilanu uronda basusu.

⁸Ngedurumi. Nyirondi udulasa nana basusu berondisini na nyirondi ujaba nana durondu duenu duvu wandi.

⁹Jenu duijabi nana maboti maFumu etu Jesus Christ mamafuninanga; jandi amaba yisina ttimba mu diambu dienu amakaluga yijaga, bujaga buandi buduveyi busina.

¹⁰Adi nyilabi adidi rie: Uviolila ubueji yiri dulemana yisalu ayi dumabanda yilima ayimavioga. Jenu dumarela na ditasa uvega na dumarela uvega wandi.

¹¹Kabogu lensanu na yisalu ayi dumabanda! Rondanu umanisila motsu na vaganu motsu mawelimina.

¹²Mu mbari pa duna nsala ugabila batu, Nsambi odulaba na agokina miensili mienu.

¹³Ngerondi ugusulila basusu mufuna noduwakisa uonyi.

¹⁴Tumba nyilabi yiri duna mawelimina umana nsala tsienu kabogu divu diwelimina yiri duwamusa jogu abelabi maguga. Mbana ava dulabila maguga tanguji jogu boba na mawelimina umana nsala tsiogu na boduwamusa. Adina diuba diwelimina ombu botsu.

¹⁵Nana Bisonu bisonugulu rie: Jandi omagukiga bipuela asamasiala na yima na jandi omagukiga pesu asamagambu na yima.

¹⁶Tuigabusili Nsambi diboti mu mbari Tite aji nana jetu, erondi uduwamusa.

¹⁷Diuleba jetu tumaronda umusindiga ombu genu, jaʼ beni na duganu duandi amaronda udulaba.

¹⁸Oyiruyi nandi aji muana Taji oyisamuningi Musamu Uboti na bisi mabundu motsu bemudodisi.

¹⁹Va julu vana amasolu na bisi mabundu ulinga netu ava tuyenasalilanga ulasa durondu na bundumba buFumu nodulasa wandi yiri tuirondi uduwamusa.

²⁰Tuirondi uvaga motsu na bungela yiri bagoba musosi mu diambu dimiensili miemimi.

²¹Tuirondi uvaga mawelimina tsiri yika va gusu Fumu tumba va gusu batu wandi.

²²Kabogu tuisindiyi muana taji etu nogu, buranga. Jandi anogulu misamu mienu ana nsala uduwamusa wandi.

²³Mu diambu diTite aji mbatsi ami mu yisalu, jetu nandi tuiduwamusi; baana bataji basusu beruyili o mabundu masusu na beyitsingi Christ.

²⁴Kabogu balasianu durondu yiri mabundu motsu bolaba duonyi na dugusuanu motsu ama tumadudodisila yiri tugolaba yisonyi.