Read Punu Ephesiens 2 Bible Online

Ephesiens 2 - Punu bible

Ephesiens 2

¹Mbe ka jenu mbe dumakefuila mu diambu dikanda tsienu nesi masumu menu.

²Va temu eni dumadukanga mabi mabutamba buebubu; dumadedila yinyunyi ayirumi batu abelensi Nsambi.

³Jetu wetu tumalevaganga munongu mosi, tumanyungilanga na tumavaganga motsu nana tumarondilanga. Kabogu tumabanganga o tsi kabu Nsambi munongu mosi nana jogu.

⁴Ka muna yingeba yi! Ka muna durondu du!

⁵Diuleba tumafu na kanda tsietu tumba amaturambusa va mosi na Christ; maboti maNsambi mamatugobula.

⁶Tunofubana mirima na Christ, Nsambi amatumatisa o julu yiri turuma va mosi na Christ

⁷Amadivaga utulasa temu mosi mutubu nana maboti na durondu bimafuninanga mu Jesus Christ

⁸Dumagobulu na maboti maNsambi ava dumamuvayila yitu. Dugobutsu la pegulu jiNsambi; dugeruyili ombu genu.

⁹Dugaa na musuga unyema mu mbari duonyi dugeruyili mu bisalu bienu.

¹⁰Nsambi aji musunditsi na tunofubana mirima na Jesus Christ amagana yiri tusala bisalu biboti; bisalu abimaganu nandi kala kala.

¹¹Duyalibana yiri dugaa tindi baJuif. BaJuif abamarebu (bamarebu na batu) bedunengili abasarebu.

¹²Va julu vana va temu eni mbe dusakanonga na Christ. Mbe dusakaba basolu baNsambi dumaba yika benyi. Mbe Nsambi asakadurangula na pangini aji amavangana na batu bandi. Dusamaba na ditasa na Nsambi asamaba nenu.

¹³Tumba dunofubana mirima na Jesus Christ jenu adumaba vala dumabambana mu diambu didufu duandi.

¹⁴Mu mbari jaʼ beni Christ amatuvotsa ava amafubinina baJuif na abagaa baJuif te na bamakaluga dibuli dimosi. Diwendi rie: dunyuru duandi dumatsiemusa yibeni ayimabavaga bavinitsi.

¹⁵Amabunsa migaga mibaJuif amimaba na puela bingitsi yiri orungula ufubana malongu mabeji nobavaga batu bagona abavu na murima umosi nandi, diwendi rie: Amabavotsa.

¹⁶Christ amatsiemusa divina ava amatufuila va kurusu; diwendi rie: anofu va kurusu amanongisa malongu mabeji te na bamakaluga nderi dunyuru dumosi adu amagabusa ombu Nsambi.

¹⁷Jandi amaruga usamuna Musamu Uboti na duvotsu ombu botsu: ombu jenu aduvu vala nandi, diwendi rie: abagaa baJuif nombu baJuif abamabambana nandi.

¹⁸Ne abagaa baJuif ne baJuif banovayila Christ yitu borungula utola ombu Tata na mangolu maYinyunyi yiandi.

¹⁹Kabogu jenu adugaa baJuif duisaa benyi vo batu bangana; tumba duji bambatsi babatu baNsambi na duji baana baNsambi wandi.

²⁰Jenu duvu nderi ndagu ajimarungu va yibuga ayi bilumbi na babiyitsi bamasunda, Jesus Christ jaʼ beni la dimanyi ditega.

²¹Ndagu jiotsu jiwara na mangolu mandi la jandi oyirungisi ndagu andi na jiFumu wandi.

²²Jenu wenu duji muna yiri Nsambi odila mbura uyetsanisa Yinyunyi yiandi.