Read Punu Ephesiens 4 Bible Online

Ephesiens 4 - Punu bible

Ephesiens 4

¹Kokolu tsienu, menu aguvu muisi tsugu mu diambu diFumu, nyivosi rie: Tsananu nana divu diwelimina na Nsambi ava amadunengilila.

²Banu na buvolambombu na pugu na rondasananu.

³Keveganu mu duvotsu yiri duwarisa dinonga adi dumadilila ombu Yinyunyi yiNsambi adiduvayi umosi nandi.

⁴Vavu dunyuru dumosi na Yinyunyi yiNsambi yimosi nana vavu ditasa dimosi adi dumanengululu na Nsambi.

⁵Vavu Fumu mosi na yitu yimosi na batema jimosi

⁶vavu Nsambi mosi, Taji botsu aguvu Fumu botsu wandi na jandi erumi botsu.

⁷Nsambi amavega mutu mutu pegulu atsivu nderi miensili miChrist.

⁸La dibandu Bisonu bisonugulu rie: Anomata o julu amapalisa baviga na amavega pegulu ombu batu.

⁹Kabogu pa asamalesunduga ombu abafu, dibandu yi bevosili rie: Jandi amamata?

¹⁰Jandi omasunduga la jandi agumamata o julu julu tsiotsu uyelasa bundumba buandi mu mbura tsiotsu.

¹¹La jandi wandi agumavega pegulu ombu batu: amavaga bamosi bilumbi na basusu babiyitsi na basusu baEvangeliste na basusu baPasteur na milonsi.

¹²Amadivaga utsonsiga batu baNsambi botsu yiri borungula usala yisalu yiChrist nowarisa dibundu diandi

¹³te na jetu botsu tuba murima umosi na tutsiyisa dujabu duMuana Nsambi; diwendi rie: tubanguga te na tubagunu na Christ jaʼ beni.

¹⁴Mbana tugomuebagunu na mibiji amifunduyingi, diwendi rie: tugomueba nderi bangebi aborungula uduka ndunsulu nesi batu abesoyi diela.

¹⁵Tumba tuvosanga ngensa na durondu yiri tubanguga te na tudala Christ aguvu muru.

¹⁶Muru uirumi dunyuru duotsu nesi manyogu nesi bilema biotsu. Kabogu pa yilema yilema yivu polu dunyuru duotsu duinyeyi na duiwarisi; diuba munongu mosi netu pa tuna durondu.

¹⁷Kokolu tsienu, guluanu adi nyivosi mu diina diFumu: duyamuetsana nana batu abageduki Nsambi abavu na matasa makulini na abakivu o tsi pisama jimasumu.

¹⁸Mirima miogu mimagala te na bagaa na yiasi na Nsambi.

¹⁹Bagaa na yisonyi; bipumbi bavu na bevayingi minongu miotsu mimuinsi nana berondili.

²⁰Je dusamalewiji mambu memama ombu Christ?

²¹Dumagulu mbembu andi na dumalonsu ngensa ajivu na Jesus.

²²Kabogu dundanu bumutu abumadubamiga utsana kulini nokebunga na nsala tsindunsulu.

²³Mirima mienu nesi matasa menu bibi bigona.

²⁴Kaluganu tindi batu abamasundu mu yibagunu yiNsambi mbana nsanunu tsienu tsiulasa yiri duji tindi dusungama na ngensa jiNsambi.

²⁵Kabogu duyamuefura! Mutu mutu avosi ngensa na muana taji andi mu mbari jetu botsu tuji bilema bidunyuru dumosi.

²⁶Pa duinyoyi duyasinga yiri kabu jiudurombisa uvaga masumu; duyatsimisa wisi na kabu.

²⁷Duyasovisa diabu!

²⁸Jandi omadaganga ayamuedivaga tumba asalingi yiri jaʼ beni orungula uwamusa bijaga.

²⁹Duyamuevosa mambu mamuinsi yika maboti amorungula uwarisa jogu abemagulu.

³⁰Duyanyongisa Yinyunyi yiNsambi, jandi la tuga ajimaduvegu ava dumagobululu.

³¹Tsiemusanu diwavi na ngusu na kabu na nduku na dilensa na minongu miotsu mimbivulu abivu va gari enu.

³²Lasasananu maboti. Tandasananu mu diambu diChrist nana Nsambi amadutandila.