Read Punu Philippiens 3 Bible Online

Philippiens 3 - Punu bible

Philippiens 3

¹Baana bataji dimosi buandi nyibuesi rie: Sangilanu mu diina diFumu! Tsiri diambu divura ombu garni umuedusonina ama nyimaledusonina na monyi moduwamusa wandi.

²Kebananu na jogu abevayingi mabi aberondi udureba, baji nderi bamondi.

³Jetu, tsiri jogu, tuvu abarebu mu mbari tuisalili Nsambi na mangolu maYinyunyi yiandi na tuisangili mu diambu dinsanunu etu na Jesus Christ. Tugekipi bifu bibatu beni.

⁴Mbe ka menu nyurungula ubikipa. Pa mutu etasi yiri bionyi biurungula umukelisa, menu wami nyukelusu uviolila jandi.

⁵Nyimarebu tsona jitega yika nyiburu. Nyimaburu muJuif mu yifumba yiBenjamin, malungu mami mavu tindi malungu maHebreu. Nyimakelisanaga migaga uviolila baPharisie botsu

⁶te na nyimakuananga dibundu diotsu. Mbe mutu orungula usungugu na dululu dumigaga mbe nyimasungugu kala.

⁷Motsu mana nyimaletasa mavu na tsongu tumba namunyi nyijabi magaa na tsongu ombu garni mu diambu diChrist.

⁸Tsiri yika mambu meni, nyigengili motsu nderi magaa na tsongu yiri nyudila adivu diviolila ubueji la dujabu duJesus Christ, Fumu ami. Mu diambu diandi nyimabusa motsu nana nderi mavu mambi yiri nyudila Christ

⁹noba na dinonga didugu nandi. Ngomueba na dusungugu dumenu beni, diwendi rie: munongu agu mutu edili ava ededili migaga. Tumba nyina dusungugu adumavegu ava nyimavayila Christ yitu, diwendi rie: dusungugu duNsambi aduiruyili na yitu.

¹⁰Ama nyirondi viri la ujaba Christ nogulu mangolu madurambuga duandi

¹¹yiri nyurambuga menu wami o tsi dufu.

¹²Digewendi yiri nyimalunga kala vo nyimadugusu tumba nyivovini yiri nyudila, mu mbari menu wami nyimadilu na Jesus Christ.

¹³Baana bataji ngetasi yiri nyimadila tumba dimosi buandi nyivayingi, nyilibini motsu amavu o nsima na nyikevega o amavu o gusu.

¹⁴Nyivayi nderi mutu ayivovini te na olunga; ombu garni ulunga la uwagula mbila aji Christ amandengila.

¹⁵Kabogu jetu botsu atumawara mu Nsambi tubianu na ditasa dimosi. Pa jenu basusu duna disusu Nsambi odulasa dionyi.

¹⁶Ne nana tʼwendianu va mosi na tudukianu maruma ama tumaledukanga.

¹⁷Baana bataji kukulilianu jenu botsu. Tumaba yibagunu yiwelimina ombu genu kabogu tudukianu.

¹⁸Kala nyimadutsingula na namunyi nyimuebuesa uvosa nolila rie: Vavu batu bapuela abamakevaga bavinitsi bakurusu jiChrist.

¹⁹Uwenda bewendi o bulungi bumuji; nsambi tsiogu la nsala tsiogu tsibi, beyitsi amagaa mawelimina uyitsu nabetasi yika matasa mabutamba buebubu.

²⁰Tumba musiengi etu uvu o julu na tuivivi Mugobutsi aguiruyili o julu la Jesus Christ.

²¹Jandi aguvu na mangolu ututsa motsu, okalula nyuru tsietu notsibagusunu na dunyuru duandi dubundumba.