Read Punu Philippiens 4 Bible Online

Philippiens 4 - Punu bible

Philippiens 4

¹La dibandu bambatsi bami badurondu na baana bataji bami, waranu mu Fumu; duvu nsangu ami na nderi yisaku yiami.

²Evodie na Syntiche, kokolu tsienu banu na murima umosi mu Fumu.

³Na ndeju wandi mbatsi ami jisigama, nyiguwivuli uwamusa bagetu bebana mu mbari jogu bamasala nami mu yisalu yiMusamu Uboti nana Clement na bambatsi bami basusu bamasalila, miina mogu motsu mavu mu dibuku dimonyu.

⁴Sangilanganu Fumu, nyimuevosa rie: Sangilanganu.

⁵Buvolambombu buenu bujabunu na batu botsu. Durugu duFumu duka bebeli.

⁶Duyakambulu tumba mu mambu motsu jabisanu nsala tsienu ombu Nsambi mu tsambu na mu dulembu na mu kabusulu tsimaboti.

⁷Na duvotsu aduibandili na Nsambi aduvu aduviolila dujabu duotsu dubi nenu mu diina diJesus Christ.

⁸Baana bataji nyisiti na diambu diedidi rie: Tasanganu amaboti na mawelimina uyitsu, diwendi rie: amavu mangensa na maneni na masungama na malioma na mawelimina na amedodusu.

⁹Vaganganu motsu ama dumawiji na dumadila ombu garni tsiri yika malongi tumba dukanganu bifu biami wandi. Na Nsambi oyituveyi duvotsu abi nenu.

¹⁰Ka muna ubueji gu nyilabi na nsanunu ami na Fumu! Na nyilabi ubueji wandi mu mbari dumamuedila temu undasa durondu duenu. Kokolu tsienu, ngevosi yiri dumandunda tumba dusamaba na temu ukwamusa.

¹¹Ngevosi nana mu diambu dimaguga mami mu mbari nyimawiji kala usunsa murima nesi mu maguga nesi mu maboti.

¹²Nyijabi nsanunu tsibujaga nesi tsidigumba. Nyimalonsu kala, kabogu mu motsu na mu mbura tsiotsu nyiji sui, yeri nyina dikura vo nyina nsala, yeri nyina bima bipuela vo ngaa na yima.

¹³Nyurungula uwarila motsu mu mbari Christ ekwarisi.

¹⁴Ne nana jenu dumavaga buranga ukwamusa mu maguga mami.

¹⁵Jenu bisi Philippes duijabi buranga nana nyimabila ava nyimaruyila o Macedoine. Dibandu diyisalu usamuna Musamu Uboti, bujenu dumakwamusa, jenu dumawarila motsu nami.

¹⁶Ava nyimabila o Thessalonique dumatindila kumbu beji abimakwamusa ria nsala tsiami.

¹⁷Ngerondi miensili mienu buandi tumba nyirondi yiri dufunanga mu bisalu wandi.

¹⁸Nyimadila biotsu na nyina digumba. Nyinodila miensili ami dumatindila na Epaphrodite nyimalaba ubueji. Mivu nderi muyombu umbunga jiboti na nderi pagu aji Nsambi esingi ajimulasi ubueji.

¹⁹Nsambi ami na bundumba buandi abuvu mu Jesus Christ oduvega biwelimina na nsala tsienu.

²⁰Ombu Nsambi etu na Tata ubi bundumba bumutubu. Amen!

²¹Veganu mambolu ombu batu baNsambi mu diina diJesus Christ. Baana bataji abavu nami bedutindili mambolu.

²²Batu baNsambi botsu bedutindili mambolu, sinsa viri jogu abavu o ndagu kaga.

²³Maboti maFumu Jesus mabi nenu!