Read Punu Colossiens 1 Bible Online

Colossiens 1 - Punu bible

Colossiens 1

¹Muganda egugu uiruyili ombu Paul na Timothee. Menu Paul nyimanengulu uba yilumbi yiJesus Christ na duganu duNsambi.

²Tuidusonini jenu batu baNsambi na jenu baana bataji abasigama abavu o Colosses. Maboti maNsambi na duvotsu bibi nenu mu diina diNsambi Taji etu!

³Tuigabusili diboti ombu Nsambi, Taji Fumu etu Jesus Christ na tugeloyi usambila mu diambu dienu.

⁴Tumagulu nana dumavayila Jesus Christ yitu na nana dumarondila batu baNsambi botsu.

⁵Ava bulumbi bungensa, diwendi rie: Musamu Uboti umalonsulu, dumagulu ditasa adivu muna. Kabogu yitu yienu na durondu duenu bimabanda na ditasa dieni adimadusuegulu.

⁶Musamu Uboti umaduvega na uinyavingi o malongu motsu. Uonyi ufunanga mu mbura tsiotsu nana umafuninanga va gari enu ubongila va yilumbu ayi dumalegululu diambu dimaboti maNsambi.

⁷Va julu vana dumamuegulu malongi meni na Epaphras aguetu udurondu na mbatsi mu yisalu, jandi avu musalitsi usigama uChrist

⁸Amatutsingula diambu didurondu adu Yinyunyi yiNsambi amaduvega.

⁹La dibandu ubanda yilumbu ayi tumalegulu misamu mienu tusakaloga usambila mu diambu dienu. Tuisambili yiri Nsambi odulasa duganu duandi na yiri dudila diela na dujabu aduiruyili ombu Yinyunyi yiNsambi.

¹⁰Tuisambili wandi yiri duwendanga buranga va gusu Fumu; nobanganga baboti; nofunanga nobanguganga mu dujabu duNsambi.

¹¹Va julu vana duwarusu na mangohi mandi amavu maneni mu mambu motsu yiri duwara na pugu.

¹²Gabusilanganu Nsambi Taji enu diboti na nsangu, jandi omaduwelimisa udila dikabu va mosi na abandi abamapalila o pisama jimasumu.

¹³Jandi amatugobula ava tukivu o tsi pisama eni na amatubega te no Dunimu duMuana andi udurondu

¹⁴agumatujeyisa na agumatutandila masumu.

¹⁵Christ aji yibagunu yiNsambi ajigelabini. Aji tsomi na muru ubisundu biotsu.

¹⁶Va mosi nandi, jandi amasunda biotsu abivu o julu na abivu vava tsi abilabini na abigelabini na aberumi butamba buebubu wandi, diwendi rie: bafumu na barumitsi. Nsambi amasunda biotsu nandi na biotsu bivu abiandi.

¹⁷Jandi amabanganga ne biotsu bikasundu na biotsu bivu nana bivu mu mbari jandi ebiwarisi.

¹⁸Jandi aji muru udunyuru aduvu dibundu. Jandi aji dibandu dibiotsu na aji tsomi va gari abafu, diwendi rie: amarela urambuga kabogu avu mutu utega aguiviolili botsu.

¹⁹Dimatabulu na Nsambi jaʼ beni yiri Muana andi abi vana jaʼ beni.

²⁰Mbana amasinga yiri Muana ogabusa botsu ombu gandi. Diwendi rie: ava Muana amafuila va kurusu Nsambi amavotsa nguba jiotsu na botsu bamagabuga ombu gandi, nesi abavu vava tsi nesi abavu o julu.

²¹Va kala dumaba vala na Nsambi na dumakevaga bavinitsi ava dumavayila mambu mabi na ava mbe dukivu na matasa makulini.

²²Tumba dufu duMuana diimagabusa dinonga dienu na Nsambi. Diwendi rie: namunyi duji bambatsi tindi bambatsi bandi, abavu balioma na bagaa na mbela na abavu bawelimina ukota ombu gandi.

²³Waranu na duyapupusu tumba rangiminanu ditasa adi dumagulu ava dumalegululu Musamu Uboti. Menu Paul nyiji musalitsi uMusamu Uboti agumasamunu ombu botsu mu malongu motsu.

²⁴Nyilabi nsangu mu mbari nyilabi maguga mu diambu dienu. Maguga ama nyiwarili mu dunyuru duami memanisili maguga ama Christ amabanda ulaba mu diambu didibundu adivu dunyuru duandi.

²⁵Nyiji musalitsi mu dibundu dieni. Nsambi amapega yisalu yieyiyi mu diambu dienu. Yisalu yiami yivu usamuna Mambu maNsambi tsiri utsikadana.

²⁶Mambu meni amalemasuega ombu kula tsiotsu tumba namunyi emapalisi ombu batu bandi.

²⁷Duganu duNsambi duvu yiri batu botsu bojaba notsiyisa yisuegu yiandi ayivu yineni na yiviolila ubueji. Yisuegu la yiyi rie: Christ amafubana murima nenu, diwendi rie: dumagabana bundumba buNsambi va mosi nandi.

²⁸Kabogu jetu tuisamuni Christ ombu batu botsu. Tuitubusi batu botsu na tuibalonsi na dujabu duotsu yiri turungula ubega mutu mutu agumafubana murima na Christ ombu Nsambi.

²⁹La dibandu nyiwarili maguga maneni na nyisali mangolu ama Christ jaʼ beni epeyi.