Read Punu 1 Thessaloniciens 1 Bible Online

1 Thessaloniciens 1 - Punu bible

1 Thessaloniciens 1

¹Muganda egugu uiruyili ombu Paul na Silas na Timothee. Tuisonini jenu bisi Thessalonique jenu aduvu baana baNsambi Tata na baJesus Christ, Fumu etu. Maboti maNsambi na duvotsu bibi nenu!

²Jetu tuigabusilingi Nsambi diboti mu diambu dienu na tuidurangimini na tsambu ava tuimoyilingi na Fumu.

³Ava tuisambililingi Nsambi Taji etu tuirangiminingi yisalu yiyitu yienu na yisalu yidurondu duenu na uwara uditasa dienu adiruyili ombu Fumu etu Jesus Christ.

⁴Baana bataji tuijabi yiri Nsambi amaduronda na amadusola uba abandi.

⁵Nyiina, tumadusamunina Musamu Uboti tumba tsiri yika usamuna buandi; tumaruga na mangolu maYinyunyi yiNsambi na ngensa. Jenu beni duijabi nana tumabila va gari enu na nana tumaduwamusila.

⁶Jenu wenu dumatuduka na dumaduka Fumu wandi. Dunodila Mambu maNsambi dumakuanu puela ne nana dumalaba nsangu; dumawara na mangolu maYinyunyi yiNsambi.

⁷Mu diambu dienu bisi Macedoine na bisi Grece bamajaba amavu mawelimina uduka.

⁸Nyiina, Mambu maNsambi mamasamunu ombu bisi Macedoine nombu bisi Grece na va julu vana batu botsu mu mbura tsiotsu bamagulu nana dumavayila Nsambi yitu. Vagaa disusu adi jetu turungula ubuesa.

⁹Botsu bevosi nana jenu dumatudilila na nana dumabusila bakosi usalila Nsambi aguvu monyu na ngensa.

¹⁰Bevosi wandi nana duivivili Muana andi aguruyila o julu la Jesus agu Nsambi amarambusa o dufu na otugusula o tsi kabu Nsambi ajiulabana.