Read Punu 1 Thessaloniciens 2 Bible Online

1 Thessaloniciens 2 - Punu bible

1 Thessaloniciens 2

¹Baana bataji durungula usingisila bumbeji yiri tusamaruga kulini ombu genu.

²Duijabi yiri bisi Philippes bamatulasa maguga mbe tusakatola ombu genu. Ne nana Nsambi amatuwarisa, diuleba tumalaba maguga tumadusamunina Musamu Uboti uNsambi.

³Malongi metu magaa na nsimbulu vo mambu mamuinsi na tugedunsi batu.

⁴Tuilonsi nana Nsambi erondili mu mbari amatusola usamuna Musamu Uboti. Tugelonsi ulasa batu ubueji tumba tuirondi ulasa Nsambi ubueji oyijabi mirima mibatu botsu.

⁵Nana jenu duijabili, tusakadudunsa na tusamaba na ngusu, Nsambi aji mbeji etu!

⁶Tusamasinga yiri batu botudodisa; ne jenu ne basusu

⁷diuleba bulumbi buetu buChrist bumatuvega musuga udisinga. Tumba tsiri nana tumadukelisila; tumadukelisa nana nguji ekelisili baana bandi.

⁸Tunoduronda puela tumaba na nsala udusamunina Musamu Uboti uNsambi na tumaba na nsala wandi ukevega mu diambu dienu. Tumaduronda tindi uronda!

⁹Baana bataji jenu dugerangimini nana tumalabila maguga va gari enu? Nyangu na mukolu tumasalanga yiri tugodulasa uvura ava tumadusamunina Musamu Uboti uNsambi.

¹⁰Jenu na Nsambi duji bambeji yiri nsanunu tsietu tsimaba tsiboti na tsiwelimina na yiri tusamaba na mbela ava tumatsanina va gari enu.

¹¹Avai tumabila va gari enu tumaba nderi taji enu.

¹²Tumaduruma na tumadulonsa uwendanga na uwelimina na Nsambi oyidunengili utsana o tsi Durumu duandi aduvu na bundumba.

¹³La dibandu tuigabusilingi Nsambi diboti. Dunogulu Mambu maNsambi ama tumadulonsa, dumamagulu nana Mbembu Nsambi tsiri nderi metu. Nsambi esali va gari jenu adumamuvayila yitu.

¹⁴Baana bataji jenu na bisi mabundu maJesus Christ abavu o Judee duji dedi. Jenu dumalasu maguga na batu nenu nana jogu bamalasulu maguga na baJuif.

¹⁵BaJuif beni bamaboka Jesus na babiyitsi na bamatukuana wandi. Bagelasi Nsambi ubueji! Baji bavinitsi babatu botsu!

¹⁶Bamatugubitsa ulonsa abagaa baJuif yiri bakegobulu. Mu dionyi beroyisi masumu mogu! Tumba bolaba kabu Nsambi jiubagaanga.

¹⁷Baana bataji, jetu tunokakana nenu, tuvu na nsala jineni umuedulaba mu mbari mirima mietu mimasiala nenu.

¹⁸Temu beji jetu tumaronda uruga ombu genu, sinsa viri menu Paul, tumba Satan amatugubitsa.

¹⁹Yi tuivivi udila, agunyi nsangu etu jiruyisini vo diambu yi tusangila va gusu Fumu etu Jesus Christ ava oruyila! Tsiri jenu?

²⁰Nyiina, jenu duji nderi bundumba na nsangu etu.