Read Punu 1 Thessaloniciens 5 Bible Online

1 Thessaloniciens 5 - Punu bible

1 Thessaloniciens 5

¹Baana bataji tugaa na diambu umuedusonina nana mambu meni molabinina, diwendi rie: batemu vo maweru.

²Mu mbari jenu beni duijabi na buranga yiri yilumbu yiFumu yiuruga nana mudayitsi eruyili mukolu.

³Ava batu bovosila rie: Tuji mu duvotsu na tuikelusu buranga mbana dubungu dubasutusu. Bagomueba na temu urina; motsu moba nderi mugetu agumasutusu na misongu.

⁴Tumba baana bataji jenu dumalubusu yiri yilumbu yieni yigodusutisa nana mudayitsi esutisili.

⁵Jenu botsu duji nderi baana bayijalala, diwendi rie: baana banyangu. Tusaa aba mukolu, diwendi rie: aba pisama.

⁶Tuyawendanu bilu nana basusu bewendili bilu, tumoyianu na tuyalanganu.

⁷Mu mbari jogu abewendi bilu bebiwendi mukolu na jogu abelangi belangi mukolu.

⁸Tumba jetu atuvu aba yijalala tuyabanu na malangi, tubianu nana nderi tuiduari bitogulu biNsambi; yitu na durondu biuba nana yikutu yibudila na dugobutsu duba nana yisiemba.

⁹Mu mbari Nsambi asamatusola utulasa kabu andi tumba amatusola utugobula na Fumu etu Jesus Christ

¹⁰agumatufuila yiri tutsana va mosi nandi ne pa oturasuna monyu ne pa tulefu.

¹¹La dibandu lubusananu na warasananu nana duivayilingi.

¹²Baana bataji jetu tuidurumi udedila jogu abesali va gari enu, abamasolu na Fumu uduwendisa ne udulubusa.

¹³Barondianu mu diambu diyisalu yiogu. Sunsanu mirima mienu.

¹⁴Baana bataji tuidurumi wandi ulubusa jogu abetsani kulini. Bembiganu jogu abavu na munyongu na warisanu abadeda noba na pugu ombu botsu.

¹⁵Kebananu, mutu ayagabusa dibi ombu mutu nandi tumba avayingi maboti ombu botsu.

¹⁶Labanganu ubueji temu tsiotsu.

¹⁷Sambilanganu temu tsiotsu.

¹⁸Gabusilanganu Nsambi diboti mu mambu motsu mu mbari aduna la duganu duNsambi ava duitsanini na Jesus Christ.

¹⁹Duyatutsa Yinyunyi yiNsambi.

²⁰Duyalensa mbigulu.

²¹Kelulanu mambu motsu, kelisanu amavu maboti;

²²busanu minongu miotsu mimabi!

²³Nsambi oyiveyi duvotsu aduliomisi! Akelisi mutu mutu jaʼ uotsu, diwendi rie: murima na muvumu na dunyuru te na Fumu etu Jesus Christ omueruga.

²⁴Jandi omadunengila aji asigama na odugusu yisalu yiandi.

²⁵Baana bataji tusambililinganu.

²⁶Veganu mambolu madurondu ombu baana bataji botsu.

²⁷Nyidurumi na musuga uFumu rie: Ranganu muganda egugu jenu na baana bataji botsu.

²⁸Maboti maFumu etu Jesus Christ mabi nenu!