Read Punu Josue 1 Bible Online

Josue 1 - Punu bible

Josue 1

¹Moisc, musalitsi uFumu, anofu, Fumu amatsingula Josue muana dibaala uNoun, agumaba musalitsi uMoise rie:

²Moise musalitsi ami amafu; relama na sabuga mujamba Jourdain, jenu na batu bebaba botsu yiri duwenda o bulongu abu nyuvega baIsrael.

³Mbura tsiotsu atsi dutsiarila nyuduvega tsionyi nana nyimatsingulila Moise.

⁴Bulongu buenu bubandila o kumu no Liban te no mubu uneni o yiari ayi wisi ewendisini.

⁵Ne mutu mosi agorungula ugubetsa te na dufu duagu. Nyubanganga nagu nana nyimabila na Moise; ngogulibana, via, na ngogusila pinsa.

⁶Guyaregama na guyakambulu mu mbari ndeju agutolisa batu bebaba o bulongu abu nyimavangana uvega bataji bogu.

⁷Dimosi buandi guyaregama na guyakambulu ne pesu; dugusu migaga miotsu na usigama nana musalitsi ami Moise amagurumina; guyasumuna nesi umosi nesi ususu yiri gugokambulu mu amagu motsu.

⁸Dibuku diedidi dimigaga diyakakana nagu; ditasingi nyangu na mukolu yiri gusigama mu motsu amamasonugu muna; mbana gugokambulu mu amagu motsu: motsu mobueji tindi ubueji.

⁹Nyisamaguvega diruma diedidi rie: Guyaregama na guyakambulu? Sunsa murima na guyalaba keri mu mbari Fumu Nsambi agu aji nagu mu mbura tsiotsu atsi guwendanga.

¹⁰Josue amaruma bivunda bibagora diruma diedidi rie:

¹¹Nanganu milaku na rumanu batu rie: Kunsamanu, yika bilumbu birieru bisiali mbana dusabuga Jourdain uyedila bulongu abu Fumu Nsambi enu oduvega.

¹²Josue amatsingula baRuben na baGad na yiasi yiyifumba yiManasse rie:

¹³Rangiminanu adi Moise musalitsi Fumu amaduruma ava amavosila rie: Fumu Nsambi enu amadusingisa utsana o bulongu buebubu o yiari ayi wisi epalili jiJourdain.

¹⁴Yika bagatsi benu na baana benu na migamba mienu biusiala o bulongu abubu abu Moise amaduvega o disimu diedidi diJourdain. Tumba jenu babaala botsu abavu na mangolu dukavioga na mata va gusu baana bataji benu ubawamusa

¹⁵te na Fumu osingisa baana bataji benu udila bulongu abu Fumu Nsambi enu obavega nana jenu dumadilila. Mbana dukagabuga uyedila bulongu buenu abu Moise musalitsi uFumu amaduvega o disimu diedidi diJourdain o yiari ayi wisi epalili.

¹⁶Bamawaka Josue rie: Tuvaga motsu ama gutsituruma na tuwendanga mbura tsiotsu atsi gutusindiganga.

¹⁷Tugudedila mu mambu motsu dedi mosi nana tumadedila Moise. Dimosi buandi, Fumu Nsambi agu abi nagu dedi mosi nana amabila na Moise!

¹⁸Mutu uotsu aguba mumbini nesi agulensa maruma magu, aboku. Dimosi buandi guyaregama na guyakambulu.