Read Punu Josue 10 Bible Online

Josue 10 - Punu bible

Josue 10

¹Adoni-Sedec kaga jiJerusalem amagulu yiri Josue amadila Ai na amagupansa, va julu vana amagulu yiri amavayila Ai na kaga andi dedi mosi nana amavayila Jericho na kaga andi. Amagulu wandi yiri baGabaon bamanonga na baIsrael na betsani va mosi.

²Kabogu amagaangu na tindi goma mu mbari Gabaon umaba tindi musiengi uneni, dedi mosi nana musiengi umosi va gari misiengi mikaga ne uviolila uAi uroga na babaala bandi botsu bamaba bangogaga.

³Adoni-Sedec, kaga jiJerusalem amaruma mutu utsingula Hoham, kaga jiHebron na Piram kaga jiYarmout na Yafia kaga jiLakich na Debir kaga jiEglon rie:

⁴Ruganu uyikwamusa utoyisa baGabaon mu mbari bamanonga na Josue na baIsrael.

⁵Bakaga baranu baAmor: kaga jiJerusalem na kaga jiHebron na kaga jiYarmout na kaga jiLakich na kaga jiEglon bamabenguna va mosi na bamawenda na bagora botsu; bamayevaga milaku miogu bebeli na Gabaon na bamagutoyisa.

⁶BaGabaon bamasindiga batu uyetsingula Josue o milaku miGuilgal rie: Guyabuaga basalitsi bagu, lensa noruga uyituwaka kalala! Bakaga botsu baAmor abetsanini o mukongu bamabenguna ututoyisa!

⁷Josue amarambuyila o Guilgal na bagora bandi botsu na bangogaga bandi botsu.

⁸Fumu amatsingula Josue rie: Guyabaduma! Nyimabawakisa ombu gagu ne umosi va gari ogu agorungula ugubetsa.

⁹Josue amabasutusu mu mbari amawenda mukolu na mukolu urambuyila o Guilgal.

¹⁰Fumu amabapansa yiari na yiari va gusu baIsrael; baIsrael bamabagudisa tindi ugudisa bebeli na Gabaon na bamababingisa mu nsila jiBet-Horon na bamababelisa te na Azeca na Maqueda.

¹¹Ava bamayenarininanga baIsrael na ava bamavindimina Bet-Horon, Fumu aguvu o julu amababondusila mfula jimamanyi maneni te na Azeca na bamafu; jogu abamaboku na mfula jimamanyi dutalu duogu dumaba duneni uviolila abamaboku na majenga mabaIsrael.

¹²Mbana Josue amavosa na Fumu muna yilumbu ayi Fumu amawakisila baAmor ombu baIsrael, amavosa va misu mabaIsrael rie: Wisi, sikama va Gabaon, Na ndeju tsungi, sikama va yibususu yiAyalon!

¹³Wisi umasikama na tsungi jisamamuebanganga te na baIsrael bamagabusila bavinitsi bogu pila. Adina disamasonugu mu dibuku diJuste? Muna yilumbu yieni, wisi umasikama va muangulu; usamawenda mbura yilumbu yimfuimbila.

¹⁴Vasakamueba yilumbu nana yilumbu yieni nesi va kala na yigomueba, ayi Fumu amagululu diufi dimutu: Fumu jaʼ beni amatoyila baIsrael.

¹⁵Josue na baIsrael botsu bamayenagabuga o milaku miGuilgal.

¹⁶Bakaga beni baranu bamarina te na bamayesuema o dilima o Maqueda.

¹⁷Bamayetsingula Josue rie: Bakaga beni baranu usuema besuemi o gari dilima o Maqueda.

¹⁸Josue amaruma rie: Bungasananu mamanyi maneni va dikotulu didilima na sunsanu babaala bamosi vana ubakelisanga.

¹⁹Tumba jenu duyasikama, bingisanu bavinitsi benu; bakakilianu, duyabasingisa utola o misiengi miogu mu mbari Fumu Nsambi enu amabawakisa ombu genu.

²⁰Josue na baIsrael banobagudisa tindi ugudisa na banobelisa botsu, jogu abamadila nsila urina bamayesuemina o misiengi amivu tindi mikandu.

²¹BaIsrael botsu bamagabuga na buranga o milaku ombu Josue o Maqueda. Ne mutu mosi asamarungula ugagana na baIsrael.

²²Mbana Josue amaruma rie: Dibulanu dilima, palisanu bakaga beni baranu, dukabambeyila.

²³Kabogu bamamubeyila bakaga beni baranu, diwendi rie: kaga jiJerusalem na kaga jiHebron na kaga jiYarmout na kaga jiLakich na kaga jiEglon.

²⁴Banobega bakaga beni ombu gandi, Josue amanengila babaala botsu baIsrael na amaruma bivunda bibagora abimawenda nandi rie: Bambananu, tsiarilanu bakaga beni va makingu. Bivunda bamabatsiarila va makingu mogu.

²⁵Josue amabatsingula rie: Sunsanu mirima, duyalaba keri na duyaregama! Duyakambulu, Fumu ovayila abetoyi nenu dedi mosi.

²⁶Va julu vana Josue amababokisa na amabaviunsa va miri miranu, bamaba balelama te na tsisiga.

²⁷Ava tsisiga Josue amaruma rie: Basundusianu! Bamababuaga o dilima adi bamalesuemina na bamadibiga dilima na mamanyi maneni, monyi mavu vana te na namunyi.

²⁸Josue amapansa Maqueda muna yilumbu yieni na amaboka kaga na bisi musiengi udugusu mugeli; vasamarina ne umosi na amavayila kaga jiMaqueda dedi mosi nana amavayila kaga jiJericho.

²⁹Josue na baIsrael botsu bamarambuyila o Maqueda uwenda o Libna, bamatoyisa bisi Libna.

³⁰Fumu amawakisa kaga musiengi eni ombu baIsrael, bamababokisa, basamarinisa ne umosi na bamavayila kaga dedi mosi nana bamavayila kaga jiJericho.

³¹Josue na baIsrael botsu bamarambuyila o Libna uwenda o Lakich; bamavaga milaku va gusu musiengi eni na bamabatoyisa.

³²Fumu amawakisa Lakich ombu baIsrael yilumbu ayimubeji na bamaboka bisi musiengi eni na bamaguvaga dedi mosi nana bamavayila Libna.

³³Mbana Horam kaga jiGuezer amawenda uyewamusa bisi Lakich. Josue amamubelisa na bagora bandi na basamarinisa ne umosi.

³⁴Josue na baIsrael botsu bamarambuyila o Lakich uwenda o Eglon; bamavaga milaku va gusu musiengi eni na bamabatoyisa.

³⁵Muna yilumbu yieni udugusu mugeli amabapansa tindi upansa musiengi nana bamapansila Lakich.

³⁶Josue na baIsrael botsu bamarambuyila va Eglon uwenda o Hebron na bamayebatoyisa.

³⁷Bamapansa musiengi na bamaboka botsu nesi kaga. Bamapansa nesi misiengi amimarumu na uonyi na bamaboka botsu abamaba muna. Josue asamarinisa ne umosi dedi mosi nana amavayila o Eglon udugusu mugeli.

³⁸Josue na baIsrael botsu bamawenda o yiari yiDebir na bamatoyisa bisi musiengi.

³⁹Bamagupansa na kaga na misiengi miotsu amimarumu na uonyi. Bamababoka botsu abamaba muna udugusu mugeli na basamarinisa ne umosi. Josue amavayila kaga jiDebir dedi mosi nana amavayila bakaga baHebron na kaga jiLibna.

⁴⁰Josue amabelisa bulongu buotsu: amabetsa bakaga abamaba o mikongu nesi o tandu nesi o kumu nesi o mitsumba; asamarinisa ne jimosi na udugusu mugeli amapansa botsu abamaba muna, dedi mosi nana Fumu Nsambi Israel amamurumina.

⁴¹Josue amababelisa ubandila o tandu o Cades-Bamea te no Gaza, amabelisa bulongu buotsu buGochen te no Gabaon o banda.

⁴²Va temu mosi Josue amabelisila bakaga beni botsu na malongu mogu mu mbari Fumu Nsambi Israel, jaʼ beni amatoyila baIsrael.

⁴³Mbana Josue na baIsrael botsu bamayenagabuga o milaku o Guilgal.