Read Punu Josue 13 Bible Online

Josue 13 - Punu bible

Josue 13

¹Josue amanuna tindi ununa. Kabogu Fumu amamutsingula rie: Ndeʼ gumanuna tindi ununa na malongu ama vengu gudila makivu mapuela.

²Malongu amesiali amama: mavula motsu mabaPhilistin na bulongu buotsu bubaGuechourie

³ubandila o mujamba uChihor aguivindimi o yiari yiEgypte te no mandilu maEcron o banda, yiasi yibulongu abukelusulu bisi Canaan na ayina baana babakaga baranu babaPhilistin betsanini, diwendi rie: Muana kaga uGaza na uAsdod na uGath na uEcron na baAvie betsani guna wandi;

⁴ubandila o tandu bulongu buotsu bubisi Canaan na Ara abuvu bubisi Sidon te no Afec no mandilu mabaAmor;

⁵bulongu bubaGuebal na Liban buotsu o yiari ayi wisi epalili ubandila o Baal-Gad o banda mukongu uHermon te no Lebo-Hamat;

⁶na bisi mukongu botsu ubandila o Liban te no Misrefot-Maim na bisi Sidon botsu. Nyubabingisila baIsrael. Dimosi buandi buaga mbanda uveyila baIsrael bulongu bueni disiala nana nyimadurumina.

⁷Gaba malongu meni muna makabu va gari yifu yibifumba na yiasi yiyifumba yiManasse.

⁸BaRuben na baGad na yiasi yisusu yiyifumba yiManasse bamadila disiala diogu kala adi Moise amabavega o disimu dina diJourdain o yiari ayi wisi epalili nana Moise musalitsi uFumu amabaveyila

⁹ubandila o Aroer mu migula mimujamba uAmon na ubandila o musiengi aguvu o yibususu na kumu jiotsu jiMedeba te no Dibon;

¹⁰na misiengi miotsu miSihon kaga jibaAmor agumarumanga o Hechebon te no mandilu mabaAmmon;

¹¹Galaad bulongu bubaGuechour na bubaMaaka na mukongu uotsu uHermon na Bachan jiotsu te no Salka;

¹²na bufumu buotsu buOg o bulongu buBachan agumarumanga o Achetarot no Edrei agumaba nsialutsu mosi buandi jibaRefaim. Moise amabelisa bakaga beni na amababingisa.

¹³Tumba baIsrael basamabinga baGuechourie na baMaaka la dibandu betsaningi va gari baIsrael te na namunyi.

¹⁴Yika yifumba yiLevi ayi Moise asamavega dikabu didisiala; pagu tsiunyensa atsimasielusunu o muji va gusu Fumu Nsambi Israel atsina tsimaba disiala diogu nana amarumunu.

¹⁵Moise amavega yifumba yiRuben dikabu adimaba dedi na mikuta miogu.

¹⁶Bulongu abu bamadila bumabandila o Aroer va mugula umujamba uAmon na musiengi aguvu o yiari yiyibususu na kumu jiotsu ajivu bebeli na Medeba

¹⁷na Hechebon na misiengi miotsu amivu o kumu, diwendi rie: Dibon na Bamot-Baal na Bet-Baal-Meon

¹⁸na Yahas na Quedemot na Mefaat

¹⁹na Quiriataim na Sibma na Seret-Chahar o julu mukongu uyibususu

²⁰na Bet-Peor na migula miPisga na Bet-Yechimot

²¹na misiengi miotsu mikumu na bufumu buotsu buSihon kaga jiAmor agumarumanga o Hechebon: Moise amamubelisa na baana babakaga botsu baMadian, diwendi rie: Evi na Requem na Sour na Hour na Reba baana babakaga abamavinga Sihon, jogu abamatsaninanga muna bulongu bueni.

²²Va gari botsu aba baIsrael bamaboka, bamabokisa nesi muvanditsi, diina diandi Balaam muana dibaala uBeor.

²³Mujamba uJourdain umaba mandilu mayifumba yiRuben. Adina la disiala diyifumba yiRuben muna mikuta miogu na misiengi na mimbu amamabambana.

²⁴Moise amavega yifumba yiGad dikabu adimaba dedi na mikuta miogu.

²⁵Jogu bamadila bulongu buYazer na misiengi miotsu miGalaad na yiasi yibulongu bubaAmmon te no Aroer va nsungisini na Rabba,

²⁶ubandila o Hechebon te no Ramat-Mispe na Betonim, ubandila o Mahanaim te no mandilu maLo-Dabar

²⁷no yibususu na Bet-Haram na Bet-Nimra na Soukot no Safon, diwendi rie: nsialutsu jibufumu buSihon agumaba kaga jiHechebon, mujamba uJourdain umaba mandilu te no mugula umubu uGenesareth o disimu dina diJourdain o yiari ayi wisi epalili.

²⁸Adina la disiala diyifumba yiGad muna mikuta miogu na misiengi na mimbu amamabambana.

²⁹Moise amavega yiasi yiyifumba yiManasse dikabu adimaba dedi na mikuta miogu.

³⁰Bulongu buogu abu bamadila bumabandila o Mahanaim te no bulongu buotsu buBachan na bufumu buotsu buOg agumaba kaga jiBachan na migula miotsu miYair o bulongu buBachan, diwendi rie: magumasiamunu mamisiengi.

³¹Yiasi yiGalaad na Achetarot na Edrei, diwendi rie: misiengi mibufumu buOg o Bachan mimavegu ombu yifumba yiMakir, muana dibaala uManasse muna mikuta miogu.

³²Amana la makabu ama Moise amabagabila o kumu tsiMoab o disimu dina diJourdain va nsungisini na Jericho o yiari ayi wisi epalili.

³³Tumba Moise asamavega yifumba yiLevi disiala; amabatsingula rie: Disiala dienu divu usalila Fumu Nsambi Israel.