Read Punu Josue 14 Bible Online

Josue 14 - Punu bible

Josue 14

¹Guluanu disiala adi baIsrael bamadila o bulongu buCanaan adi Elazar, muvagulitsi upagu na Josue muana dibaala uNoun na bivunda bibaIsrael bamabagabila.

²Bulongu bumagabu na mbanda nana Fumu amarumina Moise ugabila yifu yibifumba na yiasi yiyifumba.

³Moise amavega bifumba bibeji na yiasi yiyifumba disiala o disimu dina diJourdain. Tumba asamavega bisi Levi abamaba nogu disiala.

⁴Bategula baJoseph bamaba bifumba bibeji: yiManasse na yiEfraim. Bisi Levi bamadila yika misiengi buandi ami bamatsaninanga na mbura tsiukelisa migamba miogu nosueyila bima biogu.

⁵BaIsrael bamagaba bulongu nana Fumu amarumina Moise.

⁶Yilumbu yimosi baJuda bamabambana ombu Josue mu Guilgal. Caleb muana dibaala uYefounne agumaba mu yifumba yiQuenaz amamuwivula rie: Guijabi adi Fumu amatubulila Moise agumaba mutu Nsambi mu diambu dijetu nagu o Cades-Bamea?

⁷Nyimaba na magumana mabilima ava Moise musalitsi uFumu amansindiyila uyesieenga bulongu ava tumabila va Cades-Bamea, nyimamutsingula misamu na posulu tsiwelimina.

⁸Baana bataji bami abamawenda nami bamadetsa batu mirima, tumba nyimadukanga Fumu Nsambi ami na murima ami uotsu.

⁹Muna yilumbu yieni Moise amalevila pesi ava amavosila rie: Bulongu abu gumatsiarila buba disiala diagu te na mutubu, diwendi rie: abuagu na bategula bagu mu mbari gumadukanga Fumu Nsambi agu na murima agu uotsu.

¹⁰Guluanu magumana na bilima biranu biotsu bina Fumu amakelisanga nana amavosila na Moise ava baIsrael bamabila o kumu. Namunyi nyina magumidunana na bilima biranu.

¹¹Nyikivu na mangolu dedi mosi nana yilumbu ayi Moise amansindiyila uyesieenga bulongu, mangolu amamaba nami mu temu eni makivu nami, nesi utoga divita nesi usala yisalu yiotsu.

¹²Kabogu peyi yiari yimikongu mieni ami Fumu amaposila va temu eni; mu mbari gumajaba yiri baAnac aguna betsanini na aguna uvu misiengi mineni na mikandu. Tanguji Fumu oba nami na nyubabinga nana Fumu amavosila.

¹³Josue amagabila Caleb muana dibaala uYefounne miula, na amamuvega Hebron disiala.

¹⁴Anana Caleb muana dibaala uYefounne agumaba mu yifumba yiQuenaz amadilila Hebron disiala te na namunyi mu mbari amadukanga Fumu Nsambi Israel na murima andi uotsu.

¹⁵Kala Hebron umanengulungu Quiriat-Arba: Arba amaba dibaala adimaba tindi mukuimbi va gari baAnac. Mbana bulongu bumaba lingi, busamamueba na mavita.