Read Punu Josue 16 Bible Online

Josue 16 - Punu bible

Josue 16

¹Dikabu adimadilulu na mbanda na yifumba jiJoseph dimabandila o mujamba uJourdain bebeli na Jericho o yiari yimujamba uJericho o yiari ayi wisi epalili. Mandilu mamaduka kumu ajibandili o Jericho te no Bethel o yiari yimukongu.

²Mamavioyila o Bethel te no Louz na mamavioga o yiari yimandilu mabaArkie o yiari yiAtarot,

³mbana mamavindama o yiari ayi wisi ewendisini o yiari yimandilu maYafletie te no mandilu maBet-Horon jibanda te no Guezer uyepalila o mubu.

⁴Adina baana bababaala baJoseph, Manasse na Efraim bamadila disiala diogu.

⁵Mandilu mayifumba yiEfraim na mikuta miogu amama: mandilu madisiala diogu mamaba o yiari ayi wisi epalili, diwendi rie: O Atrot-Addar te no Bet-Horon o tandu.

⁶Mamavindama te no yiari ayi wisi ewendisini o Mikmetat o banda na mamayinguga o yiari ayi wisi epalili o yiari yiTaanat-Silo na mamamuevindama o yiari ayi wisi ewendisini o yiari yiYanoa.

⁷Ubandila o Yanoa mamavindama o Atarot no Naara na mamaleduku o Jericho te no yeputama o mujamba uJourdain.

⁸Ubandila o yiari ayi wisi epalili mamavindama o Tappoua o yiari yimujamba uCana uyepalila o mubu. Adina dimaba disiala diyifumba yiEfraim na mikuta miogu.

⁹Yifumba yiEfraim yimaba na misiengi na mimbu amamabambana va gari disiala diyifumba yiManasse.

¹⁰Basamabinga bisi Canaan abamatsaninanga o Guezer na bisi Canaan betsaningi va mosi na baEfraim, te na namunyi bavu baviga bogu.