Read Punu Josue 20 Bible Online

Josue 20 - Punu bible

Josue 20

¹Fumu amatsingula Josue rie:

²Tsingula baIsrael rie: Solanu misiengi miusuemina nana nyimarumina Moise udutsingula.

³Pa mutu amaboka mutu yivelu tsiri uleditasa orungula uyesuema o musiengi umosi va gari misiengi mieni, anana orinina mugabusilitsi upila.

⁴Mutu eni orina te no musiengi mosi, avana osikama va dikotulu dimusiengi te na otubulila bivunda bimusiengi diambu diandi, bomudila o musiengi na bomuvega mbura; mbana otsananga nogu.

⁵Pa mugabusilitsi upila omuduka bagomuwakisa mutu eni mu mbari asamabokisa mutu nandi na kanda, basamaleba bavinitsi na kala.

⁶Otsananga o musiengi eni te na otabululu bunsonsi na dibuli nesi te na muvagulitsi upagu utemu eni ofu. Va temu eni mutu eni ogabuga uyetsana o musiengi andi nesi o ndagu andi, diwendi rie: O musiengi agu amarinina.

⁷Bamasola Quedech o Galilee o julu mukongu uNeftali na Sichem o mukongu uEfraim na Quiriat-Arba aguvu Hebron o mukongu uJuda.

⁸No disimu dina diJourdain o yiari ayi wisi epalili yiJericho bamasola Besser o tsi jigumuga o kumu o yiari yiyifumba yiRuben, na Ramot o Galaad o yiari yiyifumba yiGad na Golan o Bachan o yiari yiyifumba yiManasse.

⁹Amina mivu misiengi amimasolulu baIsrael botsu nesi usuemina guna yiri mugabusilitsi upila agomuboka te na omana munu andi.