Read Punu Josue 23 Bible Online

Josue 23 - Punu bible

Josue 23

¹Bilima bipuela binovioga Fumu amavega baIsrael yivumu na amabawaka kalala ombu bavinitsi abamabatsiengila yiari na yiari. Josue amanuna tindi ununa.

²Mbana Josue amanengila baIsrael botsu na bivunda biogu na basefu bogu na bansonsi bogu na bivunda biogu bibagora. Amabatsingula rie: Nyimanuna tindi ununa.

³Dumalaba motsu ama Fumu Nsambi enu amavayila bisi malongu meni botsu; jaʼ beni agumadutoyila.

⁴Labatianu nana nyimadugabila malongu na mbanda muna bifumba bienu; nyimadubetsila bisi malongu mamosi tumba vesiali basusu ubandila o mujamba uJourdain te no mubu aguneni o yiari ayi wisi ewendisini;

⁵Fumu Nsambi enu jaʼ beni odubingila bisi malongu meni na jenu dudila malongu mogu nana Fumu Nsambi enu amadutsingulila.

⁶Keveganu udukanga nokipanga motsu amamasonugu mu dibuku dimigaga miMoise, duyasumuna nesi umosi nesi ususu.

⁷Duyafubana mirima na bisi malongu meni abamasiala; duyaranguna diina dibansambi bogu na duyaleva pesi tsienu na bonyi; duyabagudimina ubayitsa.

⁸Tumba keveganu ombu Fumu Nsambi enu nana duivayilingi te na namunyi.

⁹Fumu amadubingila bisi malongu maneni abavu na tindi mangolu; te na namunyi mutu asakarungula udubetsa.

¹⁰Mutu enu umosi buandi orungula ubingisa tosini mu mbari Fumu Nsambi enu edutoyili nana amavanginina nenu.

¹¹Kabogu kebananu, rondanganu Fumu Nsambi enu.

¹²Pa dugabuga nomuefubana mirima na bisi malongu meni abamaletsananga nenu na pa duwelana, noba na yipoti nogu,

¹³jabanu yiri Fumu Nsambi enu agomuedubingilanga bisi malongu meni, tumba boba nderi dugagu nesi murambu nesi musoba dubansi nesi badoba mu misu menu te na dufuanganga o bulongu buboti abu Fumu Nsambi enu amaduvega.

¹⁴Yika ufu nyifu nana batu botsu befuangingi. Rangiminanu na buranga pangini atsi Fumu Nsambi enu amavangana nenu tsisamabunsu tsiotsu tsimadugusu.

¹⁵Munongu mosi nana Fumu Nsambi etu amadudugusulu pangini tsiandi munongu mosi Fumu odudugusulu mikilu; agotamba udutsiemusa o bulongu buboti abu amaduvega.

¹⁶Pa duibunsi pangini atsi Fumu Nsambi enu amavangana nenu na pa duigudimi va gusu bansambi bangana nobayitsa, Fumu odunyoyila kabu na agotamba udutsiemusa o bulongu buboti abu amaduvega.