Read Punu Josue 8 Bible Online

Josue 8 - Punu bible

Josue 8

¹Fumu amatsingula Josue rie: Guyalaba keri, guyakambulu! Bonga bagora botsu, wendanu yetoyisanu bisi Ai. Gulu nyiwakisi kaga jiAi ombu gagu, nesi batu bandi, nesi musiengi andi nesi bulongu buandi.

²Gukavayila Ai na kaga andi dedi mosi nana gumavayila Jericho na kaga andi; dimosi buandi, jenu na bagora bagu dukakelisa abiukindu na biruitsi wandi. Rambanu murambu o nsima musiengi.

³Josue amawenda na bagora botsu uyetoyisa bisi Ai. Amasola magumarieru matosini tsibangogaga bangensa aba amasindiga mukolu,

⁴na amabaruma maruma memama rie: Guluanu, dukayeramba murambu o nsima musiengi, duyakakana vala na musiengi, dukakunsama, jenu botsu.

⁵Tumba jetu na batu basusu tukueka o musiengi ava bopalila utubengusana nana bamavayila temu ajitega mbana tubarina nana temu ajitega.

⁶Botubingisa te na tubaduta vala na musiengi. Bovosa rie: Urina beturini nana bamaleturinina temu ajitega!

⁷Mbana jenu dupisula murambu, diwendi rie; duvinga o musiengi na Fumu Nsambi enu oduwakisa uonyi.

⁸Dunobonga musiengi dukagunyensa, dukavaga dedi mosi nana Fumu amavosila. Dutsigulu adi nyidutsinguli?

⁹Josue amabasoyiga na bamayeramba murambu va gari Bethel na Ai o yiari ayi wisi ewendisini yiAi. Tumba mukolu eni Josue amasilimina na bagora basusu.

¹⁰Josue amarelama kedi jineni na amalegukiga bagora bandi mbana jogu na bivunda biIsrael bamawenda uyetoyisa bisi Ai.

¹¹Bagora botsu abamaba nandi bamawenda o gusu ava bamatolila va nsungisini na musiengi, bamavaga milaku o yiari yibanda yiAi, yika yibususu yimabakakasana.

¹²Josue amasola bebeli na tosini yiranu tsibagora abamarambila murambu va gari Bethel na Ai o yiari ayi wisi ewendisini yimusiengi.

¹³Bagora banomana ubala milaku miogu o banda jimusiengi na murambu unorambu o yiari ayi wisi ewendisini yimusiengi vana mukolu eni Josue amakueka te na yibususu.

¹⁴Ava kaga jiAi amalabila dionyi, bisi Ai bamarelama mambangu kedi jineni, bamayebengusana baIsrael ubatoyisa. Kaga amawenda na batu bandi botsu o mbura ajimasolu o yiari yikumu. Asamajaba yiri o nsima musiengi umamurambulu murambu.

¹⁵Josue na baIsrael botsu bamavaga nderi bamabetsu na bamarina o yiari yikumu.

¹⁶Mbana batu botsu abamaba o musiengi bamagungasana ubabingisa. Bambingisa Josue te na bamabegu vala na musiengi.

¹⁷O Ai na Bethel usamaba ne dibaala dimosi adisamapala utoyisa baIsrael. Ava bamabingisila baIsrael bamasila musiengi yika nana.

¹⁸Fumu amaruma Josue rie: Samba dibaga diagu o yiari yiAi mu mbari nyirondi uguvega musiengi eni. Mbana Josue amasamba dibaga diandi o yiari yimusiengi.

¹⁹Yika esambi dikaka diandi, bagora abamaba murambu bamasundila upala va mbura ogu; bamakota o musiengi, bamagubonga na bamagunyensa vana vana.

²⁰Ava bisi Ai bamagengilila o nsima ogu bamalabilila nsumbili uronguga jironguyi na basamamuerungula urina nesi yiari yiotsu. BaIsrael abamarinasana o yiari yikumu bamagabuga ubenguna na abamababingisa.

²¹Josue na baIsrael botsu banolaba yiri bagora abamaba murambu bamanyensa musiengi bamagabusila uyitoyisa bisi Ai.

²²BaIsrael bamosi bamapalila o musiengi uyebabengusana; bisi Ai bamatsiengulu na baIsrael yiari na yiari. BaIsrael bamababetsa, bamabokisa botsu, basamasila ne umosi, ne umosi asamarina;

²³yika kaga jiAi, bamamubega muviga ombu Josue.

²⁴BaIsrael bamaboka bisi Ai botsu abamarina o kumu agu bamababingisila te na botsu bamaboku na baIsrael bamagabuga o Ai, bamayemanisila ubokisa abamasialulu.

²⁵Dutalu adumaboku muna yilumbu yieni dumaba yigumi na tosini beji; nesi babaala, nesi bagetu, diwendi rie: bisi Ai botsu.

²⁶Josue asamasundusa gogu andi agumaba usambu na dibaga te na vana bisi Ai botsu bamaboku.

²⁷Dimosi buandi baIsrael bamabonga dikabu diogu, diwendi rie: biruitsi na abimakindu o musiengi eni, bamadivaga na musuga agu Fumu amavega Josue.

²⁸Josue amanyensa Ai na amagukiga abimanyensu, diguki dieni dikivu te na namunyi.

²⁹Bamasuekiga kaga jiAi va muiri na bamamusila vana te na tsisiga. Ava tsisiga Josue amaruma yiri basundusi mfumbi, bamajibuaga va dikotulu dimusiengi na bamajidibiga na diguki dineni dimamanyi, dionyi dikivu te na namunyi.

³⁰Avana Josue amarungila yinyensulu yipagu yiFumu Nsambi Israel va julu mukongu uEbal,

³¹nana Moise, musalitsi uFumu amarumina baIsrael na nana dimasonugulu mu dibuku dimigaga miMoise rie: Yimaba yinyensulu yipagu yimamanyi amasamapaku, amasamadukusu na budilu. Bamavagulila Fumu pagu tsiunyensa va yinyensulu yipagu na bamavagula pagu tsikabusulu tsimaboti.

³²Avana Josue amamuesonunina migaga ami Moise amalesonina va misu mabaIsrael.

³³Mbana baIsrael botsu na bivunda biogu bibagora na bansonsi bogu bamaba yiari na yiari biyigara yipangini yiFumu va gusu bisi Levi abamaba bavagulitsi bapagu, abamabeganga yigara yipangini yiFumu; nesi benyi, nesi baIsrael, botsu bamaba vana, bamosi o yiari yimukongu uGarizim na basusu o yiari yimukongu uEbal nana musuga umalevegulu Moise, musalitsi uFumu agumagabila batu baIsrael miula

³⁴Mbana Josue amaranga migaga miotsu na miula na milogu nana mimasonugulu mu dibuku dimigaga.

³⁵Vasamaba ne diambu dimosi adi Moise amasona adi Josue asamaranga va gusu dibuli diIsrael; nesi bagetu nesi baana nesi abamatsana nogu.