Read Punu 2 Thessaloniciens 1 Bible Online

2 Thessaloniciens 1 - Punu bible

2 Thessaloniciens 1

¹Muganda egugu uiruyili ombu Paul na Silas na Timothee. Tuisonini jenu bisi Thessalonique, jenu aduvu baana baNsambi Taji etu na baFumu Jesus Christ.

²Maboti maNsambi na duvotsu bibi nenu mu diina diNsambi Taji etu na diFumu Jesus Christ.

³Baana bataji tuigabusilingi Nsambi diboti temu tsiotsu mu diambu dienu. Divu diwelimina udivaganga mu mbari yitu yienu yifuningi na duilasingi durondu duneni ombu basusu.

⁴Tuidudodisingi ombu bisi mabundu yiari na yiari. Tuibatsinguli nana duiwarili na nana yitu yienu yivu, diuleba duilabingi maguga na duikuanungu.

⁵Dionyi dilasi yiri bunsonsi buNsambi buvu buwelimina. Erondi yiri dulasa yiri duvu duwelimina ujaba Durumu duNsambi la dibandu duilabilimaguga namunyi.

⁶Nsambi olasa dusungugu duandi: olasa maguga ombu jogu abedulasi maguga

⁷novega jenu adumalasu maguga yivumu va mosi netu. Fumu Jesus odivaga ava oruyila o julu na biansa biandi bimangolu,

⁸boruga na mulutsu muji ukilisa jogu abagejabi Nsambi na jogu abagededili Musamu Uboti uFumu etu Jesus.

⁹Mukilu ogu uba dubungu dumutubu na bokakana vala na Fumu na bundumba bumangolu mandi.

¹⁰Amana molabana yilumbu ayi jandi oruyila ulasa bundumba buandi ombu botsu abamamuvayila yitu nesi ombu jenu adumavayila bumbeji buetu yitu.

¹¹La dibandu tuisambilingi temu tsiotsu mu diambu dienu. Tuiwivulingi Nsambi uduwamusa yiri nsanunu tsienu tsiuba tsiwelimina. Tuiwivulingi wandi yiri osalisa mangolu mandi yiri dudugusu kanu tsienu na yitu yienu wandi.

¹²Mbana diina diFumu Jesus Christ diudodusu nenu na jandi odudodisa wandi mu diambu dimaboti maNsambi amavu nandi.