Read Punu 2 Thessaloniciens 2 Bible Online

2 Thessaloniciens 2 - Punu bible

2 Thessaloniciens 2

¹Baana bataji mu diambu didurugu duFumu etu Jesus Christ na yibenguna yietu nandi, kokolu tsienu;

²duyapupusu na duyagulu jogu abevosi rie: Yilumbu yiFumu yimatola. Tanguji mutu oyibiyi amadivosa vo tanguji mutu ava amalonsila amadivosa. Diurungula uba yiri basusu bamavosa yiri jetu tumadisona.

³Duyadunsu! Yilumbu yiFumu yigotola te na dilensa diusita diuba na Mulensitsi olabana, jandi agumasolu ubungana.

⁴Jandi olensa motsu maNsambi na miyitsa miotsu. Okematisa va julu botsu nesi okota o Ndagu Nsambi novosa rie: Nyiji Nsambi.

⁵Dugerangimini yiri nyimaledutsingula mambu meni ava mbe nyikivu nenu?

⁶Ne nana duijabi dibandu yi mambu meni magelabini namapapa. Mulensitsi agelabini va temu ejiji na duijabi amemusikiyi.

⁷Yisuegu yimabi yimabanda usala tumba amolabana magoleba te na jandi oyimasikiyi ogusulu.

⁸Mbana Mulensitsi olabana na Fumu Jesus omuboka na punga ajiupalila munu andi na omubunga ava olabinina na bundumba buandi.

⁹Durugu duMulensitsi eni duba na mangolu maSatan na jandi olasa minongu miotsu mibimaga na bilimba bimfurulu;

¹⁰na ndunsulu tsimasumu ombu jogu abebungini. Jogu bobungana mu mbari bamabusa durondu na ngensa yiri bogobulu.

¹¹La dibandu Nsambi amabaveyila mirima yiri bovayila mamfurulu yitu.

¹²Diwendi rie: botsu abasamavayila ngensa yitu tumba abamaronda amasasungama bovegu mbela.

¹³Baana bataji tuigabusilingi Nsambi diboti temu tsiotsu mu diambu dienu mu mbari Nsambi edurondi. Nsambi amadusola vana dibandu udugabila mangolu maYinyunyi yiandi yiri oduvaga baana bandi ava dumamuvayila yitu mu diambu dingensa.

¹⁴Amadunengila na Musamu Uboti agu tumadusamunina na amaronda udugabila bundumba buFumu etu Jesus Christ.

¹⁵Kabogu baana bataji banu sikiri na gaanganu malongi ama dumagulu ne mu mambu metu ne mu miganda mietu.

¹⁶Jaʼ beni Fumu etu Jesus Christ na Nsambi Taji etu, omaturonda na omatugabila maboti mandi na ditasa diboti

¹⁷aduwarisi yiri duba na mangolu uvaga novosa yika maboti na maboti.