Read Punu 2 Thessaloniciens 3 Bible Online

2 Thessaloniciens 3 - Punu bible

2 Thessaloniciens 3

¹Baana bataji va julu vana, sambilanganu mu diambu dietu yiri mambu maFumu monyava na moyitsu nana mamabila va gari enu.

²Sambilanganu wandi mu diambu dibatu babi abetugaangi yiri Nsambi otukagula mu mbari batu botsu bagevayili Mambu maFumu yitu.

³Fumu aji asigama. Jandi oduwarisa na odukelisa yiri dugogaangu na mabi.

⁴Tuijabi yiri duivayi motsu ama tumadulonsa na yiri dumavaganga wandi.

⁵Fumu abasi mirima mienu na durondu duNsambi na pugu jiChrist!

⁶Baana bataji tuidurumi mu diina diFumu etu Jesus Christ rie: Kakananu na muana taji uotsu aguitsori na ageduki malongi ama amalonsu.

⁷Jenu beni duijabi nana divu diwelimina uduka mu mbari tusamatsora ava tumatsanina nenu.

⁸Tusamaji biguji bienu. Tumba nyangu na mukolu tumasalanga yiri tugoba mufuna ombu genu.

⁹Digewendi yiri tusamaba na musuga udivaga tumba tumaronda udulasa adivu diwelimina.

¹⁰Ava tumabila nenu tumadulonsa rie: Pa mutu agerondi usala ayaji.

¹¹Tumba tuigulu yiri va gari enu vavu bamosi abetsori na bagesali tumba befuamingi mu mambu mangana.

¹²Mu diina diFumu Jesus Christ, tuirumi batu beni na tuibalubusi rie: Bajangingi biguji bijogu beni na basalingi buranga.

¹³Baana bataji duyatoga uvaga maboti.

¹⁴Pa mutu agededili adi tuivosi mu muganda egugu, dinsoninianu. Duyaba na yimbatsi nandi yiri olaba yisonyi.

¹⁵Ne nana duyamugengila nderi aji muvinitsi tumba mulubusianu mu mbari aji muana taji.

¹⁶Fumu duvotsu jandi beni aduvotsingi! Fumu abi na jenu botsu!

¹⁷Menu Paul, nyidutindili mambolu. Na dikaka diami nyisoni, ayina yivu yilimba yiami mu miganda miami miotsu; anana nyisonini.

¹⁸Maboti maFumu etu Jesus Christ mabi nenu!