Read Punu 1 Timothee 1 Bible Online

1 Timothee 1 - Punu bible

1 Timothee 1

¹Muganda egugu uiruyili ombu Paul. Menu nyimanengulu uba yilumbi yiJesus Christ mu dinima diNsambi Mugobutsi etu na diJesus Christ aguvu ditasa dietu.

²Nyigusonini Timothee muana ami agu nyimadila mu diambu diyitu. Maboti maNsambi na dutandulu dumasumu na duvotsu bibi nagu mu diina diTata Nsambi na diMugobutsi etu Jesus Christ!

³Rangimina maruma ama nyimaguruma aya nyimawendila o Macedoine. Nyimavosa rie: Tsana o Ephese uyelubusa batu rie: Duyalonsa malongi masusu

⁴na duyakevega o usava tsavu na bukulu abugesuki. Motsu mana mebeyi mitsundu na mageroyisi dugobutsu aduibandi na yitu.

⁵Dibandu didiruma diedidi divu rie: Durondu dufuningi adupalila o murima ulioma na usunda na ubasa na yitu.

⁶Bamosi bamadilensa na bevosi posulu tsibuduka.

⁷Berondi uba milonsi amiyenalonsanga migaga miNsambi kabogu bagejabi ama belonsi ne pa belonsi nderi bemajabi.

⁸Tuijabi yiri migaga mina tsongu yika pa batu bemikipi nana mimavegulu.

⁹Tuyalibana migaga misamavegulu mu diambu dibatu baboti tumba mu diambu dibatu babi na mimbini na balensitsi na bavayitsi bamasumu na abagaa na duyitsu na abeboki bataji na banguji na bapunyi

¹⁰na bivuyisa na babaala abevayi dijamba na babaala nogu na batuyitsi babaviga na bafuritsi na balevitsi bamapesi na botsu abevayi amagaa mawelimina na malongi mangensa.

¹¹Malongi meni mavu Musamu Uboti agumapegu usamuna la Musamu Uboti uNsambi aguvu na bundumba na miula.

¹²Nyigabusili Fumu etu Jesus Christ diboti, jandi agumakwarisa mu yisalu yiami. Nyimugabusili diboti mu mbari amandaba usigama umusalila

¹³ne nyimaleba musabulitsi na mukuanitsi na mungo dikasi. Tumba Nsambi amandasa yingeba, yiotsu yina mbe nyisakamuvayila yitu, kabogu nyisamajabanga ama nyimavaganga.

¹⁴Mbana Fumu amamfunisila maboti mandi na amapega yitu na durondu abiruyili ava tuifubinini mirima na Jesus Christ.

¹⁵Diambu dingensa na diwelimina uvayila yitu la didi rie: Jesus Christ amaruga o bulongu ugobula bavayitsi bamasumu. Nyimabiva uviolila botsu.

¹⁶Ne nana nyimalasu yingeba na nyimatandu. Jesus Christ amadipayila ulasa nana pugu andi jivu nondasa nana yibagunu ombu jogu abomuvayila yitu nodila monyu umutubu.

¹⁷Ombu Kaga mutubu ajigefu na ajigelabini nombu Nsambi mosi buandi ubi duyitsu na bundumba mutubu! Amen!

¹⁸Muana ami Timothee yisalu yieyiyi nyiguveyi. Yivu yiwelimina na mbigulu atsimalebiga.

¹⁹Warisa yitu yiagu nokelisa murima agu. Bamosi abamabusa ugulu diufi diogu dimurima bamatsiemusa yitu yiogu.

²⁰Va gari ogu vavu Hymenee na Alexandre aba nyimasulasana ombu Satan yiri jogu bajabi rie: Bayasabula Nsambi.